أخد مني اللي كان عايز ياخده وضيع مستقبلي وبراءتي وسابني.. ريحيني وقوليلي إن ربنا عَزَّ وَجَل هاينتقم لي منه.
ج/ أنا عارفة إن الحقايق مؤلمة و إن الناس بترتاح للأكاذيب، بس الحقيقة دين في رقبة اللي يعرفها للسائل، فلأ مش هاريحك وأكدب عليكي وأضللك وأضيعك.. هاقولك الحقيقة.
والحقيقة عزيزتي -اسمحيلي اقولك عزيزتي في وسط الكلام يعني- إن الحماقة في أسود صورها إننا لما حد يأذينا ويسرق عمرنا إننا نفضل واقفين في نفس المكان معلقين نظرنا بيه منتظرين الاعتذار والانتقام، فوق الوقت اللي سرقه بنديله وقت إضافي وبدل مانتخلص من المشاعر السلبية والألم بنضيف عليها غضب وسواد وشماتة وحسد وتشفي.. الحاجات دي مش هاتضره إنما هاتضرك إنتِ وهاتحولك لكائن سام كريه مُنفر، عارفه؟ حتى جمالك الخارجي بيروح لما بيكون ده في قلبك..
و أنا مش عارفة مين ابن ال اللي رسّخ في دماغ الستات على مر العصور إنهم دايماً مفعول به، وإنهم في كل النزاعات ضحايا مظاليم، وإنهم على طول الخط مُغرر بيهن وإنهن بدون وعي كامل ولا إرادة.. مش أفراد كاملة ناضجة مسؤولات ومُكلفات زيهم زي الرجالة زي مالخالق قال.
وزي ما هو هايدفع التمن عاجلاً أو آجلاً، إنتِ كمان هاتواجهي أفعالك منفردة، وآه أفعالك -معلش هاصدمك- بس أي اتصال جسدي عن تراضي وموافقة فعل اتورط فيه ٢ فاعلين.. مش فاعل ومفعول به، بغض النظر عن دوافعك وبغض النظر مين دفع التاني لارتكاب الفعل، ولأ ربنا مش هاينتقملك منه في الدنيا عشان هوا مظلمكيش ولا حاجة.. إنتِ اللي ظلمتي نفسك وقدمتيها لواحد بدون مقابل.. لواحد عمره مابيقدم أي شيء لأي حد بدون مقابل، هو كذب واحتال عليكِ عشان يوصل لغرض معين.. الخديعة هاتتضاف لسجل جرايمه وإنتِ أتمنى تتعلمي ماتبقيش مغفلة بعدين.
أما فعل الفراق والهجر والخروج من العلاقات مش جريمة وربنا.. حتى لو كان بدون سبب، أي إنسان من حقه ينسحب من أي علاقة في أي وقت وربنا مش هاينتقم منه ولا حاجة طالما ماظلمش وطالما أدى واجباته المادية لو عليه واجبات مادية.
بحزن أوي لما ألاقي واحدة قاعدة موقفة حياتها ومستنية ربنا يبعتله مصيبة تشيله بس عشان سابها.. بدل ماتتابع حياتها، تشمت فيه لما الدنيا تيجي عليه وتفتري على ربها سبحانه وتعالى لو الانتقام بتاعها ماوصلهاش.. قمة العذاب النفسي ومرض القلوب.
واعرفي حاجة أخيرة -حتى لو غضينا النظر عن الدين- الحدود بين الجنسين هي الحاجة الصح، وهاقولك السر اللي مخليني على أعتاب الثلاثين وقلبي ماتكسرش ولا مرة لحد الآن، السبب إني حتى من قبل ما أبقى متدينة مابسمحش لأي راجل يحط صباعه عليا قبل مايقدملي التزام اجتماعي ومادي ومعنوي وقانوني كامل.. مكنش تدين إنما منطقية، وعمري ماسمحت لنفسي أصلاً أحب راجل بدون ما يكون بينا التزام.. مش تدين برضه، إنما لأني لو حبيته هاتعمي عن عيوبه وهاديله صلاحيات المفروض مايخدهاش..
الحب عندي بيبدأ بمجرد ما الاتنين يتقفل عليهم باب والحقايق تظهر، إنما أي حاجة قبل كدا ده هبل ووهم لذيذ وهرمونات كيماوية ومسلسلات مش واقعية، و هي مشاعر فينا الخسيس من الرجال بيستغلها للحصول على حاجات مجانية.. والحمقاوات من النساء مابيتعلموش من اخطائهن وأخطاء من خلت، اللي قبل مالباب يتقفل علينا المفروض يكون اختيار عقلي منطقي بحت خالي من العاطفة.
يقول لي: خدي عصاية وارسمي خط على الرمل، أوعدك محدش هايتجاوز الخط ده أبداً..
ماتسمحيش لحد تاني يتجاوز خطوطك وينال منك اللي محفوظ لرجل واحد فقط، مش هامشي أوزع حب وقبلات وتعاطف على رجالة الكوكب أنا.. مش هاحط وقتي وأفكاري ومشاعري في واحد مش متأكدة هاكمل معاه ولا لأ.
انسيه وتابعي حياتك واوعي تحكي اللي حصل لمخلوق وافتحي صفحة جديدة مالوش أي أثر فيها.. وأخيراً سيبي اللي جاي لرب اللي راح واللي جاي وماتخافيش من حاجة.
