💫نِبِضّ أّلَحٌيِّأّةّ💫🥀

2020-08-13 15:54:53 الحب وحدو مو كافي!
قالت: سمعت شب بقول لبنت بس الحب وحدو مو كافي لنعيش!
استغربت، ما نحنا إذا لقينا الحب شو بعد بدنا، أو شو بعد بعد بيلزمنا، لليوم يلي عرفت فيه وفهمت، يمكن كان قصدو الحب بلا.. غيرة..ومودة..ورحمة..وقوة..وإصرار..واهتمام..ونكد...
ومواجهة العالم كلو..ببطل كافي!
لأن ما بيزبط الحب مع
اللامبالاة..والبرود..والتعامل بطريقة مستفزة..وبلا اهتمام..بلا كلمة وين رايح، شو أكلت، نمت منيح، الدنيا برد، بلا ما اعرف تفاصيلك بكل ساعة ودقيقة...

-بضل وحدو يلي بحب بالع السكين من الحدين، ما بيعرف شو بواجه أو شو رح يصير، لو الحب وحدو كافي ما نمنا مخذولين، أو كتمنا جواتنا شغلات كبيرة بس اتفجرت ع هيئة شغلات تافهه، ما اشتقنا، كنا تبنا من بعد أول مرة، ماكنا منحتاج لدفاتر لننزف جروحنا بين نقطة وفاصلة.
بس لو وحد كافي ما كان في أغاني فراق وما قالت جوليا ياريتو ما مرق
آليسار المقداد باز کردن / نظر دهید

2020-08-13 15:54:45 بعرفك حنون، وبعرفني بشبه الأيام ما إلي أمان!
بعرفك قادر تكون وفيّ لأيّ ذكرى عابرة، بس أنا لأ، مابقدر أوفيّلك، صدقني هالشي صعب، صعب كثير!

وبعرف لما كنت ابتسملك، قلبك يكون بإيدي عم اعصر فيه بدم بارد، وأنت كنت بتشبه قطة عم تتمسح فيني خايف، معك حق تخاف، وأنا كنت خاف، ضل خايفة اكسرك، واخسر أول حدا نقي بحياتي.

أخر غنيه هديتك ياها، كان بعيونك دمعة بعيدة، وأنا كان بعيوني إصرار، صدقني ماكان بدي أخسرك بطريقة بشعة، أنا اخترت أسهل الطرق وأخفها صدمة عليك.

بعرفك رح تضل تراقبني لفترة كبيرة من بعيد، وكل ما قرأت شي رح تحنلي، وكل ما زادت ساعات فراغك رح احتل عقلك بالثانية الوحدة عمر كامل، ورح تحاول تحكي معي وأنا صدك، لأن رح كون برتب حياتي وشيل من أثرك الصافي جواتي، بس بدي قلك أنا من الأول كنت وهم وطيف مش أساس، لما تبلش تشغل وقتك وتصير أناني بحالك، رح تنساني.

بعرفني من الأول مش إلك، بعتذر، لأنك كنت بالنسبة إلي بر الأمان من التعمق بشخص غيرك.

آليسار المقداد باز کردن / نظر دهید

2020-08-13 15:54:35 لعل وعسى شوفك شي مسا!
بس شوفك رح احكيلك قديش نطرتك، وتخيلتك عم تواسيني من كمية الخيبات يلي أكلت قلبي، رح اكتفي فيكِ رفقة عمر لأن طلعت الحياة بلا صحاب ما بتنعاش!
رح قلك بيوم من الأيام عن رفقاتي يلي تركوني عند أول مطب! ما تحملو جزء بسيط من مزاجيتي، وعن يلي بعدو بس بعدين رجعو ندمانين، لأن بيعرفو الحكي بكون بس إلي والطبطبة بتكون مني، لأن متأكدين إني الحدا الوحيد يلي بقدر امسك القلب بإيدي وامسح منو كل شي!
رح ارجع معك ولد صغير بيزعل إذا ما شاف الزيت حد الزعتر، لأن مقتنع إنو هالثنائي مش لازم يفترق!
رح حس بفعل كلمة آمان لما نكون سوا، مش رح قلك رح شوف بعيونك وطن لأن مابدي كون بشبة باقي العالم وخونك، رح شبهك بالصلاة، كل ما بعدنا بتتصل قلوبنا بسجدة!
بدي قلك الحياة كانت يتيمة معي، بس بوجودك رح تكون أم!
أنا متأكد أنك موجودة بشي مكان، لأن حدا بكمية هالندوب هديتو من الرب كتف، لا بيعرف طعم الخيانة ولا الغدر!

