الشاعر عادل العبد الله

2022-08-30 17:42:32 السيدة #رقية

ياشبيهة فاطمه القُدسيه
يالخلقتي بسمچ احسينيه
¯¯¯¯¯
انتي رب اللطمه وي كل الجنون
كلشي تحت ايدچ يمن كن فـ يكون
بسمچ الزنجيل صاير عالمتون
اوإلچ كل عين ابفخر مدميه
¯¯¯¯¯
ياصلاة العارفين التعرفچ
كون نتوضى قبل ما نذكرچ
اوقبل ما نلطم نظل نركع إلچ
اضلوعنا كلها إلچ محنيه
¯¯¯¯¯
نعمه انتي اودوم نسجد لچ شكُر
اوموكثيره اعليچ لو ندمي الصدر
فدوه خدنا امن الجزع من ينحفر
اوندعي الله اوتقبلي اللطميه
¯¯¯¯¯
بسمچ انسبح رقيه ابهالعزاء
وندري هالتسبيح يوصل للسماء
اوعند ابوچ المندفن في كربلاء
اودوم اسمچ يبگه مأوى الريّه
¯¯¯¯¯
ياللي بحروفچ نحس ابكل امان
اونغمة اسمچ تبگه حلوه باللسان
القبله انتي ياثمر من الجنان
اومنچ احنه شفنا كل حنيه
¯¯¯¯¯
بيچ نتوسل يمن كهفچ حصين
اويكفي لو گلنه رقيه ياحسين
ثبتينه عاللطم طول السنين
اوخلي تصفى ابخدمتچ هالنيه
¯¯¯¯¯
يارقيه يلسكنتي ابكل فؤاد
بيچ ماغيرنا لحظه لعتقاد
يمن اسمچ كاف ها يا عين صاد
والچ عين التعشگچ اربيه
¯¯¯¯¯
عادل العبد الله
https://t.me/adela313
الفاتحة لروح من علمتني الخدمة الوالدة *آمنه العبدالله*

20.10.2017
.. باز کردن / نظر دهید

2022-08-29 08:27:37 عن السيدة #رقيه سلام الله عليه

يبويه ..حياتي ابغيبتك غابت
يبويه..اوتدري مهجتي انصابت
من راسك لمحته
بجروحي حضنته
***
يبويه بنتك آنه وعاين ادموعي
تظل تجري أبد لا ما سكن روعي
ابمجامر فرگتك تتوگد اضلوعي
اوطفت بعدك يبويه شعلة اشموعي

وسافه.. من عيني الأمل مذبوح
وسافه ..بعدك ما تهيد الروح
.
اودمعي من ذرفته
بجروحي حضنته
***
لوّن ادري حياتي دونك ادفنها
يبويه جثتك ارد اسألك عنها
صدگ خيل العدى ابحافرها رضنها
اولمن شافتك عمتي اعتلا ونها

تنادي ..يحسين انوذر جسمك
تنادي ..عالغبره جرى دمك

والضيم اللي شفته
بجروحي حضنته
***
يا ريتك تصد ليّه وتحاچيني
من كثر التعب ما غمضت عيني
اوترى گوم العدا صارت تباريني
دايم بالضرب بويه تأذيني

عجيبه...من صغري لگيت اهوال
عجيبه..يگيدوني العدا بحبال

اوحزني ماصرفته
بجروحي حضنته
***

شلي ابعمري عسى ما طوّل ابلياك
ما ظنيت اشوفه راسك وانعاك
ولم طشت الرزيه وانتخي بحماك
واخضب راسي واتحنى بعد بدماك

اناشد ..عفتني اشلون يالغالي
اناشد ..وانته تعلم ابحالي

همي من حملته
بجروحي حضنته
***

ثنايه اتكسرن منك دگلي اشلون
صدگ بيها ابعصاته يضرب الملعون
اوبينه ارجاس اميه ظلن ايشتمون
مظن أهل الشيّم من هالفعل يرضون

تغير ..يبويه وضعي من بعدك
تغير ..اوچلمة ريت متردك

لو رد الفگدته
بجروحي حضنته

***
لحضان المنيه رفرفت روحي
من لمن تنثّر بالوجن موحي
صحت ياحسرتي من ارتفع نوحي
مع اهلي تسافر باقي اجروحي

تحتم ..رحيلي وانختم يومي
تحتم..اوصفت للعايله اهمومي
اومن اسمك ذكرته
بجروحي حضنته
***


