2023-04-14 07:19:06
من الآسك:
س: أنا أم لاتنين رضع، الفرق بينهم سنة وشهر بالظبط .. بعمل معاهم مجهود جبار .. مش بنام ومش برتاح وبتأخر في حق ربى وف حق نفسى .. والله إنى بعيط بالدموع من التعب .. سؤالى بس هو ده كله ليه جزاء عند ربنا بالذات إني مقصرة ف حقه ؟
ج: شفت سؤالك من أمس بعد ما قفلت .. وفضلت فاتح عليه عشان ما يضيعش في الزحمة؛ لأن يهمني جدا أجاوبه !
يهمني أقف مع أنبل وأطيب وأكرم أنواع العطاء البشري .. عطاء الأم.
اللي بتعمليه مش له جزاء وبس .. بل يحبه الله ويشكره لك ويوجب لك بإذنه رحمته جزاء رحمتك هذه ..
اوعي تكوني فاكرة إنك بتتعبي عشانهم ولادك وبس .. بل ربنا رحيم يحب الرحماء، كريم يحب الكرماء .. وإذا كان في كل ذات كبد رطبة أجر فكيف بمن تحوطيهم بحنانك ورعايتك لينشأوا يوحدوا الله !
حافظي المهم على الفرائض في وقتها .. شغلي دايما قرآن ..
وما أنت فيه من أعظم النوافل !
لتعبك بالنهار كالصيام .. ولسهرك بالليل كالقيام ..
يا أمهات الدنيا .. أنتم في حياتنا من نفحات الجنة.
99 views04:19