صدقيني مجهزلك قلب كبير مفتاحو أنتِ!
#سنيوريتا باز کردن / نظر دهید

2020-08-13 15:54:15 يُحكى في عشق أُم!
-تتعدد الأسباب لدي لعدم حُبك، ولكن في كل مرة أجدني أتمسح بكفيكِ، أسجد صريعة لعظمة الرب لإيجادك!
-لا أحبك كونك فقط أنجبتني، أحببتك دوماً وأحببت ذاتي معك، عندما كنتِ كل الأصدقائي، ولم أتوسل حضن لأرمي به كل دموعي، فكان داخلك دوماً الملجأ.
-أنتِ كل الأسباب التي تدفعني للقتال في رحلة البقاء، فقد جعلتني أم تحارب عن أطفالها ولم أنجب يوماً.
-لم أشكك يوماً بحب الله لي، كونه رزقني بك، فكنت بمثابة حديث قاطع للشك باليقين!
-دوماً كانت ابتسامتك ك عاشق، تبتلع قلبي!
-في كل العثرات التي واجهتني، كنت أعود والتحف يديكِ لأزيل قسوة هذا العالم!

#سنيوريتا العربي باز کردن / نظر دهید

2020-08-13 15:53:53 لما تحب تقدم اعتذار لأي حدا بالكون، خلى الأولوية إلك، لأن أنت كنت أول سنكينة انغرزت بحالك، وبالنهاية مافي أوفى منك إلك.
ولما تحب تقدم شكر أو نصيحة، أو تكون ممنون لحدا، لازم تقدم كل هالشي إلك أنت وبس!
بالنهاية لما كنت مرضان حسيت بالوجع لحالك وأغلب ساعات مرضك قضيت وقتك عم تصارع بحالك!
بساعة كنت خايف وندمان أغلب رفقاتك يلي استسخف بخوفك، ويلي حبط من معنوياتك، ويلي قلك كلمتين زاد وجعك.
لما فرحت، فرحتك كانت عم تفيض بقلبك أنت أكثر من الكل!
مشان هيك أنا بشوف رفيقي الخاين والوفي هو أنا!
خنت حالي لما قللت منها ولما حبيت حدا أكثر منها، ولما واسيت الناس ع حسابها، ولما حملتها فوق طاقتها مشان تتحمل ناس تحت مسمى الصداقة!
وبهي اللحظة أنا عم سدد الديون وأوفي لحالي، بكل موقف شكر عم اشكر حالي، بكل مكان فيه فرحة عم قدر حالي!
بكل بوست بصادفو فيه حكي عن الرفيق الحنون والغالي عم اعمل تاغ لحالي، وهالشي هو قمة العقل.
مافي حدا أبدى مني، أنا وبعدي الكل!

آليسار المقداد باز کردن / نظر دهید

2020-08-13 15:53:40 اشتري مش اعمل مستقبل، وقفي معي وافهميني شوي لنكمل مع بعض مش نكمل ع بعض!

