ابليل الوداع ملتمة العايلة ~~~~~ زينب  للحسين   مهمومة   إجت | الشاعر احمد عباس الحساني

ابليل الوداع ملتمة العايلة
~~~~~
زينب  للحسين   مهمومة   إجت
تودع   إخوها   شبگتة    وبچت
اعليها المصايب طاحت وانحنت
اتگلة  يانور  النظر   حاچيني
احسين باچر وحدي لتخليني
وتنگطع  كل الدروب  ابعيني

ابليل الوداع ملتمة العايلة
~~~~~
او راحت  لخوها  عباس  الشهم
تودعة   او تگلة   يا  فخر  الزلم
ما  قصرت   لا    خوية   والنعم
شلون  لو باچر  متت  يالغالي
ياهو بعدك خوية يرحم حالي
وانت  بس   انت   ترة  كفالي

ابليل الوداع ملتمة العايلة
~~~~~
رملة  اوية  جسّام  والحنّة  دمع
رملة  اعلة  بنها  مكسورة  الضلع
والتشعل  ادموع ما تشعل  شمع
ودعّت  رملة  ابنها  القاسم
وتندعي  يارب  تردة  سالم
وگلها لحسيني تراني خادم

ابليل الوداع ملتّمّة العايلة
~~~~~
عبدالله   والماي   سالوفة   حزن
اتسولفهة  إمة   لو  صب   الجفن
تودع  طفلها    ويم   مهدة   توّن
گابلت  مهد الطفل  تحچيلة
موادع ونوح  وحزن هالليلة
اللمة بس هاية التُمر عالعيلة

ابليل الوداع ملتّمّة العايلة
~~~~~
الأكبر   ولحسين    توديع   ابعطش
ضم دمعه لحسين بس گلبة نخمش
چفة  اعلة   گلبة   والچف   ارتعش
وّدّع  ابنة  وچنة فاگد  روحة
احسين كلساعة تزيد اجروحة
وعينة من كثر البچي مجروحة

ابليل الوداع ملتّمّة العايلة
~~~~~
أصحاب  لحسين  واحدهم  بألف
عابس وهب  جون بن ظاهر كلف
لاگاهم  احسين  بس  گلبة   يرف
آخر  اموادع  وداع  أنصارة
احسين  وبگلبة  توجر  نارة
تشابگو بس  الدمع  يتجارة

ابليل الوداع ملتّمّة العايلة
~~~~~
أحمد عباس الحساني