إستشارة طبية

2023-04-02 19:28:31 كثير تجينا حالات ثأليل ( فالول ) بالمناطق التناسلية والمشكلة تكون منتشرة بشكل فضيع فحبيت اخليلكم بعض النقاط تخلوها ببالكم اذا صار هذا الشي :
١- المرض معدي يعني اذا ظهر عندك لا تتقرب لزوجتك الى انت تلكي حل .
٢- دكول دكتور هو حبوب وطالع واذا انتظر واذا عديت زوجتي شنو المشكلة ؟
المشكلة انو بعض انواع الفالول بالمناطق التناسلية يتحول الئ سرطانات وخصوصاً بالنساء .
٣- دكتور اشو دكول بعض الانواع ليش هو الفالول بي انواع ؟
اي بي مئات الانواع والنوعين ١٦ و١٨ هي اللي تسبب سرطانات بعنق الرحم
٤- زين شلون راح نعرف رقم الفالول اللي عندي ؟
ما راح تكدر تعرف لان رادلها تحليل خاص لمعرفة النوعية وهذا ما متوفر عدنا بالعراق على حد علمي .
٥- دكتور زين الاجانب شلون يحمون نفسهم من الفالول. بهاي المناطق ؟
بالحقيقة بالخارج اكو لقاح ضد الفالول يلقحون البنات بس الابتدائية علمود تنحمي طول عمرها البنت من الفالول
٦- زين شنو الشغلات اللي ممكن تنشره ؟
شغلة مهمة تنشره وهي حلاقة المنطقة بالموس او الشيرة ببدال مو فالولة اثنين راح تصير عشرات فلازم تزيلون الشعر من هذه المنطقة بمكينة كهربائية تخصصوها لهاي المنطقة فقط يعني مو نفسها اللي تزين بيها لحيتك لان راح ينتقل لوجهك
٧- شنو العلاج بلا زحمه ؟
لازم تعرفون هيجي مرض اله طريقتين بالعلاج فقط الطريقة الاولى :
هي انو الطبيب يوصفلك علاج خاص يحرق الفالولات شنو مساوئ هاي الطريقة ؟
المساوئ ممكن انو الشخص يخلي هواية علمود عود يطيب بسرعة وهو راح يحرگ المنطقة وبليه شي هي المنطقة حساسة ادورة بدال ما نعالج فالول راح نعالج فالول وحروق وانسلاخ الجلد وشغلة لخ ممكن تاخذ وقت طويل بالعلاج وممكن متستجيب في بعض الحالات للعلاج ولطالما هي موجودة تكون مصدر للعدوى والانتشار فمجرد لمس الفالول ولمس منطقة ثانية راح نعدي المنطقة الجديدة
٨- الطريقة الثانية بالعلاج وهي الكوي :
عادة المستشفيات وعيادات الممرضين وبعض الاطباء يستخدم جهاز لكوي هذا الفالول للتخلص منه وهذه الاجهزة طبعاً تاخذ وقت وممكن يصير نزف والمشكلة النزف راح يزيد الانتشار يعني تشيل منا ويطلعن منا وممكن تكون اجهزة جراحية قوية حارقة فتترك اثر بالجلد
٩- شنو افضل حل ؟
حالياً دنستخدم بالعيادة الليزر الاصفر او جهاز الايكو والنتائج رائعة جداً لانه بعد التخدير جهاز يكوي الثاليل وبنفس الوقت يمنع النزف يعني ازالة ثاليل زائد دم ماكو والاجراء يتم بدقائق وتخلص من المشكلة بدقائق بدون دوخة واقل عرضه لعودة الفالول..
بعض النساء من يطلع هذا الفالول تروح لطبيبة امراض نسائية فطبعاً الطبيبة راح ادخلها مستشفى وتخدير عام يعني راح تعرض نفسها لمخاطر التخدير وكذلك الجهاز اللي يستخدم بالعمليات هو مخصص للعمليات الجراحية فيكون حارق ويترك اثر قوي فالافضل




.
.
#الدكتور_ياسر_الشمري
دكتوراه أختصاص بالأمراض الجلدية والحساسية وتجميل الجلد
تدريسي في #كلية_طب #الجامعة_العراقية باز کردن / نظر دهید

