2022-08-01 04:14:45
السلام على جليسة الديار الخاليه...
_________
يسئلوني عليك... وأنه اسأل حلمي واجاوب.... واحجيلي طيوف
يسئلوني عليك... وأنه وي اضنوني احارب وتهزمني طفوف
وابقه انه البدارك بجت امن الليل لليل
وحتى الرسايل ما اجت من روّح الحيل
ومناشد الناس الصعب يحمل هظم ويل
وتذبحني چلمة ما اجه وتلفيني الخيل
ودمعاتي بالعين...ترجعني للوين؟؟
ويبقى السئل..ينگل زعل...يم گلبي يحسين
وأيام... وأيام.. والهم يعاود
واحلام.. وحلام.. للدم تگاود
..........
ياخذني واجيك... (طاري انته) اسمعه تعالي... وركضلك اجيت
ياخذني واجيك... ويتواره ابهيمه خيالي.... وبحسره بجيت
وتردني صحره والعطش ايگاود الروح
وانه ابخيالي وتيهت وبلهيمه دم يفوح
واركض وطيحن والرجه ماشوف مذبوح
وارجع لعد داري ابتعب ومحملّه النوح
وانه ابخيالي....متردّي حالي
شحال السحگ..طف وشهگ...ورايحله غالي
وأيام... وأيام... نوحي يزاود
واحلام... وحلام.. للدم تگاود
.............
سهرني عذاب... شما غمض عيني اشوفك.. وتضحكلي واكوم
سهرني عذاب... و ابسهري تمرني طيوفك.... وعن نومي أصوم
وأنه أعله أذآنك عودت إفطاره نومي
وهسه بغيابك يا هني كبرت هدومي
نحلانه حيل ابفرگتك وللماكو اومي
هلبت خبر منك يجي ويگلي كومي
يا بلكت الله....وتردلي غفله
وبيدك يرد...عمر الورد...ويضحكلي عبدلله
وأيام... وأيام... لخبارك أناشد
واحلام.. وحلام.. للدم تگاود
........
بأحلامي اروح... يم طفك اذبني رساله... وتقراني النار
بأحلامي اروح... وخنصر يعرضلي خياله... ويكتبلي الصار
بالدم على اتراب الهظم خطالي جلمات
بس ابتدّه اوف ابحرگ جنح الحمامات
و رد يكتب شلون الورد بالهيمه من مات
ومالحك ايكمل رسم وانباگ لجمات
وصار التسائل...يم گلبي كاتل
وصار الحلم...يبجي هدم...ما ردله سائل
وأيام... وأيام.. عل الخنصر اراود
واحلام.. واحلام.. للدم تگاود
..يابويه يحسن
..........
موعدله واموت... لو ذكره حبيبي تجيني ... وادفني واجيك
موعدله واموت.. وچادر فاتحتي ونيني... وتعزيتي عليك
الميته انه والحزن كله أعله فگدّك
گلبي عليل اوما حمل صبر أعله گدّك
يمگاود أحلامي أمن أعد ضيمي اعدّك
وما عندي غيرك يالمشو وياك ولدّك
وما ردلي واحد....وهظمي يعاود
وموتي صبح..دم وطفح...وغطه المواعد
وأيام... وأيام..بيهن همي قائد
واحلام..وحلام..للدم تگاود...
.....
........
..........
علي قيس الوريد
83 views01:14