2023-05-12 18:23:23
قوْجامان، شانلي ـ شرفلي اوستاديم «يحيي شيدا» حضرتلرينه
حمید آرش آزاد
شيدا، ساغ اوْل
گول ـ چيچكله بزهدين سئوگي باغين، شيدا، ساغاوْل
وئردين عارفلره عشقين چاناغين، شيدا، ساغاوْل
سن آزادليق بئشيگينده اوزون ايللر يازدين
آنا ديلده ادبيّات واراغين، شيدا، ساغاوْل
گئجه ـ گوندوز چاليشيب، گؤز ببهگين تك قوْرودون
بو وطنده ادبيّات اوْجاغين، شيدا، ساغاوْل
داملا ـ داملا اريديب، وئردين اورهكدن ياغيني
قوْيمادين سئونمهيه توركون چيراغين، شيدا، ساغاوْل
بو چيراق سئونمهدي، هئچ بيرده داها سئونمهيهجك
پاك اورهكلردن آليب چونكي ياغين، شيدا، ساغاوْل
سوساميش، يانقي قالان ائللره گؤستردين سن
دوم ـ دورو، سپ ـ سرين عشقين بولاغين، شيدا، ساغاوْل
اوزون ايللر، بو ديله هم آتا اوْلدون، هم آنا
بسلهميشدير نه ايگيتلر قوجاغين، شيدا، ساغاوْل
رؤوشنين نعرهسيني داغلارا سالدين گئنهده
سن ديكهتدين نبينينده پاپاغين، شيدا، ساغاوْل
ادبيّات سارايين هئچده ييخانماز بو فلك
چون تاپيب داغدان اوجا اؤز داياغين، شيدا، ساغاوْل
اوستاديم! باغريني ياردين قلمينله گئجهنين
گونشين هر يانا سالميش شافاغين، شيدا، ساغاوْل
سازلارين تئللرينين نغمهسي دونيا بورويوب
سندن آلميشدي بو تئللر داراغين، شيدا، ساغاوْل
قورو ـ بوْش ايلغيمي سن رؤوضهيِ رضوان ائدهرك
اوْردا برپا ائلهدين فتح طاغين، شيدا، ساغاوْل
باغبانيم! سن ائگيليكله، داها ايللرجه ياشا
چون خزان گؤرمهيهجك بيرده باغين، شيدا، ساغاوْل
سن ايدين آچدين ادب، شعر، حقيقت سؤزونه
«آرش» ـ ين هم قلمين، هم دوْداغين، شيدا، ساغاوْل
1.0K views15:23