في أوقات كتير بنكون فاتحين النت عادي وندوس على رابط ونلاقي الر | محمد ماهر - للصف الثالث الثانوي

في أوقات كتير بنكون فاتحين النت عادي وندوس على رابط ونلاقي الرابط ده للأسف أخدك لموقع من الموقع اللي بتعرض أفلام وصور محرمة كلها مشاهد حرام × حرام ... بيحصل كتير جدا .. المشكلة إن فيه ناس بتتعود بقا على الصور والأفلام ديه وبيرضوا شهواتهم بيها .. أنا انهاردة - محمد ماهر - هكلمكم لو عندكم صحاب وقعوا في الذنوب ديه أو حد منكم مش عارف يقلع عن الذنب ده ازاي يخلص منه خالص بإذن الله

طيب هي ليه خطيرة يا محمد ؟ خطيرة عشان محدش بيشوفك غير ربنا ومع ذلك بتتجرأ وتعملها ... خطيرة عشان الرسول اتكلم عن ناس يوم القيامة هييجوا بحسنات قد الجبال لكن ربنا هيمحيها خالص ولا كأنها جت أصلا! الصحابة سألوا والرسول جاوب وقال : قوم كانوا إذا خلوا بمحارم الله انتهكوها ! ... كلمة قاسية أوي .. ناس لما تقعد مع نفسها بتنتهك حرمات الله ... بتعمل حاجة حرام .. عشان كده الذنوب ديه خطيرة جدا ومخيفة فعلا

المواقع اللي بتعرض الكلام ده هدفها في الأول والأخر حاجة واحدة بس هي إنها تقتل عندك "احترام الذات" ... احترام الذات بيموت عندك بعد ما تشوف اي لقطة من اللقطات القذرة ديه عشان انت عارف انها قذرة وده كله من الكبائر وحتى لو انت مش مؤمن ... هتحس برده بتأنيب الضمير وكره الذات وساعتها هتكره نفسك ... هو ده الهدف ... هدفهم انك تموت خالص من جواك متفكرش غير زي الحيوانات في شهواتك وبس ... مفيش دين ولا وعي ولا تقدم ولا نجاح ولا حاجة ... هو ده الهدف الأساسي ... انك تكره نفسك وتكره اليوم اللي اتولدت فيه كل ما تخش على حاجة من الحاجات ديه .. ده يا جماعة أقسم بالله المغزى والهدف الأول

الهدف التاني هو الفلوس الضخمة اللي بيعملوها من ضحكهم ع الشباب ... الواحد من دول يقضي الليل يتفرج ع مشاهد قذرة والموقع عمال يعرض اعلانات ويكسب مليارات مش ملايين كمان ... وانت للأسف اللي بتدعمهم ... هو ده الهدف ... يقتلوك من جواك ويقتلوا جواك اي احترام لنفسك ... تكون عبارة عن حيوان عمال يدور في القاذورات عشان يرضي نفسه وبالحرام كمان !! ... الإنسان ساعتها بيوصل لمرحلة وحشة لكره الذات وجلد الذات ... وده لوحده بيؤدي لمصايب تاني كتير ... ومخك مع الوقت مش بيكتفي بلقطة ولا اتنين مخك بيكون زي الحيوان ساعتها لازم ياخد أكبر جرعة ممكن عشان الجرعة القديمة مش بتأثر .. والموضوع يزيد مع الوقت

ثم إن كل اللي بتعرضه المواقع ديه عبارة عن كبيرة من الكبائر ألا وهي الزنا ... + كله تمثيل في تمثيل + انت بتدعمهم عشان يكملوا ... ومش كده وبس .. انت بتخون الأمانة أصلا وبتخلي ربنا أهون الناظرين إليك ... يعني محدش يعرف غير ربنا وربنا شايفك وبرده مصمم ع الذنب .. لازم الواحد يفوق قبل ما يفوت القطر ... وعلميًا كمية الدوبامين اللي مخك بيفرزها ساعتها ليه أضرار ضخمة عشان زي ما قلتلك مخك مش هيكتفي بلقطة ولا اتنين .. مخك هيبدأ يغير معتقده ويبدأ يشوف إن ده عادي ويبدأ يتعود على كميات ضخمة .. الغيرة في قلبك هتموت وأي حاجة سليمة هتحس إنها بتتغير مع الوقت وكل حاجة شاذة غريبة هتشوفها عادي ..

طيب العلاج ايه ؟؟؟؟ 1- لازم تقتنع تماما زي ما قلتلك بكل اللي قولتهولك وتعرف من جواك ومن كل قلبك ان كل ده غلط جامد وبتشوف كبيرة من الكبائر .. وتفهم احترامك لذاتك وكل ده .. بعدها تخش حملة تنضيف لحياتك ... يعني تقوم وتحذف اي صاحب كان بيشجعك ع كده .. تحذف اي تطبيق وتحجب اي موقع وتخرج من اي جروب وتخلع من اي حاجة ليها علاقة بالذنب ده خالص ... لازم تقوم وتعمل حاجة مينفعش تفضل قاعد في النفس البيئة وتستنى تتغير ... مستحيل ده يحصل مستحيييييييييل ... قوم دلوقتي يلا وغير كل حاجة بتوصلك ولو للحظة للذنب ده .. قرر تتوب دلوقتي حالا .. دلوقتي .. اصدق الله يصدقك ..

2- تاني حاجة لازم يكون فيه هدف في حياتك كبير ومغزى عايش عشانه ... (مش شرط يكون هدف واحد ولا حاجة .. بس قصدي يعني يكون فيه عموما اهداف بتجري وراها وتطوير لنفسك وحاجة بتعملها بترفع احترامك لنفسك وبتعلي قيمة نفسك قدام نفسك .. ) معظم الذنوب ديه بتكون عشان الانسان فاضي من جواه وفاضي في وقته ع طول وقاعد مش بيفكر في حاجة ... لازم يكون ليك هدف واضح ومحدد بزمن وبتشتغل عليه كل يوم ولو حاجة صغيرة ... لازم كمان تكون مشغول ... مينفعش تفضل قاعد طول اليوم لا شغل ولا مشغلة وفي الاخر مستني العلاج يجيلك لحد عندك .. مستحيل .. نفسك إن لم تشغلها بالحق شغلتك بالباطل ... لازم تعمل حاجة ويكون ليك هدف محدد بزمن ...

3- طيب يا محمد دلوقتي انا طبقت كل ده بس جيت بعد يومين كده ووقعت تاني ... ايه الحل .. الحل انك تقوم وتفتح الجبهات ع الشيطان ... يعني لو الشيطان غلبك زي ما قلنا في معركة واحدة ... انت لسه مخسرتش الحرب ممكن تقوم وتصلي وتستغفر وتدعي ربنا وتتصدق وتساعد حد وتعمل صلة رحم وتعمل وتعمل وتعمل ... لو غلبك في مرة ... قوم ع طول وزود رتم العبادة عندك والايمان وقوم ارفع معنوياتك وقرب من ربك اكتر ...