لاتتــــــعذر * رد لاتگرب لاتتعذّر ماريد اعذارك لونار افراگ | محمدابوعمارالحزباوي

لاتتــــــعذر

*

رد لاتگرب لاتتعذّر ماريد اعذارك

لونار افراگك ما ريدك بيَّ اضرم نارك

آنَا الذبت ابعطشك ماي

وْلجلك بالحَر صرت افياي

وبين ارموشي ابلهفة وشوگ امشيدلك دارك

رد لاتگرب لاتتعذّر ماريد اعذارك

*

هِمْت اوياك وعفت الديرة وتارك جيراني

تالي اتصّبِّح ويَّ الغير وتشمت عدواني

خِنت العِشرة ابشربة ماي

وْ وَيَّ العاذل رايح جاي

وتريد اقبل تگعد يمّي وبالحُب نتشارك؟

رد لاتگرب لاتتعذّر ماريد اعذارك

*

آنَا الأشتل وردة حُبّي ابساحة بستانك

وانتَ التگطع عنها الماي ابزلّات السانك

ردّة فعلك مو عالبال

من انهاك مْن العذّال

وتعاندني وتگعد يمهم وتبيع اسرارك

رد لاتگرب لاتتعذّر ماريد اعذارك

*

لَـ تْحاول لا لاتتعذّب حاول تنساني

اشما تفتر ابدورة گلبي ابعكسك تلگاني

يالما عندك كلمة وراي

لَـ تظّن اقبل تمشي اوياي

ماريدن وصلك لاريدك لاريد اخبارك

رد لاتگرب لاتتعذّر ماريد اعذارك

محمد ابــــوعـــمار الحـــزباوي

2010م

لحنها وغناها الفنان الأهوازي
حميد أبوسيف الصياحي 2013م

#البحر_خبب
مفعولاتن مفعولاتن مفعولاتن مفـ
مفعولاتن مف=فعلن مفعولن
(فعلن فعلن فعلن فعلن فعلن مفعولن)
(مُتْفاعلْتُن مُتْفاعلْتُن مُتْفاعلْتُن مُتـ)

المقاصير
مفعولاتن مفعولات
(فَعْلُن فَعْلُن فَعْلُن فَعْلْ)

https://t.me/abuammar8