2021-02-03 15:35:44
#رجل_يقول
استيقظت وكنت بقمة الخمول فقررت أن أمنح نفسي إجازة بذلك اليوم
زوجتي و طفلتَي غادروا المنزل و قبل خروجهم قالت لي زوجتي " اعتني بنفسك عزيزي "
طبعاً هيدا الحكي المدبلج البلا طعمة ، ما أنا قبل شوي سمعتا عم تبربر و هي عم تلبس البنت " قال تعبان قال ما كل الأسبوع مرفّه من بعد الضهر و كل شي بيوصل ل عندو"
و ساعتا درت الاذن الطرشة ضليت مدفوس و صرت اتقلب عشان اقهرها بزيادة
المهم بس مشيوا عملت قهوه و سلخت سيجارة الصبح و اخدت نظرة ع المجلى ، ما هذااااا ؟؟؟ جلي عشا مبارح بعدو موجود نسوان آخر زمن .....
أول شي و من الزهق بلشت تخطرلي أفكار الحموات ، حضرتلا سيناريو و لحنت الموشح الغنائي للمقطع الطربي اللي بدي سمعا ياه بس ترجع
بس الزهق دبحني ولووو ، شو بيعملوا النسوان بالبيت؟!
رجعت فتت عالمطبخ لآكل شي ، و إذ بترجع تضرب عيني ع الجليات قلت ببالي : يعني بدي شوف شو هالشي العظيم اللي بس تبلش فيه بتصير تسرد مآسيها بالحياة
بدي إجلي
شمرت عن كمامي و طحشت بين الأنقاض مليان صحون و كاسات و معالق و سكاكين و في طنجرتين
انغمست بالجلي ، و ما هي إلا ثوانٍ معدودة، حتى بلشت بلوزتي تنقط و انا أفرك بالطنجرة ، و المياه تتقاطر من ثيابي و كواعي بما اني جديد ع المصلحة صرت مصبّر ع فرد جنب ......
بنص الجلي و أنا بقمة اندماجي طليت من الشباك بلاقي جارتنا قبالي عم تجلي كمان
كنت ع شوي رح قلا كيفك يا أختي شو الأخبار ، حولي نشرب فنجان قهوة
بس سكرت الشباك بسرعة خفت تشوفني ، أنا أصلاً بمشي بالشارع معرّم
المهم، طلعت روحي، ضهري حسيتو لوح خشب مصبّر يمكن صار معي هشاشة بالعضم من الوقفة، هيدا غير عن المي اللي وصلت لأصابيع إجريي
صراحة، آخر صحن كبيتو بالزبالة
ما خلصت جلي إلا و أنا من انصار حقوق المرأة، و أحد أكبر المتشددين ضد العنف الأسري
الله يكون بعون كل أم و كل اخت الله يعين اللي ما عندا بعل يحس فيها
صورت شكة الجلي و بعتلا ياها ع الواتس اب عشان ارفعلا معنوياتها و تنبسطلا شوي
بتقوم بتردلي ما دامك حميت و حميت شو بدك تطبخلنا
تنعطي لطشة إلهي طلعتي ما بتنعطي وج
والله ما خطرلي ساعتا غير كسّر بيض بالمطبخ
و إتزلج عليهم
بس قلت هلا بعدني متحمم عالمجلة بلاها
1.1K views , 12:35