2022-08-31 12:44:33
وصار عندي رجال يتحكم بي ويفرض علي واجبات
حبلت من اول ليله
مع الحمل لازم اخدم بالبيت والخطاطير الي ماتخلص
كمل بيت كاظم وجتي شهله تعيش يمنا
وعمي بدء يبني بيوتنا الثلاثه
وبيوم ندك الباب وشفنا تابوت وعليه علم العراق وجنود جايبينه
طلعنا نلطم بدون مانعرف منو الشهيد بس اكيد واحد من الولد
وطلع حماي باسم عمره ١٩سنه
استشهد قبل مايتزوج وبعده بعز شبابه
فاجعه جبيره لعمي وعمتي فضيله
خيم الحزن عالبيت حتى التلفزيون ممنوع ينفتح مده سنه كامله
صحة عمي جاسب تدهورت حتى للشغل قلت روحاته والمعامل بيد المصريين لان ولده كلهم جنود
هو وزع المعامل ع ولده وشهله بقت تحجي ليش وليش خل من يموت كلمن ياخذ حقه ماعرف شنو تفكيرهه يمكن لان زوجها هو الجبير وتتوقع حايسيطر ع الورث
تقسيم عمي جاسب كان عادل مافرق بين ولده
ولدت اول طفل وسميته هشام
عمتي فضيله قللت ضغطها علي بس وسيله كانت البنت المدلله بالبيت ومحد يكدر يحجي وياها وعمتي تشتريلها ذهب ويخزنون وعمي كال من يكمل بناء بيوتنا يروح يبني بيتها
حماي عدنان تزوج ويانا بالبيت وزوجته علمتها عالشغل وتساعدني
جبت الولد الثاني وسميته احمد
بالنسبه لمحمود لان يجي اجازات كل شهر سبع ايام ميحاول يزعلني
مرات يتعارك وياي ويضربني اذا اشتكي من امه ومعاملتها
وهو يشوف بعينه تعاملها لكن ماينطي بيها
محمود بالعماره عالحدود مع ايران وعند انتهاء الحرب
رجعوا كل الجنود الا محمود واني حامل بالطفل الثالث
الناس فرحانه برجوع ولدهه وعمي كلبه مشتعل نار
من شاف ماكو محمود طلع للعماره يسأل ع محمود
وهناك شاف المصيبه
محمود مسجل مفقود ميعرفون وين ختفى
لاندري تأسر اثناء المعركه او نقتل
لما سالهم ليش ما بلغتونا كالو ننتظر يجوز متأسر
رجع عمي مكسور ودموعه ع خده
لا هو ميت وجايب جثته ويدفنه ولا هو أسير وننتظر يرجع
هنا اني نكسرت اكثر طفلين والثالث بطني بقيت أسيره
يم فضيله هي وظلمها
اذا جهالي يهوسون تصيح واذا يلعبون دكول توسخ البيت
واذا يتعاركون ويه جهال حماي دكول جهال بدريه وكحين
عمي جاسب لان نكسر من فقدان ولده جان يكظي الوكت بالبيت ويشوف بعينه
طلبت منه اروح اسكن بيتي اني وجهالي وحمويني يمي
ماقبل كال ماعوفج وحدج اول جيبي وبلكي نسمع خبر من محمود
ولدت الولد الثالث سميته ليث
فضيله ماتحملتني اني واطفالي طلبت من عمي يدزني لبيتي
بس عمي جاسب كاللهه حضري ملابسي اروح وياها ماعوفها وحدهه وابقى ادور ع ابني لحد ما اسمع خبر منه
لملمت اغراضي واخذت بس غرفتي
ورحنا اني وعمي وجهالي لبيتي
اول مره انام بدون ما اخاف تجي فضيله ترفسني حتى اكعد
انام وجهالي بحظني ومحد يكولي كومي طبخي وكومي غسلي
عمي مكسور وماله خلك يروح لبيته يم فضيله بالنهار ويجي بالليل
اشترالي اثاث طباخ وثلاجه وغساله وزوالي وفرش
طخم قنفات وانطاني مصرف وكال اشتري للولد ملابس
وراها دخل العراق حرب ثانيه وحصار وحرب اخرى
واني وحيده وكل فتره ندور ع محمود بلكي نلكي امل
حتى فكرنا اخاف محبوس وهم ماكو
كبروا ولدي بوجود جدهم عمي جاسب وهما كل فرحتي بالدنيا
عمتي فضيله صح بعيده عني بس هم تتدخل بحياتي لكن عمي مايسمحلها
وبيوم سمعنا كتشفوا مقبره جماعيه لجنود عراقيين ع حدود العماره
ومحمود كان من ضمن الشهداء المدفونين
استلمنا الرفاة ودفنا بالنجف
وصرت ارمله بعد سنين عشتهم بأمل يرجع ابو اطفالي
بعد سقوط النظام ولدي رادوا يرحون لايران يدورون ع اهلي
واني اخاف عليهم
ابني الجبير كال اروح وحدي
بدون جواز عن طريق مهرب ب ٢٥٠$
وراح والتقى بامي وابوي كال كبار وشياب
سويت جواز ورحت شفتهم بعد كل هالسنين الي عشتها
لا اكدر الومهم ولا هما يكدرون يلوموني هو هذا كان قدري
توفى عمي جاسب من قهره ع ولده
وعمي فضيله بعد زواج بنتها وابنها هم طلع بيته بقت وحدها
اخذتها عندي بقيت اداريها وهي مره جبيره ومريضه
مرات اباوع عليها اكول وين الجبروت وين التسلط الي جنتي بي
هسه وكعتي لا صحه ولا سلطه وتاليتج جيتي يمي
بس ماكدر احجي شي لا بعدين جنتي تسوي بي
لان كوله سلف ودين
ولدي يشتغلون وزوجت اثنين منهم صح ظروفي الماديه صعبه
بس الحمد لله من ربي رزقني باولادي هما فرحتي بهالدنيا
عمتي فضيله توفت عندي الله يرحمها ويغفرلها
هذه حكايتي بدريه
اتمنى وصلت رسالتي
اذا دعتك قدرتك ع ظلم انسان فتذكر قدرة الله عليك
لاتظلم احد تذكر بيوم راح تندفن جوه التراب وتتحاسب حتى ع الكلمه الي تنطقها
تدرون لو رايحه بذيج اللحظه ويه ابوي لايران شلون جانت حياتي شتتوقعون ؟
بس رب العالمين كتبلي ابقى بالبصره واعيش واتزوج واخلف بيها
شكرا لمتابعتكم اعزائي
النهايه
++++++++ فردوس عبد اللطيف ++++++++
325 views09:44