2023-03-31 22:03:49 باز کردن / نظر دهید

2023-03-31 22:03:44 و ولدتي طفلك
و صرت انت و طفلك وحدكم
و غيرتي ملابسه و خليتيه بفراشه نايم و صافنه على ضحكته و هناك كلتي ويه نفسك ( هاي اني شسويت!!!!)
معقولة اني ادبرها!
معقولة اني صرت ام و راح اسوي المطلوب مني !
صدك راح ادبرها و ادبر الامومه !
هذا الصوت موجود برأس كل أم جديده
برأس كل أم حريصه و ناويه تتم المهمه
هذا الصوت اسمه الشعور بالذنب
و حتى تتجاوزيه هذه النقاط لك :
تاكدي انه انت ما تسوين اي شي خطا !
هذا يستدعي الكثير من المعرفه و الاهتمام
حاولت بكل جهدي و خلال ٣ سنوات اعرفكم بكل شي صح و انه تبعدين كل البعد عن إيذاء طفلك
لا تلومين نفسك لان غسلتي لطفلك مثلا و تمرض لان عمر المرض ما يجي من النظافه
و لا تلومين نفسك لان ما خفضتي الحراره
انت الافضل دامك تسعين للافضل بس سوي كلشي صح
و الا اكيد لومي نفسك لو صدكتي مثلا انه الثوم يعالج ابو صفار !!!
او مثلا لو انطيتي دبس لطفلك و هو بعده عمره ايام و سديتي معدته
او اعطيتي سكوه و صار عند طفلك عجز كلوي
او ظليتي مستمره على النستاكورت اكثر من 5 ايام
و غيرها من التصرفات اللي كتبت عنها بوستات طويله
دائما خلي خطه مضاده للشعور بالذنب
مثلا تنقهرين لان ترحين لدوامك
بالمقابل انت كرري ويه نفسك انه الدوام مثلا هو لأجل طفلك
و انه الشهاده اللي راح تاخذيها مثلا هي لزياده مستواك العلمي
و انه اي خطوه ممكن تشعرين بالذنب بعدها هي لأجلك اولا و لتحقيق هدف اخر
ابتعدي عن من يحسسك بالذنب
اكيد عرفتوا منو؟
من تبدي المعزوفه انه كله بسببك اطلعي من الغرفه و لا تناقشين ابدا
هذا يعادل اقوى رد في العالم
من تحسين بالحيره و انه هل هذا التصرف صح او خطأ فكري بالواجهه الاخرى من الموضوع !
يعني شون
يعني لو اني ما مسويه شنو كان صار ؟
لو اني ما اداوم شون ادبر المصاريف
لو اني ما اخذ الشهاده الفلانيه شراح يصير ؟
اخذي وقت مستقطع مع طفلك يوميا
اخذي راحه و اطلعي ويه طفلك
تنفسي بعمق
و اكلوا بمكان هاديء
و غيري جو
صعبه؟
مجرد ارتاحي و اخذي قيلوله راح تتغير حساباتك بعدها
تذكري دائما
كلنا عدنا تحديات
انت
و زوجك
و ترامب
و اللي دا يكتب هذه الأسطر
كلنا عدنا تحديات
و لازم نخطا في مكان ما
بس هنا لازم نفكر جيدا انه اذا ما مستعده للتحديات ماكو داعي نزيد التحدي تحدي
و اذا كانت امورك صعبه و طفلك صعب ماكو داعي نزيد الصعوبه و نجيب طفل رقم 2 او 3 او 4
نمشي بهدوء و نقرر جيدا و ما نزيد التحديات علينا و على أنفسنا
و شنو يعني اذا اخطئتي؟
لا تظلين تلومين نفسك
اي بالشهر مره او اثنين اطلبي دلفري
و اي صح العياط على الاطفال خطا بس احيانا تعيطين
انت مو من واجبك تتابعين الطفل ٢٤ ساعه باليوم فأنت مسؤوله بقدر والد الطفل عن مراقبه طفلك
هذا لن يدوم للأبد
احساسك بالضياع و الذنب لن يدوم
الاطفال يتغيرون
و طفلك سيتغير
خففي من تحميل نفسك كل هذا
فأنت بالاخير الام
د. سيف سمير البياتي اخصائي طب الاطفال باز کردن / نظر دهید

