#تراث ياطريح بيا كتر جسمك طريح انجانك يحسين بعدك مو ذبيح اسمع | تراث القصائد الحسينية
#تراث
ياطريح بيا كتر جسمك طريح
انجانك يحسين بعدك مو ذبيح
اسمع اعيالك واطفالك تصيح
وبيك تنخه والعدى ايضربوهه
ــــــــــــــــــــــــــــــــــــــ
كوم شوف اشلون حالته غدت
اتسلبت واتشردت واسحكت
والخيام الي عليهه اتحركت
وهايمه ابطف كربله خلوهه
ــــــــــــــــــــــــــــــــــــــ
طفله تنخه بيك يضربهه الشمر
ابصوطه والصوط ابمتنهه ينكسر
حرمه تبجي عليك من بيت الخدر
بسياط اعدائك ايستوهه
ــــــــــــــــــــــــــــــــــــــ
الفزع من المعركة عل الخيم غار
والخيم يحسين شبت بيهه نار
لن الايتام الزغار أعله الاكبار
وكعت ابهنار من شبوهه
ــــــــــــــــــــــــــــــــــــــ
خوية لو عندك بعد يحسين حيل
كوم خلص الحرم من هجمت الخيل
ولون حيلك جي دمك يسيل
انعذرك وخلي الحرم يولوهه
ــــــــــــــــــــــــــــــــــــــ
لجن يامظلوم ياريتك تشوف
حالت اختك زينب ابوادي الطفوف
زينب الجانت تضللهه السيوف
بس رحت عنهه العدى سلبوهه
ــــــــــــــــــــــــــــــــــــــ
اتحوم ضلت حايرة من كل كتر
اتلم حرم واطفالهه متيه الذخر
شرد اكول اشكثر اطفال اشكثر
هامت وبخيولهم سحكوهه
ــــــــــــــــــــــــــــــــــــــ
جم طفل من هل الاطفال الهايمه
راحت ادوره يبن حامي الحمه
ولنه ميت عل الارض من الضمه
وجم يتيمه امن العطش جتلوهه
ــــــــــــــــــــــــــــــــــــــ
كوم ارحم زينب المظلومه كوم
مو محلهه اتعوفهه امحيره اليوم
اتحشمك وعليك ياويلي تحوم
اتريد يمك توصل ايمنعوهه
ــــــــــــــــــــــــــــــــــــــ
ياحسين اشلون ياوالي الحرم
صوبوا گلبك العدوان ابسهم
هسهم بيه والله ياراعي الشيم
امك الزهرة أظن صابوهه
ــــــــــــــــــــــــــــــــــــــ
ياحسين اشلون نايم عل الثره
ونار گلبك من ضماك اموجره
وجثتك ابضرب المواضي اموذره
ومهجتك من عطش كل كطعوهه
ــــــــــــــــــــــــــــــــــــــ
انت فوگ الثره امكطعه جثتك
وتشتجي امن العطش جمرة مهجتك
والعدى يحسين تسمع نخوتك
وتسكت ولاجنهم يسمعوهه
الشاعر المرحوم ياسين الكوفي
#اللهم_عجل_لوليك_الفرج
(137)
