اتعلم من حبك .............................................. | عبد الكافل حسن الكعبي
اتعلم من حبك
..........................................................
كلمن يحبك سيدي يشدهني امره
الخلص حياتة ابلا سكف والتالي عمره
تحت الشمس ماتستضل وتواسي الحسين
حبك وسط كلب الرباب العاش جمرة
تحت الشمس تواسي السليب
وبلا سكف بقت ياغريب
والقدمت بدينك رضيع
بيهة الجرح ابد ما يطيب
مايشفة ومايغفة
مايشفة ولايطفة
.............
وبعد اليحبك بي طبع ماينسة مولاي
نار بحبيبك تستعر لو شاهد الماي
يذكر عطش جبدك فطر اخ الظهر ذاك
ويخالط الماي ابجي دمعاتة الهواي
يفيض الدمع لو بس يشوف
الماي وذكر مصاب الطفوف
رافك دمع محنتة العليل
وعل خد صفت دمعتة تطوف
مايكطع ضل ينبع
مايكطع هل مدمع
...............
والحبك بكلشي الك مولاي ضحة
انطة الك كلشي ملك بس عاف جرحة
ام البنين القدمت لعيونك اولاد
ماهمت ابذبح الولد كاسرهة ذبحة
حبك ملك امامي الدليل
انطت الك عضيد وكفيل
انطت ولد الك ياحسين
ولجلك كضت نحيب وعويل
بس حبك والحبك
بس حبك والكربك
................
والجلك اتحمل اشد نوع المصايب
تنظر اهلهة مذبحة فوك الترايب
وحركة خيم بيهة الحرم وتفر العيال
زينب وصط كوم العدة بذيج النوايب
تلم الحرم تسكت الزغار
وحيرة الستر تلاشة بنهار
الحومة زلم ترسهة تدور
واخ الخيم متروسة نار
ما تخمد لا تبرد
ما تخمد من تنهد
.................
عبد الكافل حسن الكعبي