2023-03-31 22:01:42 ماكو شي اسمه كل ساعتين لازم الطفل يرضع
الطفل يرضع عند حاجته الا في حالات معينه محدوده
بصورة عامه الرضاعه تكون كالتالي
من عمر اليوم إلى عمر الاسبوعين
الطفل يرضع 8 الى 12 مرة باليوم يعني ممكن عادي ينام ٣ ساعات و حتى 4 ساعات
من عمر اسبوعين الى عمر 2 اشهر
يبدي يرضع من 6 الى 8 رضعات باليوم
يعني يبدي يقل و يصير من الطبيعي انه ينام 5 ساعات
من عمر 3 اشهر الى 5 اشهر
تقريبا 5 الى 6 رضعات
و يكعد المفروض مره الى مرتين ليلا
من عمر 6 الى 8 اشهر
يرضع 3 الى 5 مرات و ينام الليل بطوله
من عمر 8 اشهر و اكثر
3 إلى 4 رضعات
بعمر سنة :
يتحول الحليب الى كوب و مرتين فقط اما 2 حليب او 2 لبن او 1 حليب و 1 لبن او 1 لبن و 2 جبن مثلثات
المهم حصته من الحليب و مشتقاته مو اكثر من وجبتين الى 3 وجبات
طبعا التقليل تفاديا لفقر الدم
هذا الجدول يتبع الاثنين طبيعي و صناعي
و مثل ما نشوف كلما يكبر الطفل تقل الرضعات
لان حجم المعده يكبر
و حجم الكبد يكبر اللي هو العضو المسؤول عن خزن الطاقه حتى ما يصير هبوط سكر
و لان معدل النمو يتباطيء فكان يزيد بمعدل 30 غرام باليوم و قل الى 8 او 10 غرامات باليوم
موضوع كميه الرضاعه؟
سهله جدا
شكد ما يريد الطفل
ممكن عمره سنه و بعده يشرب فقط رقمين بس نموه حلو
و ممكن عمره ٤ اشهر و يشرب 8 ارقام
اتبعي احساس طفلك
عززي مفهوم الجوع و الشبع عند طفلك
التربية مو ترضعيه اكثر راح يكبر اكثر
التربيه هو الاهتمام بعقله و تعليمه حتى عقله يكبر
في الاخير عقله راح يقوده مو كرشه
د. سيف سمير البياتي اخصائي طب الاطفال باز کردن / نظر دهید

2023-03-29 15:13:46 يواجه مريض السرطان العديد من المشاكل التغذوية خلال فترة العلاج الكيماوي ، ولكي نمنع عنه الاصابة بسوء التغذية يجب أن نساعده على حل مشاكله مع الغذاء وفقدان الشهية ، اليكم بعض النصائح والارشادات التي تخص تغذية مرضى السرطان والعلاج الكيمياوي :

قد يكون من الصعب التكيف مع الاثار الجانبية للعلاج الكيمياوي ، الا انه يجب أن نعلم بانها مجرد اثار مؤقته ستنتهي بفور انتهاء فترة العلاج.
وما يهمنا هنا مسألة التغذية وفقدان الشهية فموضوع تناول الطعام الصحي جدا مهم في جميع مراحل علاج السرطان ، اذ تظهر اهميته بشكل أساسي في ثلاثة محاور:
1- الحفاظ على رطوبة الجسم ومكافحة الجفاف.
2- تقوية المناعة ومكافحة بعض الاعراض الجانبية مثل التعب والضعف العام.
3-الحصول على السعرات الحرارية والطاقة ، والعناصر الغذائية الضرورية.

واليكم أهم نصائحنا التغذوية التي ستساعدكم في ادارة الاثار الجانبية أثناء العلاج الكيماوي:

1- تناول وجبات صغيرة من الطعام موزعة على طول اليوم وكل ساعتين (6-8 وجبات يوميا) بدلا من ثلاث وجبات رئيسية، فهذا سيساعدك في مواجهة الغثيان وفقدان الشهية.

2- ركز على الاغذية الطرية واللينة وسهلة الهضم ، ومن الممكن دائما طحن الاغذية وتحضيرها باستخدام الخلاط مع مراعاة النظافة أثناء التحضير والتقديم.
هذا سيساعد في حالة وجود تقرحات في الفم وعدم قدرة على هضم الطعام.

