أستاذ عمرو عيد بيقول : من أكتر الحاجات اللي هتساعدك في Caree | محمد ماهر - للصف الثالث الثانوي

أستاذ عمرو عيد بيقول :

من أكتر الحاجات اللي هتساعدك في Careerــك و البيزنس الخاص بيك و دراستك.. المحافظة قدر الإمكان علي الصفاء الذهني و الهدوء النفسي، اللي هم مش معناهم البرود، لكن القدرة علي التركيز في المهم، و تخليص المخ من الضغوط اللي مبهدلة أكلك و نومك و ذاكرتك و مزاجك.


ماتدخلش نقاشات و جدالات في أمور انت عارف إن رأيك فيها مش هيفرق. ماتدخلش معارك مش بتاعتك، ماتنحازش لأحد أطراف مشكلة انت مش عارف تفاصيلها.. ماتقارنش نفسك بـ Lifestyle حد معين و حياته و رزقه و صحته.. لكن ممكن تقارن نفسك بشطارته في مجال معين و قدرته علي الكسب.. قارن نفسك بيه هنا و خليه قدوتك و مسطرتك.

لو بتشتغل.. ذاكر و طور نفسك مع الشغل. ولو لسة بتدرس.. اشتغل ولو Part-time مع مذاكرتك. ماتسيبش فراغ للأمراض النفسية تدخل منه.
اقطع علاقتك بالأشخاص اللي كلامهم بيشفط منك طاقتك الذهنية -- إلا لو كانوا والديك. لو كانوا والدين لازم تبرهم بس تحمي نفسك من أذاهم اللي ممكن يضيع دينك و دنياك.

ماتفتحش فيديو عنوانه فيه مأساة أو تفاصيل جريمة أو حادث مروع مهما كان عنوانه شيق، كل ده بيسحب من طاقتك و بيزيد من هشاشتك النفسية و بيمهد لاكتئابات و اضطرابات بتتسرب ليك تدريجياً و انت مش حاسس و مش هتعرف غير لحظة الانفجار - لا قدر الله.

اتعامل مع مخك كإنك راكب مرسيدس مايباخ لازم تحافظ علي صيانتها و ماتسمحش لحد يدخل جواها برجليه المطينة. ولو المرسيدس - اللي هي مخك - حسيت إنها مش طبيعية أو فيها مشكلة.. ماتتكسفش تروح لمركز الصيانة و تفتح الكبوت و تقوله شوفلي المشكلة فين يا باشمهندس.. اللي هي عيادة الطبيب النفسي.