مابين الخيم ..حيرة والم..يخواني عفتوني يادوس الجمر..ياذاك الخد | قناة الشاعر ذوالفقار الزيدي
مابين الخيم ..حيرة والم..يخواني عفتوني
يادوس الجمر..ياذاك الخدر.. ياشيبت عيوني
موش انه لركب عالهزل
ولا اني لحتار بطفل
واجفوفي يخنكها الحبل ...حيرة
#########################
عطشانة الشوف حسيني بس ماكو حسين
ماتت جلمة اعلة الساني رجعتكم وين
ماضلت دمعة بعيني وتبجيها العين
ويموت بحسرت رجعة لهلة مغربين
صعدوني النوك وانه اسمي خدر
يحسب للموت لنوله يسر
المكسور اخوان شيصحلة جبر
امشي اوية الغرب ..دمعة وضرب ..ماجني علوية
انه ام الخدر ..وام الستر..يسموني مسبية
يخواني والمنضر صعب
عالهزلة شيخلصة الدرب
وجفوفي يخنكها الحبل ..حيرة
#########################
مروني اعليكم عمداً حتى الكلة الويل
حتى انضر بيكم يهلي شمسوية الخيل
وانه المن حرك اخيامي ضيعت الحيل
وياليل الوحشة العشتة المايشبه ليل
انه امن الليل ماضلي دمع
بخيامي النار وعيوني شمع
وبصدر حسين ماباقي ضلع
ياليل الحزن .. خلة الجفن.. مايغفه من ضيمة
بي خوف ورعب..منضر صعب..من حركة الخيمة
ياعين التغمض الجفن
ساعاتة حزن يجر حزن
واجفوفي يخنكها الحبل ..حيرة
#########################
مروني الشاطي وحسرة دنكت الراس
اواحد من عدهم كلي شوفي العباس
الياس الجنتي اتسمينة مذبوح الياس
وباليسمع هاي الجلمة شتضل انفاس
كلي العباس عالشاطي وذر
خلينة ادماه يم جودة نهر
السهم البلعين ديريلة نظر
رايدني اصد..عينة ابعمد..خاطر يأذيني
نومة كافلي..ومنظر هلي ..نار وتجويني
ايشوفوني بجثثكم وكت
ومن هاية جلمتهم متت
وجفوفي يخنكها الحبل ..حيرة
#########################
الموادع صار وياكم من فوك النوك
وللكوفة وغير الكوفة حادينة ايسوك
والزيّد نار الحركة ابكلبي المحروك
اسمع من عدهم جلمة خل ندخل سوك
انه اوية السوك ماعندي عرف
وموقفنة اهناك يخواني كلف
جفن الموخير للروحة يرف
اسمعهم نوو..واتحضرو.. للسوك ممشانة
كادو هزلتي.. وهل دمعتي.. الذابحكم اويانة
حدايي ذباح اخوتي
هذا الي طيح دمعتي
وجفوفي يخنكها الحبل ...حيرة
#########################
نيتهم شام وننطر دخلت ديوان
وادخل ليزيد ابحسرة ودنية من احزان
دنية وخلت تتشمت بينة العدوان
وصعبة الانسان ايجرحة الماحسبة انسان
ياجرح الشام مامثلة جرح
اتمنة الموت ياموتة تصح
بي يحجي الليل واليبجي صبح
ادخل للقصر..هذا الامر.. نار وشعل روحي
ادخل للنذل ..بجفي الحبل.. يامكبر اجروحي
لو كلي جاوين اخوتج
لوكلي أهنة ابدمعتج
وجفوفي يخنكها الحبل ..حيرة
#########################
ذوالفقار الزيدي
