2021-06-20 23:11:35
كل ما يمُر الوقت وتصير أكبر بتوعى بِـ طريقة رهيبة ، بتبلش تِبعد عن شغلات كانت بتعنيلك كثير بِـ يوم من الأيام ، بتِبعد عن أشخاص بِـ حياتك ما كنت متخيّل تعيش بدونهم يوم واحد ، بس بتِكتشف إنّك قدِرت وتخطيتهم زي أي حدث عادي ، بتصير تِفهم إنّه كُل ما قلّت المعارف كُل ما ارتاح راسك ، تِفهم إنّه في ناس بيجو وناس بروحوا وإنّه الحياة عُمرها ما وقفت على حدا ، بتِفهم إنّه مش كُل من قال وعد يعني صادق ، ولا كُل شخص قال مُستحيل أتخلى عنك يكون فعلاً هيك !
بتتعلم إنّه مُمكن يستغل ثِقتك وعلى أول مطب يبعد ، بتحِس هالشخص اللّي بِطمّنك هو أكثر حدا بجرحك و بكُل جرح بتحِس تصرفاته بتحكيلك :" أنا موجود لأخلّي ثِقتك تِنعدم بِـ الكُل وتشوف الكل زي بعض".
مع الوقت بتصير أقوى وبتحسب حساب لكُل خطوة بتمشّيها سواء بِـ معارف أو شغل أو علاقة ، بتِفهم إنّه كُل ما بعدت عن الناس كُل ما ارتاح راسك وإنّه الإنعزال هو مطلبك الوحيد ، بتبلش تحِس إنّه وِحدتك مش نقص ، وِحدتك هي عالمك الخاص ، أفكارك بتترتب فيها بِـ هداوة ، بِـ أغانيك اللّي بتحِبّهم بدون ضجة ، بِـ شغلات بسيطة كثير بتسعدك ومُمكن غيرك يشوفها اشي تافه.
كل ما تِكبر وتوعى بتبلش التغيّرات اللّي بتخليك تتجاوز عُمرك ، بتنهي النِقاش بِـ أسرع ما يُمكن ولو كان اللّي قبالك خطأ وإنتَ صح بتلاقيك تِلقائي بتحكيله " إنتَ صح ".
بقِل خُلقك لتتناقش وتِثبت وِجهة نظرك ، بتشوف مشكلة على مواقع التواصل وبتدخل لتكتب رأيك بعدين بتختار إنّك تتنازل عن رأيك لأجل ما يوجعك راسك.
مع مرور أيام وشهور وسنوات من عُمرك ، بتكتشف إنّه الوقت هو الحل لكل شي ، حل للتَخطي ، حل للتنازل عن علاقة هدمت فيك مشاعرك ، حل لإنّك تِختار شخص تكمل معه حياتك بعد سنين من الصِراع مع علاقة قديمة ، حل لترتيب الفوضى اللّي جواتك.
الوقت حل لَتوعى أكثر وتِفهم حالك أكثر ، وحل إنّه تبلش من جديد بِـ قصة جديدة وقلب نظيف ومشاعر جديدة.
كُل ما تِكبر رح تصير تحِبّ حالك أكثر وتنتبه لأي خطوة بتمشيها وتِفهم إنّه ما في إشي بِـ الدنيا بساوي راحتك وراحة قلبك .
766 views20:11