2022-06-08 05:49:03
السلام عليكم.
إحنا محتاجين نعلم "بعض" الرجالة ألف باء قواعد ركوب أي مواصلة، لعلَّ أي حد فيهم ينتبه ويتعلم الذوق شوية، واللي أهمها كالآتي :-
1- حضرتك لما تلاقي العربية فاضية بلاش تسيبها كلها وتقعد جنب البنت الوحيدة اللي قاعدة في العربية، أو تسيب كل الولاد اللي قاعدين وتقعد جنب بنت، حضرتك دا إسمه تلزيق، وليه إسم تاني برضه بس أنا مش هقوله عشان كلنا عارفينه.
2- حضرتك دورت ومش لاقي أي مكان تاني غير إنك تقعد جمبها، فيبقى ياريت بلاش تريح أوي في القاعدة وتفتح زواية 90، وتخليها تلزق في الشباك وتفضل تنكمش وتبقى شبه الإستيكر وهيَّ قاعدة، حضرتك دي مش كنبة بيتكم والله، لإن بالمناسبة إحنا كذلك من حقنا نقعد مرتاحين زينا زيك، لإن واقعيًا إحنا دافعين نفس الأجرة، وذوقيًا من حقي يكون في مساحة بينا، بدل ما أرزعك بالشنطة اللي شايلاها بالعافية أفتحلك دماغك.
3- لما أحط الشنطة بيني وبينك اللي هي أساسًا محطوطة في مكاني، ياريت بلاش جملة شيلي الشنطة يا آنصة، لإني مش هشيلها لو إتقلبت قرد، وجملة أصلها مضيقاني، حضرتك إنت كلك على بعضك مضايقني أساسًا ومع ذلك مستحملاك، فياريت تتحمل إنت بقى الشنطة اللي هي أصلاً جماد ومش هتفرك زيك.
4- حضرتك لو بتحط فلوسك في الجيب الخلفي، يبقى ياريت تطلعها قبل ماتركب، لإنه مش هيكون لطيف أبدًا إنك بعد ماتقعد تفتكر تطلعها، وتفضل تعمل فيها بهلوان وساحر علشان تطلعها، علشان إيدك لو لمستني هقطعها.
5- لو حبيت توصل الأجرة للسواق عن طريقي، ياريت تقول دا بلسانك، وفي أكتر من جملة تقدر تنادي بيهم زي "لوسمحتِ، من فضلك، بعد إذنك، يا آنسة، إن شاء الله حتىٰ تقول يا ولية أو تلف الفلوس وتغرزها في كتفي أهون.
فضلاً عن إنك تخبط بإيدك على كتفي وتقولي الأجرة، حضرتك كتفي ده مش ملكك، ولا هو مال عام اللي رايح واللي جاي يخبط عليه لما يحتاج أي شيء، ومن حقي أعترض لما تعمل ده، إستخدم لسانك وإحنا والله بنسمع تخيل !!
مفاجأة مش كده ؟!
علشان صوابعك دي هبطل أخليك تستخدمها بعد كده لما أكسرهملك.
6- لما أطلب من حضرتك إنك تنزل علشان أنزل أو أطلع، ماتقوليش إتفضلي وتلف رجلك، على أساس إنك كده إديتني مساحة أكبر، حضرتك إنت كده بتستهبل لإن أنا مش خلة سنان هعدي من الخرم ده، فقوم قامت قيامتك.
7- بطل تبص على البنات اللي نازلة من العربية وشيل عينك إلهي تنشك، متكونش راجل شحط كده ومحسوب نفر من الرجالة على ما تفرج.
والسلام.
#منقول
1.2K views𝕄𝔸ℍ𝔸𝕊𝔼ℕ, 02:49
𓄼
