__ وينك حبيبي ؟ قلقتي بي ! ** احم ! بترد ساي يا خوة ؟ __ " زح التلفون من اضانه عاين للاسم و رجعو تاني " : احمد ! ** بحاول اتصل ليك مشغول من قبيل ! __ ايوا كنت بحاول اتصل على البت دي ! اها وصلت وين ؟؟ ** وقفت ياداب لسه ما دخلته ! قدامك كتير ؟ __ ايوا حتنتظرني شويه ** ما مشكله خلص و تعال حتلقاني منتظرك ! __ حتمسك زمن بالبرنامج البايخ داك صح ؟ ** قصي انجز يلا سلااام !
" في نفس اللحظة لمحا جايه عليه ، مد يده فتح ليها الباب ، لمن فتحت باب العربية و ركبت و هي مبتسمة و شايلة صندوق مفتوح من فوق كله كاتلوجات غريبه كدا و ظاهر عليها قديمة شديد " __ خامة شنو قدر دا ؟ جيبيهم اختهم ليك ف المقعد ورا "مد يدينو عليها " ** كاتلوجات قديمة كانت في المحل .. لالا خليهم م تُقال ، واقف من بدري ؟ __ خليك من وقفتي ؟ مصمته تلفونك ؟ ** م عارفه ، ليه دقيت لي ولا شنو ؟ __ ( دور العربيه ) اي و ما رديتي قلقتي بي ** معليشش حبيبي انا ! اها الاخبار شنوو ؟ ثم اني مشتاقه ليك شديد ، الرأي شنو ؟ __ الرأي !! ( قبل عليها و عاين ليها شديد ) شوقي ليك ما حتتخيليه بس منتظر اليوم التبقي مرتي فيه ! ** ااااخ بس … نقول يارب ، عرسنا دا بقى في احلامي ليل و نهار .. ربنا يتم المراااااد بس .. __ يارب هانت خلاص م بقى شي ** يارب ، المهم حبيبي ! كنت حابه اتكلم معاك في موضوع ! يعني ياريت لو نقعد في مكان ظريف كدا و نتكلم غير حقنا البنمشي ليه كل مرة !! __ قلقتي بي ! في شنو ؟ ** قصي ! م يبقى قلقك قريب كدا .. عادي موضوع حابه اتكلم معاك فيه و دا غير انه بقى لينا زمن م اخدنا مساحتنا و طلعنا و قعدنا قعدة طويله مع بعض ! و اصلا قلنا حنقعد في محلنا !
__ طيب دقيقه ( مسك تلفونو و عمل اتصال و خت في اضانه )
— الوو ايوا يا احمد ! اسمعني انا حجي المكان حقنا زاتو بس الناحية التانية ( الكافيه ) حتكون معاي خطيبتي عشان كدا م اظن اقدر اجي عليك لو عندك شغلة اقضيها انت لحد م اخلص و بجر ليك سلك ! اعفي لي جرجرتك معاي و شلت نص يومك انتظار كان اولى بيه بيتك ! احمد : عاين كلام جميل تعالو تعالو .. ( و قفل الخط ) __ ( زح التلفون من اضانه ) ، دا مالو قفل كداا معقول يكون زعل !!
** كنتو متواعدين صح نسيت انا كمان والله بس قايلاكم اتلاقيتو من بدري ! عاين انا موضوعي م مستعجل ، ممكن تمشي ليه !! __ هبلة انتي ؟ ي بت انتي الروح انتي بالدنيا دي كلهااا و بعدين براي متسبب والله مشتاق ليكي شديد اتخيلي حتى و انتي جمبي ! المهم ما حنمشي محلنا ، الليله حا اوديكي المكان البنقعد فيه انا و احمد ، فرصة تشوفي اصلاً لي فترة عايزة اوديك .. **اوووه حمستني ، الخوفه نلاقي احمد دا هناك __لا ما حنلاقيه كلمتو م ينتظرني الا بعد اتصل ليه ! و بعدين نفسي افهم مالك مع احمد !؟ انتي عارفه انه اقرب صاحب لي و زول اخو اخوان !! م قادر افهمك صراحه خصوصا انه م حصل ليك موقف معاه ، و لا كان في حاجة انا م عارفها ، كمان وريني !! ** م ملاحظ انك كبرت الموضوع !! __ لا م كبرت حاجة انا ملاحظ للحاجة دي و كل مرة بكون عايز اسألك ؟ ** شوف قصي ! صحبك دا انا م بعرفو عشان يحصل لي معاه موقف ! كل القصة عدم قبول و الله لله في لله كداا سبحان الله م بريدو كدا بس .. __ غريبه ! ** عادي ! القبول دا من الله __ و نعم بالله ..
( في جانب تاني ) #مكالمة ** الوو ! وينك ؟ __ داخله على البيت ** ( بي خلعه ) : ليه كنتي وين ؟ __ طلعت على الجيران شويه هه ** م مصدق ! طيب عايني ما تغيري ملابسك زي م انتي ! اخدي اقرب امجاد و اتصلي لي اديني ليهو عشان اوصف ليه ! __ في شنو يا احمد ؟ ** مافي شي ، بس عايزك تجي __ طيب ما ممكن دقايق بس اغير توبي دا و اللبس لي عباية ؟ ** اي ممكن بس سريع .. يلا منتظرك ! __ ( بي استغراب ) ! طيب
#في_جانب قصي #الكافيه
** دا مالو بيشبه اوزون كدا ؟ __ اي شديد لكن دا احلا ، قعداتو ظريفه ** شديد عجبني ! __ اها تشربي شنو و لا ناكل عديل احسن ؟ ** ما عارفه انا م جعانه شديد غايتو __يبقى نطلب لينا بيتزا ** تمام خليها ميكس جبن __ حاضر ، فراوله و لا ميرندا ؟ ** ميرندا
( طلبنا الاوردر و بقينا بنتونس بي موضوعنا عبد الواحد ، عن عرسنا و تفاصيله الكتيرة البنخطط ليها كل مرة ، نضحك مرة و نهظر مرة ! لحد ما تلفون قصي دق و عيني وقعت على الاسم لان تلفونو كان في الطاولة .. لسه بيعاين في الشاشه و عايز يمد يده على التلفون ، جاهو صوت زول بضحك و قاليهو ) __ رغم ان المكان ما بيضيع عشان م متعودين نقعد بالجهه دي ما اتوقعتك بي جاي والله فتشت ليك ما لقيتك قلت يمكن غيرت رايك و مشيتو مكان تاني .. ( قرب علينا و قالي استاذة ) ازيك ياخ ان شاءالله طيبة !
