تنازلك عن حقوقك في أي علاقة بيخليها تبوظ ومتكملش، على عكس اللي | جبر الخواطر

تنازلك عن حقوقك في أي علاقة بيخليها تبوظ ومتكملش، على عكس اللي ممكن تظنه! كل واحد فينا اتقصر في حقه، ورضى بأقل مما يستحق، وكان فاكر إنه كده بيحافظ على اللي موجود، بيتحمل جزء من مسئولية فشل العلاقة، بالرغم من حسن نِيته.. الفنان الجميل "فؤاد المهندس" في أحد لقاءاته مع مفيد فوزي، بعد طلاقه الأخير من "شويكار"، لما اتسأل عن إيه السبب في إخفاقاته العاطفية طول حياته، قال إنه كان بيرضى بالقليل، القليل اوي، وكان بيدي كتير من غير ما يفكر بياخد إيه، وإن ده في النهاية كان بيبوّظ كل حاجة.

كل يوم بصادف نماذج ورسايل علي الخاص وصراحه لناس تمادوا أوي اوي في التضحية والتنازل عن حقوقهم، وبتنتهي علاقاتهم العاطفية أو الإنسانية او الصداقة بفشل صعب ومؤلم.. معتقدش إن الموضوع صدفة أبدًا.

دفاعك عن حقوقك في أي علاقة، وتمسكك بإنك تتعامل بما تستحق، مش أنانية ولا ألاطة ولا عشان أنت شايف نفسك، مع إن مش مشكلة إنك تبقى شايف نفسك ومدرك تستحق إيه.. تمسكك بما تستحق هو اللي بيحفظ لأي علاقة الأمل في استمرارها؛ عشان معظم البشر لما بتتنازل عشانهم كتير، بيتمادوا، بيتمادوا أوي.. ولو كانوا بيقصّروا في حقك في الأول، هيدوسوا على وشك بعدين، ويستغربوا أوي ويلوموك لما تتوجع.