3- ركز على شرب الماء والسوائل لمنع الجفاف فيجب شرب 8 أكواب من الماء بالإضافة إلى السوائل الأخرى لتجنب حدوث الجفاف بما في ذلك الحساء والعصائر والمشروبات المختلفة ، مثل : الشاي أو عصير الرمان .

4- للتخفيف من الشعور بالغثيان بالامكان اضافة بعض الاغذية والمذاقات والروائح المختلفة كالاغذية الحمضية والنعناع أو الزنجبيل.

5- يفضل ان لا يتم شرب السوائل مع الوجبات ، وانما التركيز عليها فيما بينها وبكميات كافية ، وابقاؤها في مكان قريب وذلك لمنع الشعور بالشبع المبكر والتخمة عند تناولها مع الوجبات.

6- لحل مشكلة فقدان الشهية وسوء التغذية ، قم بتدسيم الاكل وزيادة سعراته الحرارية عن طريق اضافة زيت الزيتون الى السلطات مثلا أو استخدام صلصات غنية بالكريمة ، او اضافة الحليب أو النشا الى الشوربات المختلفة ، تناول الافوجادو والمكسرات ضمن الوجبات.

7- لزيادة السعرات الحرارية المتناولة ركز على تناول النشويات المفيدة من البطاطا ، والمعكرونة والارز والخبز وغيرها.

8- تناول الطعام ببطىء مع الهضم الجيد له.

9- تناول الطعام في الاجواء المحببة لك ، مثلا كتناوله مع الاصدقاء أو في أجواء الاسرة فهذا سيشجعك أكثر على تناول وجباتك.

10- ركز على الاغذية العالية بالعناصر الغذائية وبالبروتين مثل الأسماك والدواجن والبيض والفاصوليا المجففة والعدس.

11-اذا ما كنت تعاني من الاسهال فتجنب الاغذية العالية بالدهون والمقالي وتجنب المشروبات والاغذية العالية بالكافيين واستبدل الحليب ومنتجاته بحليب الصويا أو اللوز أو بدائل الالبان الاخرى.

12- حاول تجنب تناول الطعام في المطبخ ، وابتعد عن الروائح القوية التي قد تسبب لك الغثيان ، ويفضل للمريض ان لايقوم بتحضير الطعام بنفسه ، وتقديمه له مغطى وغير مكشوف.

13- اذا ما كنت تعاني من مشاكل جفاف الفم وصعوبة البلع فيفضل تناول الاغذية الرطبة التي تحوي كمية عالية من السوائل والمضاف اليها الكريمة أو المرقة ، ويفضل تجنب الاغذية الحارة ومن الممكن تناول الحمضيات وعصائرها كالليمون التي تعزز افراز اللعاب، وحاسة الذوق.

14- راعي سلامة الاغذية ونظافتها وتأكد دائما من صلاحية وتواريخ الانتهاء لما تتناوله.

15- تجنب تناول الادوية اليومية على معدة خاوية.

16- حاول دائما تناول وجبتك ما قبل ساعات من جلسة العلاج الكيماوي.

وفي الختام دائما حاول الاسترخاء والابتعاد عن التفكير بالعلاج بطريقة سلبية ، فذلك سيساعدك كثيرا في التخفيف من الاعراض وخاصة الغثيان وفقدان الشهية. وان استطعت ممارسة تمرين بدني خفيف كالمشي وبما يناسب وضعك الصحي فهذا سيساعدك كثيرا ،ويعزز شهيتك.