آليسار المقداد باز کردن / نظر دهید

2020-08-13 15:53:34 من أكذب ما قرأت:
-إحصائيات إنو الحدا العصبي هو حدا قلبو صافي، ومابيعرف شو يعني حقد. "كل الشعب عصبي، والحقد عم يشرشر من الكل"
-الحنون بس ينجرح ببطل يقدر يرجع مثل الأول، بصير حدا قاسي مع الكل. "خصلة البراءة والهبل مش ممكن اي شي يغيرها، وكل ما فكر هالحنون يقسى قلبو بيرجع يوجعو، الطبيعة المكللة بالبياض مابتصير كلها سواد"
-النسونجي بس يعرف شو يعني حب بتوب وماعاد يشوف ولا بنت غير يلي بحبها! "لو كان بيتغير كان زمان البخيل بطل يجمع مصاري"
-يلي متربي ع الغالي بعمرها عينو ما بتكون فاضية! "مشان هيك كل الجامعات الخاصة الطلاب عم يعانوا من السرقة"
-يلا دقيقتين وبكون عندك.... "No comment"
-المخنث والمسترجلة، ما دخل الأهل بطبيعتهم الغير سوية.
"أسفة ماكنت عم شوف إبني عم يشذ عن طبيعتو! "
-المكان يلي بينكسر فيه الواحد مش ممكن يرجعلو. "للأسف كل الطرق تؤدي إلى روما"
-إحصائيات الأبراج، يلي خلت الناس تتبرمج ع مفاهيم غلط.
"الأسد مابشوف حدا قدامو، والجوزاء اي ولا، والسرطان خزان أحزان..... "
-بس تجيبيلو أخ ببطل هيك شرس. "الطفل الثاني بينزل بشهادة طب نفسي وتهذيب"
-يلا بكرا بس نتزوج كل شي بيتغير. "داخلين لمصحة عقلية"
-أنا ماحدا وصل لطريقة ودرجة حبي! "طريقة الوصول للسما السابعة"
-أنا بنصحك بالفرع يلي عم ادرس فيه، هو فرع حلو وبجنن. "بس ناقص طلتك"

