2022-07-12 13:31:29
كون الدمع رجعلة غالي
جاوين ابوي الما اجالي
ملني الدمع كد ما بجيتة
وموتني حزني ومالكيتة..جاوين الحسين
#########################
خلصان كل حيل الصبر
لحضات الفراك ابعمر
ذبلانة لسنين الخضر.. عالماخذوني
من الباب اعاين للضعن
والنوك لمن كوطرن
حسيت لعيون انعمن .. من ودعوني
شالو اجفوف وسلمو واني المماتي استسلمت
عافوني وحدي ومن مشو ضليت بعيوني التفت
من فاركوني .. راحن عيوني
منجفوفهم تانيت اشارة
وامشيلهم دون استخارة
جان الأمل بس ضيعيتة
وموتني حزني ومالكيتة ..جاوين الحسين
#########################
دنياي شتوة بلا دفو
والراح وين المثلة اكو
والي تعيش بلا ابو .. بت المنية
من دار بيامي الوكت
دورت مثلة وماشفت
كلولة من يوم الرحت ..مشلولة ادية
كلولة لاعين الغفت ولادمعة لتفارك جفن
الجانت تعيش ابسمتك موتهة يحسين الحزن
وكلشي اعلة بالي ..يرسم خيالي
وشلت دمع مابيهة عيني
عل ها يجيني وما يجيني
بل ياعلي اشكد انتخيتة
وموتني حزني ومالكيتة..جاوين الحسين
#########################
بمجانة اكعد وانتحب
وعيون موش ادموع اذب
واصفر مثل صفرت عشب.. عطشانة كاعة
لامن سحابة اتنث مطر
ولا هوة بي حيل الشجر
شيعيشة اذا ساكة انكسر..وانوه الضياعة
من ايهيم كلبي الشوفتة بثيابة اطلع وابقة اشم
وضليت بس رية ونفس وعشت اعلةالله وعالهدم
وحشة الغيابة ..اشتم ثيابة
دلالي يندهني الحنانة
وادخل واصد فارغ مجانة
ايموت السمع حجيي الحجيتة
موتني حزني ومالكيتة..جاوين الحسين
#########################
ايموت الورد من وحدة
لو ما تلاكة وية الندة
ومكطوع من طول المدة.. خيط امنياتي
لامن ابوي ولا هلي
لامن علي ولامن علي
لامن رضيعة الضل الي ..لامن خواتي
اشتاكيت للمكلة وردت ايردون كعدتنة السوة
ويضمني ابوي اعلة الصدر واتنفس اعذيبي الهوة
لامن اجوني .. ولامن خذوني
جرحي الصفة اولام ويطولي
عالا خذوني ولا اجولي
والضاع مني ودوريتة
موتني حزني ومالكيتة.. جاوين الحسين
#########################
دزيت مرسال بضرف
لا ينحجي ولا ينوصف
كل حسرة تتجسد حرف.. من الرسالة
مكتوب اريدك باولة
وتأخريت ابكربلة
مذبوح لو نومة الحلة ..الما ادري حالة
تانيت طارشهم يجي ايكلي بسلامتهم هلج
ويكلي رد كل الضعن وحسين لحضة اويوصلج
من الفركة اعاني ..وضليت اتاني
عالباب ضليت انتضرهم
والعين مشبوحة الدربهم
ليعود لديارة ارتجيتة
موتني حزني ومالكيتة..جاوين الحسين
#########################
ذوالفقار الزيدي
390 views10:31