2021-09-02 01:01:36
من البحر حد النحر .. مشايه
يطوي الارض موج البشر .. مشايه
بالأربعين معلمّه .. راياتنه بعلو السمه
مشايه مشايه .. مشايه
.............................
ساعه بساعه أحسب والكلب متلهف يطوف ..
من عام المضه لهاي الزياره كلبي ملهوف ..
اليمشي بدرب ابو السجاد أبد مايعرف الخوف ..
يزور حسين يوم الاربعين ودمعه مذروف ..
منعوف دربك للأبد .. مشايه
يحسين أنت المعتقد .. مشايه
ونوقع العهد بدمه .. راياتنه بعلو السمه
مشايه مشايه .. مشايه
............................
متعّني أزور انه وهلي وبصافي نيه ..
وخطوات المشي كلهن وفه وغيره وحميه ..
عهد أبقه على دربك سيدي ليوم المنيه ..
ودمعات الحزن من ناظري تواسي الزجيه ..
مثل الصلاه صارت فرض ..مشايه
تغطي الارض طول وعرض .. مشايه
شما فجّر الباغي ورمه .. راياتنه بعلو السمه
مشايه مشايه .. مشايه
..............................
أطفال ونسه شيوخ وشباب أتعّنت اليوم ..
وبصوت الحزن تبجي وتوّن تصرخ يمظلوم ..
مشايه مثل روج البحر عالكاع مرسوم ..
ندعي الباري نعمة هالزياره كل سنه تدوم ..
هاي الجموع الزاحفه .. مشايه
خطواتهه تنكط وفه .. مشايه
وسطّرت أروع ملحمه .. راياتنه بعلو السمه
مشايه مشايه .. مشايه
..................................
تتشرف بخدمة زاير حسين المواكب ..
لهلال الزياره بكل سنه تبقه تراقب ..
على طول الطريق تهّون علينه المصاعب ..
كلمة ياهله من معزب تزيح المتاعب ..
زوار ماتعرف تعب .. مشايه
شفنه الاجانب والعرب .. مشايه
صبه ومسيح ومسلمه .. راياتنه بعلو السمه
مشايه مشايه .. مشايه
..................................
اوصل كربله بلهفة محب فارك حبيبه ..
جمرة نار تسعر بالكلب شوكي ولهيبه ..
تشعر بالأمان بكربله روحي الغريبه ..
بصحن حسين من عيني يهل دمع المصيبه ..
نوصل لحد صحنك زحف ..مشايه
يهون بضريحك كل كلف .. مشايه
ونريد حسن الخاتمه .. راياتنه بعلو السمه
مشايه مشايه .. مشايه
.............................
نطوف الصحن سبع أشواط حجه وعمره هايه ..
عنوان البدايه حسين وحسين النهايه ..
وعشرين بصفر نوصل ألك بيدينه رايه ..
مثل زينب مشي راحت غريبه ويه السبايه ..
لو باقي لحظه من العمر .. مشايه
بدربك نموت وننتظر .. مشايه
بس نظره منج فاطمه .. راياتنه بعلو السمه
مشايه مشايه .. مشايه
..................................
حيدر مطر العبادي
521 views22:01