الشاعر حيدر العمار الخزعلي

2022-08-29 01:20:22

باز کردن / نظر دهید

2022-08-23 12:34:10 قصيدة ( خادم تگر عيني) للمشايه

•-•-•-•-•-•-•-•-•-•-•-•-•-•-•-•-•



سميني ..سميني .. خادم تگر عيني
انطـيني بس رايه بالحضره تلگيني

•-•-•-•-•-•-•-•-•-•-•-•-•-•-•-•-•

ماريده اسمي واللقب سميني بس خادم
خليني اشارك بالعـزه و امشي مع القائـم
ياريت اروح و مـا أرد مـاريــد ارد سـالـم
محـلاته بـالأيـد و يرف بيـرغ گُمر هاشم

دليني ..دليني  ..روحي التحاچيني
انطـيني بس رايه بالحضره تلگيني

•-•-•-•-•-•-•-•-•-•-•-•-•-•-•-•-•

روحي تگلي مستعد خل نمشي ونشوفه
زينب اجتي من السبي خافنهه مجتوفـه
كـافلهه گُبـته مـدخـنه و ما نزل اچفوفـه
چفوفه المناير يا هله تـمطر على ضيوفه

وديني  .. وديني  .. عشگي يتانيني
انطـيني بس رايه بالحضره تلگيني

•-•-•-•-•-•-•-•-•-•-•-•-•-•-•-•-•
سائل سألني وشعجب هيچ العشگ سـوه
گتله بله حسين و مشي دنيـانه مـا تسـوه
هاذه جزء من الوفـه و نبـض الگـلب هـوه
غيرتنه احنه من علي ومن صاحب الخوه

يحييني .. يحييني .. من ناره تچويني
انطـيني بس رايه بالحضره تلگيني

•-•-•-•-•-•-•-•-•-•-•-•-•-•-•-•-•

ايامي ترخص و العمر كون العمر خدمه
وصتني أُمـي مـن مشت گالت تره ذمـه
لا تتـرك حسين و تـزل واتمنه بس كلمه
خادم تصير و أفتـخر  دمـك فـده لدَمـه

توصيني .. توصيني  ..ما عوفه تدريني
انطـيني بس رايه بالحضره تلگيني

•-•-•-•-•-•-•-•-•-•-•-•-•-•-•-•-•

متعلم أنـه عالمشي وعالخدمه والموكب
مـلاچي الحسين و أضـل برايتـه مچـلب
بعيوني و بـدم الگـلب ابقـه ألــه امعـزب
غرگنـي خيره و اكبرت يابـو علي انـدب
يرويني .. يرويني .. بخيره ويكفيني
انطـيني بس رايه بالحضره تلگيني

•-•-•-•-•-•-•-•-•-•-•-•-•-•-•-•-•
         (  حيدر العمار الخزعلي  )

. باز کردن / نظر دهید

2022-08-23 12:33:43 @HaeiderALkhazaily
لاي استفسار عبر الخاص
سأكون بخدمتكم باز کردن / نظر دهید

2022-08-23 02:56:52 مشايه ...   بالرايه والنيه
مشايه  ...  بالاربعينيه

◇ ◇ ◇ ◇ ◇ ◇ ◇

جتف بجتف لمن نهب نتعنه مشايه
ياخذنه لحسين الدرب وترفرف الرايه
نطوي الصحاري نعتني بالفطره وفايه
نمشي دربنه بالحزن والدنيه معميه

◇ ◇ ◇ ◇ ◇ ◇ ◇

نگضي ليالي بالدرب وِ نادي يستاهل
لو مره ياخذنه التعب نندب يبوفاضل
عباس من عندك مدد و اكفلنه يالكافل
خلينه نوصل كربله و هايه الي المرجيه

◇ ◇ ◇ ◇ ◇ ◇ ◇

اسمع سوالف بالدرب من اليماشونه
واحد يگول انه اطلبت والدمعه بعيونه
والحاجه بسبوع انگضت چانو يأيسونه
يحلف يگول انه شفت كل عله مابيه

◇ ◇ ◇ ◇ ◇ ◇ ◇

بالرايه شدينه الضهر والدمعه تحدينه
ونماشي ندري بالدرب غايبنه مهدينه
ندعيله احنه بالفرج  واليدعي حامينه
عالهامه يلطمك اجه وجروحه مسبيه