عادل العبد الله

https://t.me/adela313
الفاتحة لروح من علمتني الخدمة الوالدة *آمنه العبدالله*

٢-١٤٣٦هـ باز کردن / نظر دهید

2022-08-28 23:12:05 #السيدة_رقية عليها السلام
. . .
ها رقيه اشلون ؟..طعم المنيه؟!
ارتحتي لو بعدچ؟!..عندچ اذيه؟!
***
يبنت احسين.. إلچ گلبي انچوى
ومن شفتچ.. صعب أشتم هوا
وعلى موتچ ..اظن غاب الضوا
واظن باقي .. جرح ماله دوى

أسألچ وآنه ..ادموعي جريه
ارتحتي لو بعدچ؟!.. عندچ اذيه؟!
***
عجب ميته.. بحضن راس العُلا!!
و صحت بسمچ.. وانا همي اعتلا
شكيتي احسين ..كدرنا والبلا؟
شكيتي له… فعل شر الملا؟

من ضرب كل سوط ..نلگه الرزيه!!
ارتحتي لو بعدچ؟!.. عندچ اذيه؟!
***
حچيتي له.. علامات القهر!!
درى بيها..لوّن مخفي الخبر؟!
لوّن يدري .. حچه ابنزف النحر!!
اومن اعيونه .. يصد ليچ ابنظر!!

ولو صرخ چا گال.. بنتي رقيه
ارتحتي لو بعدچ؟!.. عندچ اذيه؟!
***
ترى الدنيا.. صفت لچ مظلمه
وإلچ تنصب…حزنها فاطمه
وجمر تنزل ..دموع البـلسمه
ولا عجبه.. تهل بسمچ دمه

وصاحت الاكوان.. شنهي القضيه؟!
ارتحتي لو بعدچ؟!.. عندچ اذيه؟!
***
اذا شفتي.. ابجنانچ بوعلي
دَگولي له.. گلبنا يصطلي
وخل ينظر. ابخرابه ننولي
عطف ماكو.. وألمنا يعتلي

وتعتلي الصرخات.. صبح ومسيه!!
ارتحتي لو بعدچ؟!.. عندچ اذيه؟!
***



عادل العبد الله


https://t.me/adela313
الفاتحة لروح من علمتني الخدمة الوالدة *آمنه العبدالله*


16/11/2015 باز کردن / نظر دهید

2022-08-28 23:11:03 قصيدة عن #السيدة_رقية عليها السلام

مشتاگه أشوفك واغفه بحساسك
واريدن كل جمالك مو فقط راسك

بويه حن عليه
هاي آنه رقيه
***
يمن بسمك عشت كل لحظتي اويومي
واشوفن صورتك في صحوتي اونومي
وتاليها ابقهر تتحرگ اهدومي
وعلى حزني تون يالغالي انجومي

أحاچيك ابجروحي واهمل العبره
يمن بمصيبتك اتنفس الحسره
ماتنشد إليه
هاي آنه رقيه
***
شسولفلك يبويه ابحالي وشلوني
وانا صبغ الرماد امغيّر ابلوني
ومن هضم السبي امورمه امتوني
ريتك يمي بس اتخفف اشجوني

اتحسس هوا عطرك يبويه احسين
وابطول التعب مگدر اغمض العين
والحاله شجيه
هاي آنه رقيه
***
معذوره عيوني الـ شخصك اتساهر
وعنك لمن أسأل گالو امسافر
وابشوگي عليك اتفطر الخاطر
يا وكت الأشوفك هسه لو باچر

مخنوگه اظل لو ما اشوفنك
وتعرفني اريدن بس ألمنك
تدري باللي بيه
هاي آنه رقيه
***
ياللي ابأسمك اتنامت رياحيني
علامه بس ردت من الله ينطيني
على كوكب حنانك تكتحل عيني
ولا اشوفن كدر بيك اويأذيني

اريدن تستراح ابنظرتك روحي
واكمّل يالأبو وياك كل بوحي
يالشمسك مضيه
هاي آنه رقيه
***

اخر لحظه ماچانت على بالي
يجيبو لي جمالك بالطشت تالي
وتمنيتن اشوفك كامل اگبالي
ظني خاب لن راسك تراوالي

غفيت آنه اعله راسك واشبگ احلامي
النفس بيه اختنگ وانعدمت ايامي
معلومه القضيه
هاي آنه رقيه
***
عادل العبد الله

https://t.me/adela313
الفاتحة لروح من علمتني الخدمة الوالدة *آمنه العبدالله*


4.11.2016 باز کردن / نظر دهید

2022-08-28 22:06:17 نامت بالخرابه نومة الموت
يريت الها يبوها اتجيب تابوت
اهوايه آذوها أميه
شيّع ابچفك رقيه
---
ابنيّتك يحسين عانت..من بعد يوم المصيبه
ظلت اتناديك بويه.. والگلب شاجر لهيبه
مادرت جسمك توسد..اوشيبتك صارت خضيبه

