#كعدة_للقاسم ع يالرحت صوب المعاره وصولتك صارت لغز هاك اخذ كل | الشاعر عمار العيساوي الكربلائي

#كعدة_للقاسم ع


يالرحت صوب المعاره وصولتك صارت لغز
هاك اخذ كلبي حرز
انتصارك .. بانتظارك .. يالتقدم ركبتك
. . . . . . . . . . .

يل على امتونك اجعودك وانت كاصد للمنيه
ما يهز كلبك عددهم ولا تهاب اجيوش اميه
طالع بمبدأ عقيده وبسملاتك توعويه
من منطلق ترك العرس
لكل شاب وضحت الدرس
عالدين ما تنعز نفس .. نصرة الدين الهويه

الدين من طالب مناصر وابو اليمه اتكفله
وانته يبني فدوه له
بسفك دمك .. ويه عمك .. يالتقدم ركبتك
. . . . . . . . . . . . . . . . . .

طالع وماخذ فؤادي ومهجتي ودمك دمائي
يالضويت ابليل فكد الحسن جن كمره بسمائي
اليوم قدمتك العمك يبني يا جاسم فدائي
يالساكن ابريتي هوى
ذكرك على جروحي دوه
بموادعك كلبي انجوه .. وصار حزني كربلائي

يلي ماخذ حتى شوفي وخذت عمري وبسمتي
جنت كلشي بدنيتي
انته روحي .. ودوه جروحي .. يالتقدم ركبتك
. . . . . . . . . . . . . . .

يولدي كل شاب لأهله ذخر والنصرة عمامه
وعمك المعصوم واجب تفدي يبني بكل شهامه
واخذ سيف الحسن بيدك وعلى الجيش اخذ الزعامه
عويناتك أمن اتصد الي
جنها تكلي اتدللي
من تبرز بهيئة علي .. وهيبته وجفه وحسامه

من صفات الحسن يكرم وانته يوليدي اورثت
بروحك اليوم اكرمت
دمعة امك .. حرز لاسمك .. يالتقدم ركبتك
. . . . . . . . . . .

بدر وجهك يبني تمم كمر اربعطعش عمرك
زغير بس صبرك جبير وفاق صبر أيوب صبرك
من شفت دم علي الاكبر سال يا جاسم ابكترك
ومن شفت جثته اموذره
وصرعه العمام اعله الثره
الكل منهم انحز منحره .. وبالاثر يوليدي نحرك

بَسمَل ورَتل يمينك على الجيش الواقعه
يل يسارك قارعه

يا دلالي .. اشيصفه حالي .. يالتقدم ركبتك
. . . . . . . . . . .

بين صفحات النوايب دمعه سجلتك يجاسم
وانته يبني امسجل اسمك فوك صفحات الملاحم
ودمك الثوري البطولي لكل عقل واعي يلازم
كل شاب لو رايد عِبَر
بيها منافع للدهر
للتضحيه ايقدم مهر .. مثل صينية القاسم

يلي كاصد للمنيه بوجهي بعدك مبتسم
بالوضع عندك علم
انته كلبي .. وسهر تعبي .. يالتقدم ركبتك
. . . . . . . . . . .

خادم اهل البيت عليهم السلام
عمار العيساوي الكربلائي



#لك_الفداء_سيدي_اباعبدالله
#خدر_الفواطم_لنشر_القصائد_الحسينيه

____
لمن يجد صعوبة بالحن اطلبه من



@moatmed2