◇ ◇ ◇ ◇ ◇ ◇ ◇

اهل المواكب بالهله نمشي و يخدمونه
وضعونك بوسط الفله راسك يشوفونه
ضامي يسبح بالرمح بحجاره ضربونه
وجروحك براس وجسد الف وتسعميه

◇ ◇ ◇ ◇ ◇ ◇ ◇

گاتلنه يحسين العشگ والغيره جابتنه
نتمنه خيل السحگتك يالغالي سحگتنه
واحدنه من گد الحزن و الله هدل مَتنه
عوده انحنه من المشي واجدامه مدميه

◇ ◇ ◇ ◇ ◇ ◇ ◇

يخلص تعبنه مايضل لو شفنه شباچك
نتراکض لبابك سعي باب الفرج  بابك
سيدنه مو دنيه فقط ابكلشي نحتاجك
بالأخره انته الأمل و الحاجه مگضيه

◇ ◇ ◇ ◇ ◇ ◇ ◇

الشاعر : حيدر العمار الخزعلي

◇ ◇ ◇ ◇ ◇ ◇ ◇ باز کردن / نظر دهید

2022-08-22 02:08:12 قصيدة ( هذا المشي محلا ) للمشايه

•••••••••••••••••••••

هاذه المشي محلا  ...  لجنة عدن مسرا

•-•-•-•-•-•-•-•-•-•-•-•-•-•-•-•

چن عسكر احنه بالدرب  ... هبينه
من دگت اطبول المشي  ... لبينــه
نعرفهه ساعات الصفر   ...   نادينه
حي على هاذه العمل  ... وامشينه

هاذه العمل نهوا  ...  لجنة عدن مسرا

•-•-•-•-•-•-•-•-•-•-•-•-•-•-•-•

چم نجمه سارت بالسمه  ...  تماشينه
چم كوكب لارضك سعه  ..  شمدرينه
چم فطرس لقبرك حضر  ...  حاچينه
وي رحمة الله البـالارض  ...  مهدينه

كلشي سعه بممشا  ...  لجنة عدن مسرا

•-•-•-•-•-•-•-•-•-•-•-•-•-•-•-•

الله رحمنه بهل المشي  ...  و نجـانه
من حر جهنم  بالشمس  ...    زكــانه
خلانه نعطش بالعشگ  ...     چـوانه
لو نعطش احنه نرتوي  ...   بـ جنانه

هاذه المشي و معنا  ...  لجنة عدن مسرا

•-•-•-•-•-•-•-•-•-•-•-•-•-•-•

من الصحاري من الجبل  ...  وفايه
لبـيك صاحت و اعتنت  ...  بـالرايه
كل الطرق طلعت زحف  ...  مشايه
حتى الطيور البل سمه  ...    عنايه

تبچي الك بالـ آآ ...  لجنة عدن مسرا

•-•-•-•-•-•-•-•-•-•-•-•-•-•-•

مدمعنه زمزم ما خلص  ...  معروفه
فاضحنه حبك و الخدم  ...  ملهوفه
حرگتنه تبـقه بكل زمن ...  مكشوفه
عاهدنه أُمك كل وكت  ...   مـنعوفه

لگطع النفس ويا  ...  لجنة عدن مسرا

•-•-•-•-•-•-•-•-•-•-•-•-•-•-•
  
      (  حيدر العمار الخزعلي  )

. باز کردن / نظر دهید

2022-08-21 02:25:53 قصيدة ( ضحكتك ذبحوهه )
السلام على عزيزه الحسين السيده رقيه (ع)
لسان حال الحوراء زينب (ع) 
_

ضحكتك ذبحوهه ... لـسبي وَدوهه
ورده چن شلعوهه
من صدرك حسين

●●●●●●●●●●●●●●●●

تشبه الورده بشكلهه والورد من عدهه غار
چانت بحضنك وطنهه تغفه و يدور المدار
ماي تِرويهه بضحگتك ورگه چفيهه الزغار
من عفتهه يابو الأكبر داست آبرجليهه نار
طفلتك حيروهه
بالضرب جبروهه
تبتعد خلوهه
من صدرك حسين