نيران تسعر بالگلب..ازغيره اوتلاگي چم ضرُب
اهوايه مترحمها النُصُب..امن الحصل صارت كئيبه

تسأل عنك اوهم تبدي لونين
ابكل خطوه تنادي آه يحسين
ياوسف جتها المنيه
شيّع ابچفك رقيه
---
يبواليمه عن رقيه .. لازم انگول الحكايه
من بعد ديرة الكوفه .. دخلت الشام الرزايا
الحيل منها ويلي منهد..ولاحظت يمها السبايا

محترگه من عدها الجِدَم..چن نابت اعليها سهم
اولو تشهگ اتحس ابألم..آه من عظم البلايا

ماتنظر يبوها اشصار بيها
من ضرب العدا زرگه ايديها
اشكثر متحمله الرزيه
شيّع ابچفك رقيه
---
امن التعب تدريها نامت..رادت الراسك تشوفه
حلمت ابحلم الحسافه..والوضع بدل ظروفه
شافتك مدمي ابجراحك.. حضنك امحاله تعوفه

حسره عليها هالحلم..شافت جبينك منهشم
اوجرحك أبد مايلتئم..اوجسمك امبيّن خسوفه

مو كافي العدا داسوه صدرك
هسه اعله البِنِت لازم تكدرك
عجبه سموها سبيه
شيّع ابچفك رقيه
---
امن الحلم فَزّت رقيه..اتنادي بويه الغالي وينك
جابو العدوان راسك..لحظه بس تفتحها عينك
عاين الحالتها تبچي..ليها يتعالى ونينك

ذبلانه من گد القهر..اوخدها يواليها انسطر
اعليها العدو وشگد جِسَر..يضرب ابثمرة سنينك

ماخفّت ترى من البواچي
تگلك سلّبو حتى التراچي
تسمع الونه شجيه
شيّع ابچفك رقيه
---
حضنته راسك اوماتت..والجروح اهواي بيها
واعتلا صوت المناحه..عيلتك تبدي نعيها
واختك المقهوره زينب..اعليها هم زايد بچيها

انهض يبن خير العمل..حطوها فوگ المغتسل
اومنها الجسد ويلي انتحل..ازغيره ياويلي عليها

راحت هالعزيزه اوجلبت اجروح
اوليها بالمجالس نرفع النوح
بالله يا ابن الزچيه
شيّع ابچفك رقيه
---

عادل العبد الله
9/9/2021
https://t.me/adela313
الفاتحة لروح من علمتني الخدمة الوالدة *آمنه العبدالله باز کردن / نظر دهید

2022-08-25 16:36:27 قصيدة عن السبي السيدة زينب عليها تخاطب اخيها الحسين عليه السلام

يحسين إلك احمل صور.. مافارگت عن بالي
منها السبي اوضرب العدا ..ريتك تشاهد حالي
آه بحشاي... وين ولياي ..جرحي لهاب
----
خويه احچيلك همومي ..اوعن قساوة ال اميه
امشي ويديه اعله ضلعي..خايفه ايكسرونه ليّه
اشما أگولن آه خويه..دمعتي ابخدي جريه
اولمن اعثر يسطروني ..ابخدي مثل امي الزچيه

اتنفس آلالام اوكدر..كل ليلتي وانهاري
مامره غمضت الجفن..وابصدري وَجّت ناري
دما اجري..زاد كسري..يغلى لحباب
----
ذبلت اورود المعزه..وانكسر غصن المهابه
اوشاب شعري ويلي خويه..اوزاد دلالي التهابه
روعوني واشتموني..چني مو بنت النجابه
ابليا رحمه دخلوني..بالمجالس بالكآبه

ما چانت ابفكري أبد..ادخل مجالس فجار
واعليه اشكال البشر..تلگاني من دون اخمار
صار وضعي.. دايم انعي..والگلب ذاب
----
ريت ترجع عدل خويه..وتمسح الدمعات مني
السلاسل بيه تجرح..مو كفى الضربه اعله متني
الهوا الأشتمه يچوي..فوگ هذا عِلا وني
دوم اتذكر جروحك ..وآنه ظهري صار محني

ظلي يشوفونه العدا.. ماترضى ياخويه احسين
واتسمى مسبيه عجب..ماچنت أنا ابوسط العين
حار عقلي..وين أهلي ..ماكو اجواب
----
اصرخ ابصوت المذله..دوم روحي بيها حسره
ش المصيبه اللي دهتني..خلت الدمعات حمره
ريت ما چان اعله بالي..بالطشت راسك انظره
يضربه الطاغي ابعصاته.. والثغر منك يكسره