د.فرات يحيى محسن أخصائي الاورام والغدد باز کردن / نظر دهید

2023-03-28 01:03:36 15 شغله لابد تسويها بحدود عمر السنه
اي من عمر ١٠ اشهر الى ١٤ شهر
١. مع السلامه للالعاب اللي ما بيها محتوى فكري عالي مثل السيارات اللي بيها ضوء او صوت و مجرد ضوضاء لا اكثر
٢. مرحبا للالعاب الفكرية مثل تناسق الاشكال و المكعبات
مرحبا للالوان و التلوين
٣. حضر للبيت للاستكشاف من الكائن الصغير
يعني غطي فتحات الكهرباء
خزن الادويه جيدا
انتبه للسلالم
و لكل شيء ممكن يسبب ضرر
٤. حول الطفل الى سرير صعب التسلق و بالتالي حمايته من تكرار السقوط من علو
ماكو مكان امين ابدا
٥. اشرح و اشرح و اشرح و فسر كل شي
هذا هو العمر الاستكشافي
هذا هو العمر اللي يريد يعرف بيه كلشي
و شنو
و منو
اشرح و بادر و اسال و جاوب
٦. اتركهم يطعمون انفسهم بانفسهم اما عن طريق ايديهم او عن طريق الملعقه
فعلا البعض من الاطفال يستطيع الاكل لوحده عن طريق الملعقه
و لكن الاغلب يستطيعون بعمر ١٨ شهر
٧. قدم اكلات جديده متنوعه
من طبخ البيت و من اكلكم اليومي
القيود اللي انفرضت اول سنه انه لا شكر لا ملح باول سنه خلصت
٨. مع السلامه مميه اذا كان يرضع صناعي و اهلا و سهلا بالكوب سواء الكوب اللي بيه مصاصه او اي كوب اخر
٩. اقرا و اقرا و علم الادب و الحوار لطفلك هذا هو واجبك باول سنه
من يضربك الزم ايده
و علمه هلو و باي و مرحبا و شكرا
١٠. حول الى الحليب الكامل الدسم بعد عمر السنه
ما يصير و لا قبل يوم من عمر السنه
١١. اذا ما تركتي الملهيه خلص اجا وقتها و بدا وقت المضاعفات
خلص لازم تتركيها
١٢. عاقب و عاتب بالمعقول
لا تكبت الحريه و بنفس الوقت لا تطلق الامور سايبه بدون رادع
يعرف الطفل بهذا العمر النعم و ال لا
و يعرف جيدا العقوبه و الثواب
شجعه
و اذا خالف فهمه انك زعلت عليه
١٣. علم الاستقلاليه
تفريش الاسنان مثلا و الاكل مثال اخر
اسمحلهم يمارسون حريتهم داموا بدوا يكبرون
١٤. اذا عندك غرفه ثانيه حان الاوان جدا لعزل الطفل في غرفه منفصله
١٥. اخر نصيحه
استمتع بوقتك معهم
ممتعين جدا بهذا العمر و لن يتكرر
د. سيف سمير البياتي
اخصائي طب الأطفال باز کردن / نظر دهید

2023-03-25 14:00:47 باز کردن / نظر دهید

2023-03-25 14:00:06 خلو يم التلفزيون من ينام حتى يتعود على الصوت
فتحوا الاضويه قوي حتى يروح ابو صفار
خلي بفراشه حتى يتعود عليه

#الثلث_الرابع

من النصائح المتداوله عند ولاده طفل جديد للاسره

و على الغالب حسن نيه انه الاسره مكيفه بي وتريد الطفل يتكيف باسرع وقت حتى يشيل نفسه بنفسه وهذا شي مو غلط

لكن الغلط هو الطريقه الي نتبعها او العادات الي تاثر سلبا على الطفل وبدل ما يتكيف بسهوله نخلي يصاب بصدمه الولاده ويدخل كآبه

معقوله؟
اي نعم الطفل الرضيع يتكأب وينصدم


تعالوا نشوف الموضوع من وجهه نظر الطفل
يكون الطفل داخل الرحم معتاد على
اضاءة حمراء خافته
صوت نبض قلب الام وحركات الامعاء والتنفس
حركه مقيده داخل الرحم
يتحرك باستمرار مع حركه جسم الام وتنفسها
يحصل على الغذاء دون اي مطالبه
لاتوجد لمسات مختلفه، احساس واحد داخل السائل الامينوسي

فجاة يصير حدث الولادة والي يخلي يفقد كل هاي الامور

بدل من الضوه الخافت ينسطر بضووه قوي 24 ساعه

وبدل صوت نبض الام و وشوشه الاحشاء، يسمع الصيصاااااااان وألفٌ ارررنب

وبدل الاحساس الدائم بالحضن داخل الرحم شو فجاه يحس نفسه ديطير وايدي ورجليه كل وحده تروح بمكان

