#الارشاد_الزواجي نصيحة لكل زوجه وزوج ● الطبطبة مش عيب.. ●الكلمة الحلوة مش بتمرِع.. ● الاهتمام مش محتاج مجهود ولا فلوس كتير.. ●بلاش نقف لبعض على الواحدة... ●أحسنوا النوايا.. ●اهتم بالتفاصيل (مراتك / زوجك) التفاصيل بتفرق والاهتمام بيها بيصنع المعجزات.. ●أقوى حب بيموت بالإهمال والشك.. ●العشرة الطيبة ممكن تبقي أقوي في حبها من الرومانسية الغير ناضجة.. ●الحب والمودة والرحمة اللي بينكم مش بالكلام وبس.. أكبر من كده بكتير.. ●نجاح اي علاقة محتاج مجهود من الطرفين.. ●الشكوى من عيوب شريك حياتك الدايم هيزهقه حتى لو معاك الحق.. ●بلاش مقارنات.. ●بلاش دماغ ناشفة وان شريك حياتك يزهق من النقاش معاك.. ●الست الذكية هي اللي عارفه ازاي تكسب جوزها.. ●الرجل الذكي هو اللي فاهم طبيعة الانثي .. ●الغلط بيجيب غلط أكبر منه.. الاحترام اهم حاجة.. ●كبّروا دماغكوا.. ●امدح في مراتك قدامها ومن وراها.. ●اللي مبيعجبوش العجب ده اكتر نوع مزعج في الجواز.. ●الرجل والست بيكملوا دور بعض مفيش حد فيكم دوره مش مهم.. ●مراتك شايلة كتير اوي.. ساعدها على قد ما تقدر.. ●جوزك طالع عينه في الشغل.. قدّري تعبه.. ●النكد بيحول اي بيت لمكان يسد النفس. ●كلمة تسلم ايدك مش صعبة.. ●كلمة ربنا يبارك لينا فيك أو فيكي مش صعبة.. ●الولاد مسئوليتكم سوا من الألف للياء.. ●اسمعها حتى لو كلامها تافه بالنسبالك.. {هو مش تافه على فكرة}.. ●اديله مساحته.. لما بتخنقي الراجل بيبقي قرفان اكتر ومش طايق عيشته.. ●خلي ليكي صحاب صالحة.. بتفرق معاكي اوي. . وانت كمان خلي عندك صحاب صالحين.. ●احترموا بعض.. ●دلعوا بعض.. مش عيب ولا حرام.. دا حتى ف الحلال!! ●هزروا سوا ..بلاش غلاسة.. ●اللي زعلان ميشيلش جواه.. الفضفضة بتجيب من الاخر.. ●بلاش انانية وإن في طرف مستني كل حاجة من التاني.. ●مفيش حد ملاك بس في ناس بتغلط و بتعتذر وبتحسن من نفسها.. ●بلاش دور الضحية.. ممل جدا.. ●التفاهم مهم اوي..اتكلموا كتير.. ●متخليش شريك حياتك يقفل منك ويجيب آخره وانت مصمم أنك تفضل زي ما انت وخلاص عشان السكة دي اخرتها مش حلوة..