بيّه علامات الهضم..ويايه دايم تسري
تذبحني بالمية جرح..واتمنى تخطف عمري
لاح حزني.. زاد وني..يبگه ما غاب
----
لمن اسكنت الخرايب..لحظه ماغمضت جفوني
وآنه من اذكر مصابك.. آل اميه يضربوني
ما إلي والي وحيده ..ياحسافه عذبوني
اگضي كل لحظه نياحه..اوليك ابث خويه شجوني

فرض الحزن ما ينتهي ..كل لحظه يرجع عندي
والدمعه مني چالجمر..تحفر علامه ابخدي
آه عيني.. تچويني..بعد لطياب
----
عادل العبد الله
https://t.me/adela313
الفاتحة لروح من علمتني الخدمة الوالدة *آمنه العبدالله*




11.10.2017 باز کردن / نظر دهید

2022-08-25 16:33:29 ضحكات الشماته رافجتني
اومن ابچي العدو ايورم لي متني
ابهالبلوه نحيله ..ماچني العقيله
---
ماچني أنا المهيوبه زينب
اصير ابمجلس الشامات انحب
واشوف ايزيد واگليبي ايتعذب
يضرب راس اخويه ابحاله تصعب

اويلي ابضربته غيّر جماله
اومو كافي يدوسنه ابنعاله
أصيح اومالي حيله ..ماچني العقيله
---
متگيده ابألم كلهن ايديه
او يسموني ابجرأه الخارجيه
واگبالي يسبون الزچيه
وابگسوه يضربوها رقيه

ردت احمي الحرم بس مالي گوه
وألاگي السوط بمتوني ايتلوه
والمدمع اسيله.. .ماچني العقيله
---
مهو بالبال اوگف بين لجناب
وانا لمخدره بت داحي الباب
انخه ابكل ألم مالاگيه اجواب
واتمنى انا ايغطيني لتراب

اتجرع هضم ويه المآسي
وادري امصيبتي اتهد الرواسي
مصابي من مثيله..ماچني العقيله
---
يگعدوني ابخرابه اشگد عجيبه
واباتن عالرمل وش هالمصيبه
واگليبي يظل يسعر لهيبه
وانا العباس ما اگدر اجيبه

لوّن عايش ابوفاضل ميقبل
اخته بالخرابه ايكون تنذل
لچن مالي وسيله..ماچني العقيله
---
دهتني هالمحن واشلون اصابر
وانا عزي انفگد من يوم عاشر
اوصفيت ابكل مسا ابحسره اساهر
غريبه ياوسف مكسوره خاطر

صفى عمري قهر من بعد لحسين
اوگضيت آنه الوكت بس اهمل العين
مجروحه اوعليله ..ماچني العقيله
---

#عادل_العبدالله
#دخول_الشام

16/09/2020
https://t.me/adela313
الفاتحة لروح من علمتني الخدمة الوالدة *آمنه العبدالله باز کردن / نظر دهید

2022-08-25 16:31:07 #ليالي_السبي_دخول_الشام

آنه بنت المرتضى..الكله مهابه
اشلون من جور الزمن ..ابگه ابخرابه
----
ماهو ابالي ابخرابه..بيها انهان
اعليه تتفرج شماته..اعيال شيطان
وانخه بس محد فزع لي ..من الوليان
اوياوسافه والگلب..زاد التهابه
----
لو اصيح اعليه تلتف ..ال اميه
گوه تضربني ولا عدهم حميه
اوفوگ هذا صارو ايسبو الزچيه
وخاطري اشگد بالقهر زاد انتحابه
----
كل عدو يجرحني ياويلي ابكلامه
ها سبيه اگبالچ اذبحنا الكرامه
اوجبنا لخيول اوكسرناها عظامه
اومن كلامه چني مو بنت النجابه
----
آنه من ليل احدعش ماشايفه النوم
يفز گلبي اويشتعل من گد لهموم
اوتنحب الحزني الكواكب ويه لنجوم
ولمن اذكر بوالفضل ابچي لغيابه
----
ناري ماتطفى عگب نار المخيم
اومتني من سوط العدا حسره تورم
كل صرح مني بعد عزي تهدم
وحاوطتني ياخلگ كل الكآبه
----
صفر وامحرم شفت منهم مآسي
منهم ابكثر المصايب شاب راسي
اوحزني لحسين السبط صاير اساسي
ابلانهايه انتحب دوم لمصابه
---
عادل العبد الله

