ڕازه ڕازه یا ئهفسانه به ماناو بهسهرئامایوی خیاڵیا جه ژیوای بهشهری یام حهیوان و پهلهوهری یام بینهوهرێ خیاڵیێ که پهی وهشی و دهمهتهقێ دلێ خهڵکیهنه نهقڵ کریان. ڕاز ئهوهگێڵنای جه ویهردهنه ههر بیهن و ئهجدادٚێ ئێمه دایمه پهی زارۆڵاشا ڕازهشا گێڵناینهو تا یاوان لاو ئێمه که ئهگهر ئێمه وهروو خاترهو کهم وهختی ئی سوننهتیه تهرک دهیمێ، ههم خهسارێوی گهورهما یاونان زارۆڵهی و ههم پهی شکڵ گێرتهی شهخستهتیش هیچ کۆمهکێوما پنه نهکهردهن. ڕاز ئهوهگێڵنای پهی زارۆڵا، بۆ به هۆکاروو ئانهی سهتحهو هۆشوو زارۆڵهی جه کۆمهڵگانه بلۆ سهرهو و پهی شکڵ دای به شهخسیهتیش کاریگهری خاسش بۆ. ههر مێڵڵهتێو ڕازێ تایبهت به وێش باش، ئا مێڵڵهته ههم ڕیشهدارا ههمیچ فهرههنگێوی پوویاش ههن. شوکر پهی خودٚای ههورامان سهرزهمینوو ڕازان و دههها ڕازێ جه سهدٚها ساڵێ چهیوهڵ سینه به سینه و نهسڵ به نهسڵ دلێ خهڵکیهنه گێڵیاینێوه و چوون دایمه ئاخرێوی وهششا بیهن، مهنێنێوه . پێسهو فرهو ئا ڕازا تا پهنجا شهس ساڵێ چهیوهڵ بۆناخاترهو نهبیهی سهوادٚی و نهبیهی (ڕهسانهێ) دهم به دهم گێڵیاینێوه و فرهو خهڵکی زانێشا. ئی ڕازێ فرهتهر زارۆڵی و نهوجوانێ تاڵبشا بێنێ ههرچن جه دهموو پیراوه نهقڵ کریاینێ پێسهو ڕازهو شیرین و فهرادٚی و خۆرشید و خاوهری و لهیلێ و مهجنوونی و پێسهو ڕاهو زارۆڵا ورکڵه و تیتیل و بیبیل و مامۆ ڕواس و مانگڵه دیمێ و ماملێ وحهمهتهمهڵ و شێته و ژیره و .... ئی جۆره ڕازێ بێ شک ڕیشهی تاریخیشا ههن و تا چێوێو نهقۆمیابۆ یا کارهساتێو نامابۆ ڕوه، ئی ڕازێ وهشێ نهکریاینێ. کهسانێو که تاریخوو ههورامانیشا وانان یام به دهمواچ پهیشا گێڵیانهو وه یام کهسانێو ههنێ که حهتتا دهرکشا کهردٚهن، ههورامان بۆنهو کهم بیهو زهمینوو زهراعهتیش دایمه تووشوو گێچهڵێ ئامان یا وشکهساڵی یا جهنگ و جهڵهبه و ههڵمهتهو بێگانا بیهن هۆکاروو بێ دهسهڵاتی و کهم دهسی و بی رزقی. من فره دهموو پیراوه ئهژنیهنم ساڵهو گرانیهکهی. ئی ساڵهو گرانیه که ئهجۆ چن ساڵێ دهوامش بیهن، خهڵکی خهله نهبیهن کهروو هاردٚی. هاردٚه تفیشا واردٚێنێ یا لواینێ کهش نینۆڕشا واردٚهن. وهزعهو ههورامانی باز جه یاگانێوتهری خاستهره بیێنه چوون مڵکهکێ سهمهرشا بیهن یا کهشهکێ دار و درهخت و گیواو پهی واردٚهیشا بیهن. ئی کارهساتێ بیێنێ هۆکاروو ئانهیه ڕازێ وهشی با و زارۆڵهکێ چنی ئی کارهساتا ئاشنهی کریا. ئیبراهیم شەمس به #سلام_پاوه بپیوندید @salampaveh 4.3K views10:55