علي ياهو اليشبهك حته تنقاس علي كلهم شويه واسمك هواي ياهو الما | رائد الناشي

علي ياهو اليشبهك حته تنقاس
علي كلهم شويه واسمك هواي
ياهو الما احتازك خاطر نگول
ومنو الما ناشدك شتگول مولاي
يبو راي الصواب اليمك الشور
فشل تتساوه وي المالهم راي
قالع باب خيبر ساعة الغيض
بس باب اليتامه اتدگه بهداي
وتحجي بصوت ناصي ويم الايتام
بلا زحمة علي گليلهم جاي
جبتلهم اكل خاطر يسكتون
واذا ترضين عود اخذهم وياي
مدنگ مستحه و تخضر الگاع
من گد ما تنگط گصتك ماي
تضحك بالحرب وتصلي بدموع
بس فهمنه هاي شجابها لهاي
تغضب .. حدر جدمك ترجف الگاع
ترق ... جدام صوتك يخجل الناي
متت جوع ورعيتك ناسيه الجوع
سالفتك تره توگف العكل هاي
علي فاقد الشيئ شلون يعطيه
بس عندك شفتها انوجدت هواي
معلوم التراب نشوفه  لاشيئ
وابو تراب  الوجود يگله مولاي
علي بشخصيتك شگد جامع اضداد
شمس نلگاك وانت بكبرك فياي