2018-07-17 19:21:30
_ تعي لحدي..
_ اجيت
_ اقعدي..
_ وهي قعدة
_ ايوا.. دفيانة..؟
_ اي دفيانة
_ اممم شو كنت بدك تقلي؟
_ اسمعي وركزي معي منيح..
الله يخليكي ركزي لان بعرفك بس نكون سوا ما بتركزي ابداً طلعي فيي منيح طلعي بعيوني..
أنا من يوم ورايح../ ابوكي.. وامك.. واختك.. واخوكي..
ورفيقك.. وابنك/ أنا كل هدول وقت الجد..
ولعندي بتوجهي كل حياتك.. ماعم تستوعبي عليي ما؟
مخك سميك وهبلة بعرف.. رح بسطلك ياها..
حطي اي شعور بتحسيه بهالدنيا.. وبعدو كلمة(معي)
بتضحكي معي.. بتبكي معي..
زعلانة مبسوطة مالة مكيفة قالبة بوزك حردانة جانة
طاقق عقلك مرتاحة شو ما كان صاير معك بتعيشيه معي وبس
ولي دبة.. مركزة معي؟ خليكي هون..
بس تحردي انا براضيكي..
وبس تزعلي انا براضيكي..
وبس تبكي انا بضحكك ..
وبس تحنتري انا بصالحك..
وبس تبوزمي انا بشدلك خدودك لفوق وبيصيرو هيك
ووقت ترفعي حاجبك.. انا بنزلك ياه
وقت تملي دقيلي.. قليلي اتروك من ايدك وتعال
انا دايق خلقي.. وقت بتتعبي اندهيلي
كل الدنيا من بعدك شو بدك بهالدنيا اطلبي
بس نروح مشوار لا توفري شي..
كل شي بتلمع عيونك لما تشوفيه اشري عليه
حتى لو ما اقدرت اشتريه بوقتا
بس اجا وقتو بتلاقيه عندك وبكرتونة مع اعتذار ع التاخير بسبب الازمة الاقتصادية
ليكي انا ما بيهمني اذا بتعرفي تطبخي
بس بدي تطبخيلي هادا الشعور تبع مرتي الهبلة
حرقت الطبخة وضلينا بلا اكل انا بحبو..
اصلا رح نقضيها اندومي وبطاطا مقلية والله بعرف
اخترتك شريكة حياتي واميرة ببيتي
انا مو جايبك لفّاية ع البيت
هادا بيت من شخصين.. يعني كل شي فيه ع تنين..
يلي بدو يغسل تيابو بحطن بالغسالة..
الجوعان بيعمل اكل للتاني.. يلي بيوسخ بينضف
يلي بيعجق المطبخ بيجلي وبيزبط..
ويلي بيخرب بيرتب.. ويلي بيصرف جرة الغاز هوي بدو يركبا
بقا اتعلمي كيف بيركبوها
والله الظاهر مانك عم تسمعي
بتضلي جدبة
_ لك لاااا عم اسمعك.. فهمت كلشي من نظرة عيوووونك
_ مجنونة...
_اي واذا.. بحبك
#عم_بحكي_علحب_نفسو_هون_لحب
#ARMANDO
111 viewsارمــ๘ٌ๋ـانـٌـৡـدو Ẫ℟ṂẤŅĐỖ, 16:21