وبدل حركه مستمره شو باقي بفراش ثابت

الاكل لازم يصرخ يلا يجي وتبدا المغص ومايكدر يتحرك زين حتى يخفف من الم المغص

واويلي على الزيارات المفاجئه وكل شخص يلمس باحساس مختلف

كل هاي تحدث عند الرضيع اول 3 اشهر
زين ليش هالمعاناه؟؟

شو ابن المعزه والخروف منا يولد منا يركض وياكل ليش ابن الانسان هالشكل ؟

الجواب لهذا السؤال جاوبه الدكتور هارفي كارب وكال مده حمل الانسان مو 9 شهور فقط
لا
الحمل يستمر بعد 3 اشهر لكن خارج الرحم
لان اخر 3 اشهر الي هي (اول ثلاث اشهر بعد الولادة) يكبر راس الطفل كلش واذا صار هذا الحجم داخل الرحم يصير موضوع الولادة مميت للام

لذلك هو يولد لكن يكون بعده ما مستعد للعالم الخارجي ويحتاج 3 اشهر اخرى من العناية الفائقه حتى يكدر يتكيف بشكل سلس دون صدمات ودون عناء للام وللاب

شنو يحتاج هاي 3 اشهر ؟
يحتاج احساس وبيئه مشابهه للي جان عليها داخل الرحم
يحتاج حضن دافئ
يحتاج يسمع صوت نبض الام
يحتاج رضاعة طبيعيه
يحتاج تلامس جلد على جلد skin to skin
يحتاج جرعات مستمره من الاوكسيتوسين الي هو يفرز عند الشعور بالحب
يحتاج حركه متواصله مثل الي جان يحس بيها
مايحتاج اكوام من الملابس والبطانيات
مايحتاج ثوم
مايحتاج كحل ولا تسريحات ولا عطور ولا فاشن ولا فوتو سشن
ممكن احنا كاهل نحب نفرح بيهم بس خلينا نسوي المهم اولا

اكيد كل هاي الاحتياجات هي متعبه ومرهقه وخصوصا ان الطفل يطالب بيها 24 ساعه فعليا
كان سابقا حمل الطفل بالحماله او الشياله هو امر مفروغ منه
لكن بدأ تتراجع هاي الثقافه بمرور الزمن وكثرت الخرافات بدل منها

حتى يحصل الطفل على احتاجاته باقل تعب
وتحصل الام ايضا على جرع مستقره من الاوكسيتوسين

اني استخدمت انواع عديده يلا كدرت استقر على نوعي المفضل الي هو صار متوفر

انتي بدورك ايضا جربي وشوفي الي يناسبك
بالاخير
ثقافه ترابط الام والطفل
والاب مع الطفل
لازم تنتشر وترجع الطرق الفطريه للعناية بالمواليد هي الاصل ونقضي على الخرافه

