2021-08-18 19:54:08
#تجربه
أهلاً السلام عليكم ورحمة وبركاته انا الطالب فواز الحاصل على الدرجة الكاملة وبقولكم كيف جبتها وقصتي من إلى بالقدرات ولكن قبلها نذكر الله ونقول
ما شاء الله لا قوة إلا بالله :
اختبرت ثلاث اختبارات
الأول كان ورقي جبت 81٪
الثاني محوسب جبت 90٪
الثالث محوسب برضو وجبت بحمد الله 100٪
ببدأ بمصادري
درجتي الـ81٪ :
تاسست من دورة فادتني من ناحية الكمي بس ماكانت شامله كل الاشياء اما اللفظي ما استفدت منها شي وهذا تقريبا الي ذاكرته في الاختبار الاول
جاء يوم الاختبار رحت وانا تقريبا ماذاكرت لفظي بعد الاختبار توقعت درجتي تكون في الـ80 طلعت الدرجة وكانت 81 اتذكر جبت 86 كمي واتوقع 74 لفظي كثيرين قالولي تعتبر حلوه من اول محاوله استانست شوي بس قلت لازم اجيب اعلى
درجتي الـ90٪ :
بعد اختباري الاول سحبت على القدرات لين تقريبًا نهاية الترم الاول وهذا الشي الصراحه من اكبر الاغلاط الي سويتها لاني تقريبًا نسيت كل الاشياء
خلص الترم الاولى وقررت اني ارجع اذاكر راجعت الدورة على السريع بعدها دخلت في 105 كمي الصراحه واجهت صعوبه شوي لان نفس ماقلت الدورة ماكانت شامله كل الاشياء طبعا بديت اذاكر في بداية شهر 1 واختباري كان في نهاية شهر 3 كنت اماطل ويالله اذاكر فاليوم خلصت 105 كمي وباقي على اختباري اسبوعين وانا طبعا للحين مابديت في اللفظي
جلست اتابع مقاطع تاسيس ايهاب جدا مفيده والله وذاكرت اول 200 صفحه من 105 بس طبعا سحبت على القطع رحت اختبرت وجبت 90 فالبداية كنت مبسوط لاني حرفيًا ماذاكرت لفظي وخاصةً القطع
اتذكر جبت 96 كمي و 84 لفظي
درجتي الـ100٪ :
قررت هذي المره اني ما اكرر نفس غلطتي الاولى واسحب على القدرات فا دخلت في قروبات التلقرام وصرت احاول اشرح كثير وهذا الشي فادني مره من ناحية الكمي نصيحتي لكم اشرحوا وساعدوا الناس بالقروبات منها دعوات خالصه لكم ومنها استفادة للطرفين استمريت كذا لين عيد الفطر بعدها قررت اني ابدا اذاكر جد
بديت في 120 كمي كان بثر بس جدًا فادني قررت هذي المره اني ما اكرر غلطي وابدا في اللفظي من بدري عشان اقدر اخلص منه ذاكرت فالبداية شوي من 105 بعدها في اسطورتين عطوني باقات الرابح واعتمدت عليها من ناحية اللفظي جدًا مفيده والله انصح فيها مره
خلصت تقريبًا من حفظ القطع واللفظي بشكل عام قبل اختباري باسبوعين جلست اراجع فيها الـ62 نموذج الي تتكرر هذي الفتره اما الكمي كنت اراجع شي بسيط لأن كنت اشوف اني جاهز
يوم الأختبار : كنت متوتر شوي بس توكلت على الله وهذا اهم شيء والحمدلله كان جدًا سهل كنت اخلص القسم وباقي عليه ربع ساعه طلعت من الاختبار وانا كنت متاكد من كل الاجوبة انتظرت حدود 4 ايام وكنت مررره متحمس والحمدلله طلعت درجتي وكانت 100٪ بفضل الله وحَمده
نصيحتي الاخيره لكم لا تتوترون وتوكلوا على الله ومن اهم الاشياء الدعاء والوتر والثقه بالله واغتنام الاوقات الفضيلة وبما ان عاشوراء قرب لا تنسون تدعون فيه ان ربي يوفقكم ويحققلكم امانيكم
والقدرات مب نفس ما الناس يقولون عنه انه صعب ومستحيل بتوفيق ربي ثم الاجتهاد بإذن الله بتقدر تجيب الدرجة الي تبيها
واستودعتكم الله أعتذر عن الإطاله .
قناة تجارب القدرات : https://t.me/Kodurat1
قروب قدرات ثانوي : https://t.me/Kodurat2
قناة تسريبات قدرات : https://t.me/Kodurat3
-
لمشاركة تجربتك أرسل هنا @Tgarpqudrat_bot
5.1K views16:54