●●●●●●●●●●●●●●●●

شبو النار و شفتهه تركض أگبالي و تصيح
اذني تاذيني ي عمه والدمه فيض و يسيح
بالفله شردت رقيه و عل وجه كلسع تطيح
من شفتهه تيهتهه شـنهو بيـهه المـو جريح
شردت وتبعوهه
بالرمح دفعوهه
عالثره شمروهه
من صدرك حسين

●●●●●●●●●●●●●●●

جـابو الماي و اجتك تركض ام قلب الحنين
گالت ارويه واشوفه ضامي علگاع الحُسين
عالجسد واحد سطرهه گلهه ذولـه مـوذرين
منهو يفـزع لـو ندبتي منهو ترجعله السـنين
تنحب وسطروهه
بالحبل شدوهه
لليسر وَدوهه
من صدرك حسين

●●●●●●●●●●●●●●●

تحچي وي راسك شفتهه و الرمح ألـهه يدير
طفله تصرخ ياحبيبي اسره مـن سـار المسير
عـالهـزيله بحضني تبـچي فرفحت نار الزفير
تچوي روحي حيرتي ويا حچي لـيقنع اسير
تنحب وشتموهه
بأسمك يذكروهه
بالضرب سكتوهه
من صدرك حسين

●●●●●●●●●●●●●●●

شافت الطفله بحلمهه شخصك و گعدت تنوح
وين ابويه حسين اريده يمسح بچفه الجروح
ارد اشبگه و أرد اشمه من الخرابه و ياه اروح
شالت الراس بحضنهه و ما بقه بل طفله روح
ماتت و دفنوهه
بالغرب تركوهه
بالغصب حرموهه
من صدرك حسين

●●●●●●●●●●●●●●●
          (  حيدر العمار الخزعلي  )

. باز کردن / نظر دهید

2022-08-04 17:50:45 قصيدة ( من ديره لديره)

•••••••••••••••••••••••••••


من ديره لديره .. ما ألهه عشيره
بين  الوديان ...   ام الاحزان

••••••••••••••••••••••••••••••••

شافوهه تمشي مچتفه بين الصحاري
حرمـه ضعنهه منسبي مدمعهه جاري
حمره عباهه من شمس ذيچ الضهاري
محروگه اديهه وتنلچم تمشي وتباري

مذهوله بحيره  ....  بدمعتهه اميره 
بين النسوان  ...  ام الاحزان

•••••••••••••••••••••••••••••••

سئلو حرسهه بالدرب من هيه هايه
چنـهه چبيرت هضعن شيلتهه رايـه
بيـهه يلوذ و يحتمي ضعن السبايـه
شافـوهه قـران الحـزن دمعتهه آيه

مهيوبه چبيره  ...  والطف تصويره
بنت القران  ...  ام الاحزان

••••••••••••••••••••••••••••••

عرفـوهه لمن سولفت بين الـدواوين
گالو يوسفه هـالمره مصيونه حسين
هاي عقيله مخدره و أخت الميامين
عدهه اخو طر الأرض بچه الميادين

يضم ضلهه بضله  ...  حاشاه الزله
و زرت خوان  ...  ام الاحزان

••••••••••••••••••••••••••••••

تحچي تسولف تلتـفت و تكلـم الـروس
بيهن رمـح ما ينرفـع بالغــيره متـروس
بيهن رمـح شايل شمس باعونه بفلوس
يقره الكهف بس الدمع بعيونه محبوس

من تزعل يزعل  ...  و تصيح اتحمل
انته السلطان  ...  ام الاحزان

••••••••••••••••••••••••••••••

گالو عجيبه اتحملت هاي المصايب
عافت اهلـهه عـالثره فـوگ الترايب
ماماتت شلون وعجب من النوايب
تالي متالي ميسره بوسط الخرايب

من همهه البيهه  ...  ماتت رجليهه
اخت العطشان  ...  ام الاحزان

••••••••••••••••••••••••••••••

(  حيدر العمار الخزعلي  )

•••••••••••••••••••••••••••••• باز کردن / نظر دهید

2022-08-04 17:08:07 نزله
قصيده ( مسلم ولدك مارحموهم)
لاولاد مسلم ابن عقيل (ع)

