مسلم كريمه جفوفه ما ينكر معروفه ديوان اله بالكوفه ما يخ | الشاعر والرادود الحسيني ابو مجتبى الرماحي

مسلم كريمه جفوفه ما ينكر معروفه
ديوان اله بالكوفه ما يخله من ضيوفه
من كل الاجناس يستقبل الناس
^^^^^^^^^^^^^^^^^^^^^^^^^^^^^
مسلم باب للحاجات و الرغبه
وعند الباري صاحب منزله وقربه
كلمن يدك بابه ومطمئن كلبه
كل حاجاته يكظيها بأمر ربه
بالدعوه ارفع يدك وبذل يزاير جهدك
كول اطلب اشماعندك مسلم ابد ميردك
ليصيبك الياس يستقبل الناس
^^^^^^^^^^^^^^^^^^^^^^^^^^^^^
كبل جان الكريم و مكصد الخطار
لو ظلمة الدنيه ايكوم يشعل نار
ومناير عنده مسلم تضوي ليل نهار
تشوف انوارها و تتوافد الزوار

تباهي الشمس بنواره و يرحب بزواره
بالكرم فارش داره ويلوح الخطاره
بجفوف الاحساس يستقبل الناس
^^^^^^^^^^^^^^^^^^^^^^^^^^^^^
من بعيد لوح بيدك من بعيد
يكلك ياهله و ميت هله ابهالايد
يالتدخل مضيفي اطلب اشمتريد
احنا اشمانطينه الخير عدنه ايزيد
ميت هله وخي عونك ضيفي وكر عيونك
الخير فايض دونك وانته اغرف بماعونك
ومفايض الكاس يستقبل الناس
^^^^^^^^^^^^^^^^^^^^^^^^^^^^^
مسلم و الدخيل بحضرتك يسلم
دخيلك سيدي من ظلمة جهنم
يبو جف السمح عالخير ما احجم
للسائل طفح جودك مثل زمزم
مسلم مضيفك عامر ابكل المكارم زاهر
وبالحشر تحضر باجر تشفع ذنوب الزاير
وترد الانفاس يستقبل الناس
^^^^^^^^^^^^^^^^^^^^^^^^^^^^^
مسلم جوده وصل اقصى الجود
لمن ضحه روحه النصرة المعبود
جيش ابن الدعي بخيل وزلم منضود
لاواها و سحكها برجله مثل الدود
بالكوفه من لاكاها حملة علي راواها
و ما تفتهم خلاها يمناها من يسراها
بالحومه فراس يستقبل الناس
^^^^^^^^^^^^^^^^^^^^^^^^^^^^^
سبحانه الاله الرفع عاليها
رفع شانك يمسلم و فلحت بيها
الكوفه الجان ما عندك سند بيها
صارت لك اماره وصرت واليها

دولة امية اندحرت واثار اهلها انطمرت
كلمة الحق الظهرت ودولة حسين انتصرت
وتثبت الساس يستقبل الناس
___________________
الشاعر ابو مجتبى الرماحي