#سنيوريتا باز کردن / نظر دهید

2020-08-13 15:53:12 للشباب وبس...
بالبداية بدي قلك يابنت أنا مش سوبرمان بالحب، أنا بشبهك بكثير لحظات، ببكي أوقات، وأوقات مابكون قادر قول لأهلي بدي هالبنت لو ع الموت، يلي بدي وصلك ياه أنا جواتي في قطعة بتعضل أكثر ماتدق!
-الأولوية طبعاً لنكدك، أنا بفرح فيه أكثر من فرحتي لما تقولي بحبك، بس لازم يكون لكل شي حدود..
-أنا أبداً مابنزعج لما تحكي معي وتعلي صوتك بس تكوني معصبة، بس بقلك وطي صوتك وبعصب لأن هي حكمة متوارثة بين الرجال، بقولوا مشان أفرض شخصيتي عليكي..
-أنا لما بشوف حدا من رفقاتي برد ع البنت يلي بحبها، وبدللها، بقول عنو "خَروف" رغم إنو أنا بعمل مثلو معك، بس سبحان الرب هاد طبع مافي منو مهرب!
-لما تعطيني مساحة حرية واسعة، رح اختنق، أنا طفل، بحب الإهتمام والغيرة، حتى لو ما طلبت، وبالنسبة إلي لما ما تغاري عليّ بدي خونك بدي خونك..
-لما كل يوم تلبسي شي جديد أنا مش رح انتبه، لأن بالنسبة إلي كل يلي عندي كم قميص وكم بنطلون وبشوف حالي بجنن فيهن، يلي بدي وصلك ياه، أنا أخر همي صرعات الموضة...
-ضحكتك بالشارع، ضحكتك بالشارع بتستفز كل ذرة فيني، مش رح شوفك واو وأنتي عم تمشي توزعي ابتسامات، حتى لو ضحكتلك ومشيت وراكي، بالنهاية أنا بتسلا لأنك انتي فتحتيلي الباب، أنا ما دقيتو انتبهي..!
-نقطة مهمة "المكياج" صدقيني مافي داعي تعملي استعراض للرايح والجاي، الله مابيخلق حدا بشع، مكياجك الكامل حلو بالبيت، أما برا حلو تكوني ع طبيعتك أو شي خفيييييف جداً، مثلاً الروج الأحمر الصارخ بلاه، أنا مش ملاك نازل من السما، رح تلفتي انتباهي لو كنت إمام مسجد، بس مش رح تعجبيني لو كنتي بنت السُلطان، اتفقنا!
-ايمت بدك تخطبني، شو بتكنلي مشاعر، شايفني حلوة.....
كل هدول بيرفعولي ضغطي، أنا ماجبرتك تحكي معي! لو بدي اخطبك بعد هالسؤال رح عيد التفكير بالعلاقة كَكُل
أما قصة شو بتكنلي مشاعر، أنا لو بحبك مثلاً في قط رح ياكل لساني وماقلك!
أما شايفني حلوة، صدقيني هالسؤال رح يفتح عليكي بواب مسكرة، رح تنبهيني لعيوب بشخصيتك، وأهم عيب قلة الثقة بحالك، نحنا الشباب منحب البنت والواثقة تأكدي من هالشي، وكبريلي عقلك لك سيدتي!
-كرة القدم، واسماء اللاعبين، أنا جد مستعد اتركك لو ما تفهمتي إنو هالقصة بتعنيلي قد ما بيعنيلك طول شعرك ولونو، مافي داعي تخوضي معي نقاش بهاد الموضوع، وإنتي ما بتفهمي فيه شي..
-لما بقلك شو حابة جبلك هدية، مافي داعي تنبحتي وتطلبي، لأنك بتوقعي بالفخ، قولي مابدي غير سلامتك أو غيري الموضوع، خليني اعرف أنك قنوعة..
-المصاري، اي اي المصاري، لاتخلي كل كلامك عن المادة، ولا تطلبي مني، أو تبينيلي أنك محتاجة شي، مشانك أنتي مش مشاني أنا، لأن لو قدر الله وكنتي من نصيبي رح يمرق يوم وذكرك بهاد الشي، واحتمال يضل معيار إلك طول حياتك، أكيد مش كل طباع الشباب مثل بعض بس بهي النقطة بدك تبصمي بالعشرة إنها عند الكل...
-ماضيكي الأسود مع غيري، مافي داعي اسمع منك عنو، حتى لو بعرفو وسألتك انكري معليش، ع الأقل حسسيني بالكذب بالأولوية، واحتفظي إلك بنقطة ثقة!
-اظافيرك، إذا أنتي من البنات يلي بحبو الأظافر وقصص هالجمال هي، اعتني بنظافتهن منيح، لأن بأي قعدة أول شي رح يلفتو نظري!!
-لما بتطلعي مع رفقاتك مشوار، مافي داعي للحركات البهلوانية بإيديكن، يعني صدقاً بعد ما تقطعو الشارع كل شب فيه رح يضحك شوي ويحكي بهالحركة شوي ثانية!
-مافي داعي كل شوي تقوليلي بحبك، أنا وكل الشباب ملولين!
-لما بقلك باي بدي نام، يعني أنا خلصت حكي، مشكلتك مع جارتك وكل أهلك أنا مادخلني فيهن، وبكرا بس فيق اصرعيلي راسي بالمشكلة، مش احتجتك وما لقيتك، ما أنا بني أدم مش زومبي بدي نام أكيد!
-بس ما يعجبك شي بتصرفاتي، مافي داعي تنزلي كل دقيقتين ستوري، وخاين ومدري شو، تعي دجيني دج أنا حركات التخفي والرجل الصعب مش ممكن افهمها!
-لما بحكي معك وبكون تعبان، وماالي خلاق للعالم كلو، بلا النق أمانة، أنا بس حس حالي قادر احكي رح احكيلك، أما بعد ما تنقي مستحيل احكيلك شي، نحنا مناخد من الإنطباع الأول!
-ياهبلة، لما بقلك في بنت حكتني، أو في بنت ضحكتلي أو أي شي، أنا بهاد الوقت بكون بدي حس بحالي عندك مش ضروري كون صادق!
بكون بدي تزيدي شوي من غيرتك واهتمامك، مش تضربيلي بوز يقطعلي رزقي، أمانة كبري عقلك!
-مش إذا قلتلك حكيت لأمي عنك، أو عرفك ع أهلي تبلشي تحلمي بديكور البيت، وتختاري اسماء الولاد، عادي يعني احتمال كون كذاب مشان استدرجك وتأمنيلي أكثر، واحتمال كون جدي.
-صورتك، صورتك، صورتك، لو بطلبها مليون مرة لاتبعثيها، لأني لو كنت نبي مُنزل مش رح امسحها اي، قصص وثقت فيك وحبيتك مابتاكل من عقلي ولاشقفة، أنا طول مابقدر شوفك، الصورة ما بتعنيلي شي، ضلي واثقة من هالشي.
-الشب الشرقي قد ماكان Free بالنهاية شرقي، وصدقيني هالشرقية هي يلي تتحكم فينا...
-بدي قلك لما بحبك بقدملك إثبات حقيقي لو بسيط، وبوضع هالأزمة الراهنة المحبس فوق طاقتي، مابقدر اتقدم لأن كل شي بحسسني إني رايح باز کردن / نظر دهید

