-تعرف يا بليغ انت عامل زي الأطفال ، انت عايش بإحساس طفل !
=إحساس طفل ؟! ياريت .. ياريت ارجع طفل زي زمان أيام ما كان كل حاجة ليها طعم و ريحة و معنى .. دلوقتي ضاعت الملامح و رخصت المعاني ، كلنا بقينا اغراض كل اللي بيننا مفاصل ملخلخة ما تستحملش شدة .. شوفي الناس ، مش ملاحظة فيهم حاجة متغيرة ؟!
زي ما يكونوا مش ناس بحق و حقيقي ، مش سُعدا ، بيصحوا يرخموا على بعض ، صوتهم ز.عيق واللي في القلب مش على اللسان ، لا حد بيحزن على حد بجد ولا حد بيفرح لحد بجد والضحكة مش من القلب والحضن مفيهوش دفا !
عارفة كوز الدرة ده ؟ زمان كنت اشم ريحته من على بعد ، يا سلااام لما امسكه في ايدي و اقطم ، دلوقتي بدور على طعمه مش لاقيه !
راجعين يا هوى | 2022
