لو طفلك يبكي كثير , أو يستغل البكاء علشان تنفذي اللي هو يبغى, | علم النفس والاستشارات
لو طفلك يبكي كثير , أو يستغل البكاء علشان تنفذي اللي هو يبغى, أو يبكي على أي شيء وكل شيء, تحتاجي تعرفي كيف تتعاملي معه في الوقت هذا:
1- لا تقولي "لا تبكي " لان البكاء يساعده يخرج الطاقة السلبية.
2- لا تتعصبين أو تتفاوضي أو تقوليله بعملك كذا علشان تسكت , هو أصلًا بيكون مركز في البكاء ومو سامعك وكلامك الكثير في الوقت هذا يستفزه لأن بالنسباله انتي مو فاهمته فيزيد في البكاء و انتي تعصبي أكثر .
3- بلاش تهديد أو تقوليله "ما اسمع صوتك" "اصبر علي بس" "بوريك", حسسيه بالأمان وبلاش تهديدات .
4- اقعدي على نفس مستوى طول الطفل وامسكي ايديه أو احضنيه , التلامس بينك وبينه يخليه يهدى تلقائي.
5- عرفيه إنك منتظره يوقف بكاء و يصير هادي علشان تقدري تفهميه وتتكلمي معه, و هذا يخليه يعرف إن البكاء مو وسيلة للي هو يبغاه.
6- لو الطفل يتكلم وهو يبكي لا تردي عليه , قوليله "أنا ما افهم كلامك وقت البكي", "صوتك مو واضح وانت تبكي , أول ما تهدى وتسكت أنا اقدر أسمعك بوضوح" .
7- لو طفلك ما هدأ ومستمر في البكاء قوليله "إنك عارفة إنه زعلان و واثقة إنك بتقدر توقف بكاء علشان نتكلم ونشوف سبب الزعل " أول ما يحس إنك مقدره احساسة ومعترفه بزعله بيهدى .
8- أول ما تحسي إنه استجاب وخلاص هدأ احضنيه و قول له انا احبك .
9- مرحلة التفاهم , راح تسمعي طفلك للآخر وتشوفي وجهه نظره وسبب بكاءه , وتحطي حلول مناسبة للموقف . لما تسمعيه للآخر وتحسسيه إنك فعلًا تحاولي تلاقي حل هذا بيخليه يثق في الكلام معك .
10- اشكري طفلك بعد ما تخلصوا مناقشة على إنه وقف بكاء علشان تقدروا تتكلموا وتتفاهموا وتوصلوا لحل مناسب, النقطة هذه تعطي للطفل ثقة أكثر في نفسه وفيكِ و بيحب من نفسه يجي يتكلم أو يقول اللي مزعله بدل ما يقعد يبكي طول الوقت .
«تذكري» ان النجاح في تعديل سلوك ابنك يعتمد بالدرجة الأولى عليك و على مدى صبرك و هدؤك في التعامل مع الموقف