2022-08-01 03:24:25
#قصيدة_رئيسية
#لأم_البنين_عليها_السلام
ميّت على رموشي الضوه
فتّح عيوني بكلمه
ولو ما تجي، بچف الهوه
وديلي بس (يا يُمّه)
يا أغلى من عيوني
حرگتني نار ضنوني
وديلي بس (يا يُمّه)
ــــــــــــــــــــــــ
آنه لا مو أم إخوتك.. آنه أمك
الفارَگتني وما يفارگ صوتي، اسمك
حتى گلبي مات بعدك.. مدري يمك؟
وليلي يسأل نجمه نجمه، وينه نجمك
قبلك ولا چنّي شفت
ولا جربتهه الفرگه
يا يُمّه هسه آنه اعرفت
بالمغرب وبالخنگه
كل مغرب يگبلوني
حرگتني نار ضنوني
وديلي بس (يا يُمّه)
ــــــــــــــــــــــــ
كلشي مات بگلبي وإنتَ الباقي تنبض
ولُو هَوه ايحرّك ابابي، دموعي تركض
عيوني مو بالنوم، بشلونك تغمّض
والنفس بعدك بصدري واگف يرض
وانتظر واعرف ما تجي
إنتَ عدل وانعالك
وارجع اتعوّذ واندعي
باسم الله واتفدّالك
بذاك الفله يذبحوني
حرگتني نار ضنوني
وديلي بس (يا يُمّه)
ــــــــــــــــــــــــ
كلشي ما ياخذني منك بس صلاتي
وصار اسمهه (حسين) يا يمّه (حياتي)
ابّالي بس إنتَ وتسلطت إعله ذاتي
حتى ما ظل شيء بعد عن ذكرياتي
يا عالمي وهذا العمر
من (حاءك) لحد (نونك)
آنه السمه وابني الگمر
الكون نخلق لعيونك
ولولاك ميعرفوني
حرگتني نار ضنوني
وديلي بس (يا يُمّه)
ــــــــــــــــــــــــ
آنه أغبط أم وهب يمّك تقاتل
تشيل عامود الوفه، بنص الجحافل
وَلَو عامودي آنه بالطف أبو فاضل
من يطب، الجيش يصبح (سلف شايل)
أمنيتي أصبح خادمه
وأمنيتي هاي الأغله
آنه بحياته وينكتب
اسمي وحبيب، يسجله
الخادمه يسجلوني
حرگتني نار ضنوني
وديلي بس (يا يُمّه)
ــــــــــــــــــــــــ
تدري أخاف عليك من حر الصحاري
شلون لو گالولي فوگ الرمله عاري
عيالك بلا خيم باچر بالبراري
باچر اركضلك ويحرم حتى داري
من المدينه لكربله
باچر تفرفرح روحي
ولو جدمي ما يوصل الك
يعثر تره بجروحي
بنهرين ميطفوني
حرگتني نار ضنوني
وديلي بس (يا يُمّه)
ــــــــــــــــــــــــ
أحمد هادي الشمري
158 viewsedited 00:24