2020-08-13 15:53:02 نكد البنات..
النكد أبداً مش هرمونات زايدة، ولا كره بلحظات السلام، بس نحنا كبنات منحب الأولوية بكل شي، منحب ننحط بمرتبة عالية ما حدا يوازينا فيها لو بالحكي.
-بترعبنا فكرة أنك تشوف رفيقك، عقلنا بروح لمسافة تخيل أنت بأقصى أحلامك ما بتوصلها، لأن نحنا مدبلجين، رفيقك يعني في حكي عن البنات وتلطيش!
صدقاً منضل نعمل حساب لقعدتك مع رفقاتك أكثر من خوفنا إنو نترك!
-أكيد مش رح تحبك وأنت أربع وعشرين ساعة أونلاين، وبتضل تسأل عنها، لأن ببساطة رح تحسسك إنك بتخنقها، أو ماعندك ثقة فيها، بس داخلياً هي أكثر حدا مبسوط ومرتاح، بس رح تبينلك العكس، لحكمة ربانية حتى هي ما بتعرفها!
-لما تتزاعلو وما ترجع تصالحها وتقلك حصل خير، لازم تتأكد إنها عم تحسبلك كل كلمة قلتها من سنة، وأنت رح تتعاقب عقاب سنة كاملة!
هي رح تفكر أنو في بنت غيرها بحياتك، السبب الوحيد لأن ما صالحتها! يعني لو صالحتها حتى لو هي غلطانة شوف قديش رح توفر ع حالك تعب بال بس أنت غلطان، نسيت تحسسها بمقامها الرفيع عندك!
-لما تشتري لبس جديد بلا ما تقلها، وتلبسو وما تكون هي أول حدا شافك فيه، مارح قلك خيالها لوين رح يوصل أو شو السيناريوهات يلي ألفتها بأنك خطبت وتزوجت وجبت كمان ولاد بس بدقيقة وحدة!
-أوعك ماتغار، حتى لو أنت من النوع يلي صعب يظهر مشاعرو لازم تغار، لأن عدم الغيرة يعني عدم وجود الحب، ولا تصدقها لما تقلك بكفي غيرة، لأنك لو رديت بتكون وقعت بالفخ!
نحنا منتأفأف من كل شي بدنا ياه ومنحبو!
-لازم تتأكد إنو ساعة نومك هي الساعة الوحيدة يلي بتحتاجك فيها، ومن هون بتنطلق مقولة ما احتجتك يوم ولاقيتك!
-إياك تمدح جمال وأدب بنت قدامها، لأنك رح تتسبب بحقدها ع هالبنت وتحاول تقلدها بكل شي، وأصعب شي ع البنت ماتقدر تكون ع طبيعتها مع الحدا يلي بتحبو!
-لما تتأخر دقيقتين لترد خيالها المتواضع رح يقلها مرتو كانت حدو! أو متعيب منك مابدو يرد قدام أهلو!..
-لازم كل فترة تقلها حليانة لحتى تعرف إنها ما فقدت بريقها بعينك!
ولازم تضل تسألها عن أهلها، وأوعك تسألها عن رفقاتها، لان رح تشك فيك وبرفيقتها!

بالنهاية بدي قلك نحنا البنات بسيطين جداً كلمة بتجيبنا وكلمة بتاخدنا ومافي أسهل من المعاملة معنا بس أنت ركز ولاتنتحر!
لازم تحب بمنتهى الجنون بس وأنت هادي، وحاول تكون سوبر مان بس لابس لبس حلو
آليسار المقداد باز کردن / نظر دهید

2020-08-13 15:52:07 "لستُ مُتاحًا من الناحية النفسية الآن، يُرجى معاودة الإتصال في وقتٍ لاحق"
أتمنى أن يُقبل كعذر ولا يُرى كهروب.
-حنان سعيد باز کردن / نظر دهید