' اني اغار من كل طالب كلية ' ل: علي رائد كنت يومية ساعة | صـورٍ مٌنًـوعِـٍة
" اني اغار من كل طالب كلية "
ل: علي رائد
كنت يومية ساعة 7 الصبح اكعد من النوم بين ما اغسل ابدل اطلع للبيت 7 ونص اروح للشغل بالدراجة مالتي ساكن مدينة الصدر طريقي المفضل طريق ملعب الشعب ،بكد ما اكره طريق ملعب الشعب بكد ما احب امشي بيه بالدراجة مالتي ،كل يومية من اوصل للشارع اشوف هواية طلاب كليات او منتسبين ميردون يتأخرون عن دوامهم ينجبر يمشي ويترك الكية، اني يومية اي واحد اشوفة كبالي ابو شباب اوصلك بدربي كبل ويكلي الف رحمة على والديك ، اوصلهم التقاطع الأندلس ومناك اطلع الشغلي. مرات اوصلهم المكان الي يردونه اذا متأخرين ، اني اشتغل حداد ، شغل متعب كلش شيل الحديد نزل الحديد ملابس طول اليوم وصخة ،كنت من اشوف طلاب بالشارع او بالخط اغار انقهر اكول ليش اني ما درست ليش ما عشت حالي حالهم حياة الكلية شنو فرقي عنهم ، اقسم بالله گلبي يوجعني مرات من اشوف الطلاب احسدهم لكن افرح الهم اكول كلمن عندة طريق ، كنت اشتغل 6 ايام بالاسبوع اتحمل كل الكلام الي اسمعة اشكال الكلام الي غصب عني اسمعة واسكت ، اموت من القهر من ابو الشغل من يحجي وياي يحجي باسلوب قاسي حتى ما ابين اني ضعيف اروح ابچي بالحمام او اشوفلي مكان اختل بيه وابجي ، وتعديت مرحلة البچي كلت خلي اسوي شي النفسي مدام ما درست ، بعدها اشتغلت حارس ليلي انام ب 4 الصبح واكعدب 7 ونص نفس كل يوم ، جنت مسوي قاصة اجمع بيها فلوس اخلي هل قاسمة الله كل اسبوع ، يوم من الأيام رجعت مالكيت القاصة كلبت غراض البيت كلها ، يمة وين القاصة كالت مادري يمة هسة طبيت البيت ! بقيت ادك على راسي تعبي كلة راح ، يمة ميصير هيج يمة تعب العمر يمة تاذيت هواي يالة جمعت هل جم فلس يمة منو باكها ! امي تباوع ودموعها تنزل بدون ما تحجي كلمة ، ابوية توفة واني عمري 5 سنوات كلش احب ابوية ، ترجع امي تواسيني يمة علاوي لا تبجي فدوة الك وانت سبع فدوة الك بهاي ولا بغيرها ، يمة لشوكت نظل كل ما تصير بينة مصيبة نكول بهاي ولا بغيرها شنو غيرها شنو اكثر من هل مصيبة ! اتقبلت الموضوع لكن غيرت افكاري كلها كلت لازم اجمع فلوس هل مرة واسافر وادرس الاختصاص الي احبة ، فتحت حساب مصرفي وبقيت كل فترى اخلي بيه ،صار هدفي بالحياة السفر والدراسة رغم انو أني ما مخلص سادس ابتدائي ، سافرت ما اعرف اي لغة بس العربية فتحت يوتيوب 6اشهر ادرس انكليزي وصرت احجي انكليزي بطلاقة ، ورة فترى حاولت اقدم على الدراسة الي احلم بيها قدمت مرة انرفضت قدمت مرة ثانية انرفضت ،سنتين اقدم وانرفض ، ابد ما ايست حاولت اعرف اسباب الرفض علمود احاول اصلحها ،حاولت بكلشي ،سهرت ليالي ، مرة من المرات جان القمر كامل باوعت عليه وضحكت حجيت وي الله سولفت وياه فرغت الي بداخلي كتلة انت تكول اسعة ياعبدي واعينك اني سعيت ليش متعيني ؟ رحت نمت مقهور كعدت ثاني يوم ساعة 12 الظهر رحت افحص صندوق البريد باب البيت لكيت كم ضرف مو الي و واحد باسمي استغربت شنو هذا فتحت الضرف وطلعت ورقة قبولي بالدراسة الي جنت احلم بيها ! بجيت وركصت وبقيت اعيط مثل المخابيل أتحقق حلمي بعد تعب وبعد اصرار بعد سهر بعد مثابرة ،
افتخر بنفسي لان قدمت شيء النفسي ابد ما اضوج من اشوف الطلاب وهم يرحون للكلية لان اني صرت ايضا طالب مثلهم واحتمال اكون اعلى منهم 2017 كانت خير علية 2018 ان شاء الله تكون افضل لكل الناس .. اهم شي بالحياة هو هدفك حاول تحققه حتى اذا كانت الضروف غير مناسبة حاول الاخر نفس وحتى باخر نفس لا تستسلم خليك قوي واخذ نفس ثاني ...
كلكم عندكم ابداع وعندكم طاقة و احلام اشتغلو ا على نفسكم الله مينطي الأحد كاعد و بس يدعي ربي اريد حققلي حلمي لو نجحني لو سخرلي عمل صير قوي وساعد نفسك الله راح يساعدك #عاشت_أيدك
