2020-02-28 16:31:41
#الرسالة_الأخيرة..
مرحبا.. كيفك يا كُلَّ كُلِّي.. بحب ناديلك هيك.. أنو أنا الكاتب وهيك.
اليوم عم اكتبلك بعد مافقدت الأمل تماماً من إنك تردّي عليي.. أو إنو محاولاتي تحرّك فيكي شي.. وصرت حس إنو أي رسالة مني الك عم تكون مصدر ازعاج بدل ما يكون شي بيفرحك..
كنت فكر إنك ماعم تردّي لأنك مضغوطة أو مشغولة بغربتك أو الدراسة أو أهلك او اختك .. طلع لا.. طلع ببساطة إنو ماعد بدّك ياني .. بعرفك من لغة عيونك.. بسيطة.. حقّك.. مافيني خليكي تحبّيني بالزور.. كان كلشي فيني اعملو إني قدملك حالي متل ما أنا وانتي إلك الحريّة تقبلي فيني أو لا.
صحي بالمناسبة لازم اعترفلك بشي قبل ما احكي.. انا متذكر إنك كنتي تحبي الرسائل مني الك.. كنت كتير اتعذب لما اكتبلك .. لما صمملك .. لما لما.. عم تفهمي عليي ما؟
ليكي أنا بعرف إني عصبي كتير.. أنا ما قلتلك أنو أنا عجوز لا يصلح للحُب.. بس شوفي كيف دارت الأيام وطلعت هيك .. بس غلطت لانو ما قلتلك .. أنا بعرف إني مو بس عصبي.. ولساني قاسي كمان بس عصّب.. بس مابعرف ليش ماكنتي قدرانة تفهمي إني ماكنت عصب وضوج غير لأني بغار عليكي كتير.. يعني كيف بدي قلك.. كنت مابقدر اتحمل حدا يشوفك حلوة غيري.. تضحكي لحدا غيري.. تحكي مع حدا غيري.. يمكن مرض نفسي.. بس هيك أنا.
يمكن كنتي تفكري إني أنا مبسوط إني مقصر معك.. أو ماعم ابذل جهد كافي لحتى خليكي سعيدة.. وماني بصدد اشرح شي.. في #الله وكان شايف.
رح خبرك شي.. أنا قبلك كنت بيت مهجور.. تماماً متل القهوة أول ما استلمتا.. بلا لون.. بلا روح.. بلا عرق أخضر.. بلا صوت فيروز.. كنت خرابة.. بس كنت متعايش مع الوضع وقبلان فيه وعم مرق أيام.. اجيتي انتي.. لونتي البيت.. رجعتيلو الحياة.. وصرت اشبهك.. احكي متلك.. استعمل مصطلحاتك.. حتّى اكتب انا وعم استخدم التشكيل.. الناس تفكّر إني لأني الكاتب وكذا متل ماقلت.. ماحدا بيعرف فيكي.. بس أنا كنت بعرف.. وبعرف كمان إني معك كنت رايح عالتهلكة بإيديي.. بس كنت قبلان.. كنت قول العمر بدي عيشو مرة.. وبدي عيشو مع يلي بحبّو مهما كلّف الأمر.
والختيار الذي لا يصلح للحب قعد تحت صورة محمود درويش.. ويضل يقرا.. انتظرها.. انتظرها.. انتظرها.. ومايقلب الصفحة.. لأنو مفكر أنو بالصفحة لي بعدا في :لن تأتِي.
بالعادة لما الناس تحكي معي عن الانفصال.. كنت دايماً قلون : انت عليك تعمل يلي عليك.. ووقت بدها ترجع بتعرف تحكي معك.. إذا كنت موجود موجود.. إذا لا فهيك النصيب.. بحالتي معك انا عم قول لحالي نفس الشي.. بس الفرق الوحيد إنو مافي إذا..
ليكي أوعك لثانية تفكري إني رح احقد عليكي أو اكرهك.. أبداً.. رح يبقى العجوز يراقبك من بعيد.. عم يفرحلك انتي وعم تنجحي بحياتك.. وتفوتي عالفرع يلي بتحبيه.. وعم يشوف صورك هيي وعم تنزل والناس عم تباركلك بالنجاح.. ويمكن وقت تخطبي وتتزوجي رح غص.. مو يمكن.. أكيد.. بس رح افرحلك.. أنا بس بدي منك وقت تختاري هاد الشخص تختاريه لأنك بتحبيه.. لأنو بينحب.. مو لأنو بدك علاقة وخايفة من الوحدة.. اتفقنا؟
وهون.. رجع الختيار أبيض وأسود.. والزريعة يلي فيه غطت حيطانو ودبلت.. بعد ما أيقن أنو طلع فعلاً لا يصلح للحُب.. ومع إنو بعدو تحت صورة محمود درويش.. وبعدو مآمن ب " وإن أقبلت بعد موعِدها.. انتظِرها".. تشجع اليوم وقلب الصفحة.. وبكي عالكرسي تبعو.. لأنو القصيدة ماطلعت "لن تأتِ".. قراها بالخط العريض :
"تُنسَى كأنّك لم تكن"
Abo_Sham
65 views✿الـجـنـرال _ الـحـمـوي✿, 13:31