د.اسماء باز کردن / نظر دهید

2023-03-24 23:51:23 35 طريقه حتى تعززين الحب بينك و بين ابنك !!!
1. دائما اخبريه انه انت راح تحبيه مهما صار و لو شنو صار
دائما كوني انت من أكبر فانزاته.
2. علميه على احترام والده حتى لو كنت منفصله عن والده و حتى لو كنت ما تحبين والده
3. ابدا لا تحرجين طفلك أمام الاخرين و لا تعاقبيه كدام اي احد
4. دائما اسمعيه حتى لو كان ما مهم اللي يحجيه
5. كوني طالبته و تعلمي منه شنو يحب و شنو يكره
6. دعيه يحلم بما سيكون و كيف سيكون
لا تخططين حياته دعيه يحلم
7. الله يخليك خليه يتصرف كولد يعني يقفز و يكسر و يلعب و يضحك و يتطين و يتوسخ
8. ثقي به و بانجازاته
9. يوميه كوليله انت ذكي انت قوي انت لطيف
10. ادعي مواهبه مهما كانت بسيطه
11. احضنيه حتى لو ١٠ مرات بالساعه اي عادي احضنيه
12. صلي لاجله و ادعيله
13. علميه كيف يحب و يكون محبوب
14. كوني بجانبه يوميا
15. اسمعيه من يكول وين وصل بالليكو مثلا او وين وصل من لعب شطرنج او وين وصل بحل الحزوره
16. خلي هو ينظف غرفته بنفسه و هنا اني اكولك زوجته راح تشكرك بالمستقبل
17. العبي وياه مصارعه
18. العبي وياه طاولي او شطرنج او اونو او اي لعبه يحبها
19. علميه كيف يعامل البنات بحب و احترام
20. احجيله عن لطافه و جمال وجهه و كيف ان الخالق احسن صنعه
21. علميه كيف يساعد الاخرين و دائما كوني له مثال
22. ابدا لا تكسري روحه القويه
يحب اللعب بالطين خليه يلعب بالطين
23. دعيه يكون قوي و ما يخاف
24. احبي زوجك اكثر مما تحبين ابنك
25. دعيه يحميك و يخاف عليك
26. دائما خليه يسمع شكد انت مقدره افعاله و حسن تصرفه
27. اعتذري له اذا بدر منك خطأ
راح يتعلم انه من العادي ان يخطأ
28. تحملي الهوسه و الضوضاء اللي يسببها عادي
29. اخبريه دائما قصصا عن والدك او اخوك او زوجك و كيف هم رجال جيدين
30. اضحكي معه او على نكاته
31. دعيه يقع راح يتاذى اي بس راح ينهض و يكمل طريقه
32. شبهيه بابوه اذا اعتبرتي ابوه مثال جيد طبعا
33. خليه يتحمل نتيجه افعاله لا تبالغين بالحمايه
34. اقراءي له كتبا عن الرجال الجيدين
35. لا تبالغين بسقف طموحاتك و تبالغين بالتوقعات فالله وحده يعلم كيف تدار الامور و كيف سيصبح هذا الولد فيما بعد
د. سيف سمير البياتي اخصائي طب الاطفال باز کردن / نظر دهید

2023-03-22 19:59:38 رمضان كريم

كل سنة السؤال نجاوبه ونعيده لحواملنا الغاليات
هل يمكن للحامل ان تصوم شهر رمضان؟
نعم ان كنت تتمتعين انت والجنين بصحة جيدة بعد تقييم طبيبك الخاص ممكن الصيام
افضل الاشهر للصيام هي الشهر الرابع والخامس والسادس وهي اشهر العسل في الحمل لان فترة الوحام تقريبا تختفي ولم تبدأ بعد الاشهر الثلاثة الاخيرة الثقيلة
ولكن بالامكان اذا كنت في بداية الحمل او نهايته ان تصومي على ان لاتكوني تعانين من
ارتفاع الضغط لان علاجك يجب ان يكون ضمن الوقت المحدد اضافة الى ان الصيام ممكن ان يسبب ارتفاع ضغطك اكثر
سكر الحمل او داء السكري قبل الحمل
فقر الدم الحاد لانه سيزداد
لديك تاريخ سابق لولادة مبكرة
اسقاط مهدد ونزف رحمي
التهاب المجاري البولية
ارتفاع درجة الحرارة
حامل بتوأم
قلة السائل الامينوسي المحيط بالجنين
ضمور نمو الجنين
عدم كفاءة المشيمة
اي مرض اخر بجانب الحمل مثل عجز القلب او الكلية او الكبد

اذا كنت لاتعانين من الحالات اعلاه ممكن الصيام
الفطور يجب ان يكون على مراحل اي نبدأ بتمرة مثلا مع شوربة خفيفة
بعد نصف ساعة او ساعة نفطر فطور صحي متكامل من بروتين وكاربوهيدرات ودهون ونقلل السكريات على قدر الامكان
لاتفوتي وجبة السحور ابدا
اكثري من السوائل المفيدة ماء لبن او حليب ونتجنب العصائر الصناعية وحتى الطبيعية تكون بكمية محددة وبدون سكر مضاف
حاولي ان تحصلي على قسط جيد من الراحة والنوم وحاولي ان تتمشي بعد الفطور عالاقل ٢٠دقيقة
في حالة شعرتي بالضعف او الدوران او التقلصات الرحمية اتركي الصيام لوقت اخر
لاتنسي فيتامينات الحمل

دمتم بصحة وعافية
د رحاب مجيد شريف باز کردن / نظر دهید