٨.١٠.٢٠١٨
https://t.me/adela313
الفاتحة لروح من علمتني الخدمة الوالدة *آمنه العبدالله* باز کردن / نظر دهید

2022-08-23 03:02:33 حزنك أجل من يعقوب..اودهرك أشد من دهره
---
يلحزنك ايهد الصخر ياسجاد
عايش حياتك يالولي كِلها احداد
عالمنذبح ظامي اوذبل منه افاد
ابصبرك تعلّم ايوب..اگبالك يضيعن صبره
---
صبر الصبرته سيدي ماله احدود
وامصيبتك هزت اصحاب الأخدود
ايلين الحديد الله يريده الداوود
اوليك الحديد انته اگيود..سبحه اونزيفك حسره
---
كلشي ابوجودك سبّح ابهم اوناح
اويبچي اعله روحك سيدي كل مصباح
يامن على سبط النبي شفت اجراح
شفته جسد دون الراس..تزحف خيول ابصدره
---
لو شايفه نوح النبي ايموت ابهم
طوفانه ماي اوانته طوفانك دم
واتهز نزف ماتگوه هزه مريم
تلگه رؤوس اعله ارماح..اوعيسى جفونه حمره
---
جرحك يبوالباقر شبيه الحيدر
عاش الحزن كل عمره ينعى الكوثر
مثلك لگه ضلع اوطفل امعفر
مثلك حفر خده ادموع..اوگلبه اويه گلبك جمره
---
جدك علي وانته علي شفت اوجاع
عمْتَك شِفتها واسمَعِت عزها ضاع
بعد الگمر أصبح گلبها مرتاع
اوتدخل مجالس فُجار..معقوله بنت الزهره
---
كلها حياتك سيدي من عاشور
اولاشك دمعْتَك سالت اوچنها ابحور
انته اللي وزعت الحزن بينا ايدور
وانته اللي أسست النوح.. بينا بگه ابكل ذِكرى
---
عادل العبد الله
23/8/2022

https://t.me/adela313
الفاتحة لروح من علمتني الخدمة الوالدة *آمنه العبدالله* باز کردن / نظر دهید

2022-08-23 02:50:07 مصحفك طف الرزايا
ايرتل آيات السبايا
حُروفه من دمِعْتَك
يسولف عن حسرْتَك..يسجاد..يسجاد
---
يلمصحفك بالألم.. باقي حنينه
يحچي سوالف ضِما..ابعينك رهينه
اومن جاري دمعك صرخ..عالي ونينه
اشيسوى العمر للذي.. ذبحو حُسينه

المُصحف الصار ابعيونك
صفحته تفتح شجونك
تِفَجَّع ابفجِعْتَك
يسولف عن حسرْتَك..يسجاد..يسجاد
---
دامي بگه مُصحفك.. يلمحني ضلعك
اومن يذكر العلگمي..يتجاره دمعك
يمه گمر منخسف..دايم يفجعك
من عگبه شفت الهضم.. واشلونه وضعك

تصفج اچفوفك يسجاد
اومنك اشگد ذاب لفاد
صرخ ويَّه صرِخْتَك
يسولف عن حسرْتَك..يسجاد..يسجاد
---
يذكر مُصابك عجب..من حرگ لخيام
اولمن رحت بالسبي .. للكوفه والشام
ابعينك نظرت الحرم..سهرانه متنام
ايلوعها سوط الشمر..تتنفس آلام

يروي عن جزء الخرايب
اوكل سطر منه مصايب
يشب دايم جَمُرْتَك
يسولف عن حسرْتَك..يسجاد..يسجاد
---
يروي يزين الملا..ذيچ المسيه
حين الشفت عالطشت..أختك رقيه
هيّه اعله راس الأبو..ماتت شجيه
اوجمرة فگدها تظل ..تسعر لظيه

مصحف الحسره ابلسانك
يحچي عن واقع كيانك
يجر ونه اعله ونْتَك
يسولف عن حسرْتَك..يسجاد..يسجاد
---
يلمصحفك يالولي..يبچيلك ادموم
ناذر مع كل زمن ..يتجرع اهموم
يصرخ يشبل الطُهر .. دسو لك اسموم
چن المنايا فقط… بس ليكم اتحوم

مُصحفك بآلامه دايم
واسى أم الحسن فاطم
بچه دوم العبرْتَك
يسولف عن حسرْتَك..يسجاد..يسجاد
---


عادل العبد الله
23/8/2022
https://t.me/adela313
الفاتحة لروح من علمتني الخدمة الوالدة *آمنه العبدالله* باز کردن / نظر دهید