••••••••••••••••••••••


مسلم ولدك ما رحموهم
مسلم ولدك ما رحموهم

••••••••••••••••••••••

شردو  ولدك وسط الهيمه
مـن شبـو نيــران الخـيـمه
شافـو يوم الطف و ضيمه

ضنو خلصو بس اسروهم
مسلم وَّلـدك مـا رحموهم

••••••••••••••••••••••

عاشو عام بسجن الكوفه
ابن ازياد ايوصي صفوفه
اعليهم شـدو منهم خوفه

عام اتعذبو من سجنوهم
مسلم وَّلدك مـا رحموهم

••••••••••••••••••••••

محمد حاچه الحارس تعلم
احـنه اولاد العـتره و تنـدم
خـل انـروح و بـاجـر تسلم

فـك الباب وما شـافوهم
مسلم وَّلدك ما رحموهم

••••••••••••••••••••••

اصغار وچان الليل الساتر
بيـهم خوفت يوم العاشر
بيـهم خـوفت نار وحافر

يَم الحُرمه من سمعوهم
مسلم ولدك ما رحموهم

••••••••••••••••••••••

الضالم حَس وجرهم بيده
اللــه يلـعنه و نـار ايـزيـده
حـز الـروس المـال ايريده

مسلم ولدك هم ذبحوهم
مسلم وَّلدك ما رحموهم

••••••••••••••••••••••
( حيدر العمار الخزعلي) باز کردن / نظر دهید

2022-06-25 11:05:59 قصيدة ( فزع ولينه)
لسان حال السيده زينب وهي تخاطب الريح

•••••••••••••••••

لارض النجف روح اعتني فزع ولينه
گـله انولت بنتك علـي ألحــگ عـلينه
گله يا هوى اشصار
شــبو بـالــخيم نـار .. ألــحگ عــلينه

°°°°°°°°°°°°°°°°°°°°°°°°°°

سافر روح واستعجل واخذ بالك
اختصر دربك تعنه بهذه مرسالك
گله اعليهه لاتبطي وعلى اعيالك
تفرهد خدرك وداسو على اطفالك

حـشم علي خـله يـجي گله بقينه
وسط الفله هاي العده شدو ادينه
سولف وانقل اخبار
شــبو بـالــخيم نـار .. ألــحگ عــلينه

°°°°°°°°°°°°°°°°°°°°°°°°°°

خَبره حسين مـتوذر خـبر جاله
الگطع راسه تجرء بالرمح شـاله
گله الخيل تتملعب على اوصاله
هم يدري سهم چبده دره بحاله

حسينه وگع من الحجر صوب جبينه
چبده انمرد وانه صحت بويه انولينه
ضامي عالثره الحار
شــبو بـالــخيم نـار .. ألــحگ عــلينه

°°°°°°°°°°°°°°°°°°°°°°°°°°

لو يسأل عن العباس شنهو تگله
هز الگاع و اربـاط السـمه حـَـله
گله يفور چـن گهوه بوسط دلـه
معزب قدم اچفوفه مـنو المثله

لـَمّ الــنهر لـمن وصـل بــويه بـجربته
گلبه انفطر بس ماشرب الكافل اخته
طبهم صاحو انذار
شــبو بـالــخيم نـار .. ألــحگ عــلينه

°°°°°°°°°°°°°°°°°°°°°°°°°°

نشده شلون يرضى اعياله مسبيه
و جثت حسين تبقه شلون مرميه
گله بـسوط سـارت چـنهه مـعميه
بديهه احبال فـوگ النوگ مـدميه

رماد الخيم يا باالحسن غطه عبينه
لون الجفن ازرك صفه گد ما بچينه
وازرگ متن الصغار
شــبو بـالــخيم نـار .. ألــحگ عــلينه

°°°°°°°°°°°°°°°°°°°°°°°°°°

عـود ابـساع انـه انطر خـبر مـنك
رد الصوت من يحچي على متنك
جـيبه وعـود مـن تـرجع اسـِمعنك
بـطيت اهواي ماتـرجع عليّ چنك

بويه الهوى بالطف وگف من انسبينه
بيده خـبر مـنك بـعد مـاضن يــجينه
چــنه ناطــر الـــثار
شــبو بـالــخيم نـار .. ألــحگ عــلينه

°°°°°°°°°°°°°°°°°°°°°°°°°°
كلمات :   حيدر العمار الخزعلي

°°°°°°°°°°°°°°°°°°°°°° باز کردن / نظر دهید