2022-07-31 17:54:43
انا مسافرها وحان الوداع اوياك
وما معلوم ياعباس نرحل وين
اجيتك والعبايه السوده كلها ارماد
ودخان المخيم لف عباتي زين
بشوف العين حسبتك قريب اهواي
اجيتك بس اجيت انا بالف يحسين
خوف وليل وعيون الشماته تلوح
وعثرات المسافه ياچفيلي اونين
وزعت الصبر خويه بطريقك حيل
وسرع بالمشي ولتف يسار ايمين
اخاف امن الشمر ياخويه شايل سوط
ما ظل حيل وشگف سوطه بالايدين
امتوني الباسهن لمن صرت جبريل
تاليها يخويه ايورمن المتنين
خيالي الما تعرفه شلون چان الناس
تاليها اصيرن فرجه للماشين
چنت وياك مهيوبه وحجابي الليل
گوم وشوف ياعباس ذبني البين
چنت من ترمش اگبالي احس بوداع
وتطيح ادموعي ونته اتمسح الخدين
هسه اشصار اگلك لو دريت اشصار
وحگك من رحت گامت تهل اسنين
صوتي الچان بس امي التعرفه شلون
هسه اشما اونن گالو اخت حسين
اگعد جيت اگلك خويه ياعباس
غريبه اتعوفني بنص العده لاوين
وصلتك وانا گد الماي عندي اعتاب
وانته ادره بعتابي الما اله حملين
شفتك لاچن اعتابي اعله طولك مات
ما فازع عرفتك ليش خويه الحين
نايم والزنود امچتفات بجود
وحچالي الجود قصة گطعة الچفين
يزينب گال عباسچ غيور اهواي
بالچ يالعقيله اوياه لتعتبين
من جاني السهم خر اعله چتفه الماي
انشده باله ولا هموه الامجبلين
ذب سيفه ونزل من مهره يتلگاه
بس اتلگه يازينب سهم بالعين
ما طاح اعله ظهره اعله الوجه من طاح
شاغة روحه ونتي بشوغته اتعرفين
ورغم هل حال يشعر ما وفه وياچ
ها يالحره هسه ابحاله شتگولين
گطع چفينه منچ يستحي العباس
يدري بساعة اليسبونچ اتمرين
يدري بطيحته يازينب اعله النوگ
وي ذباح اخوتچ للسبي ترحين
ما مات بعمود الراس يازينب
اخيچ مات من شم حرگة اصواوين
وسمع سكنه يعمي الماي عوف الماي
اجتنه الخيل ونتي اويه الحرم تبچين
وكتبلچ فوگي من دمه ثلاث حروف
اسف والعذر كوننچ اتقبلين
الشاعر اياد الديراوي
375 viewsاياد الديراوي, 14:54