#وقفات { ولو أنهم فعلوا ما يوعظون به لكان خيراً لهم وأشد تثبي | • سَوَاعِدُ الأُمَّة • ⁦⁦💜

#وقفات

{ ولو أنهم فعلوا ما يوعظون به لكان خيراً لهم وأشد تثبيتا }

( الآية دي فيها أسباب الصلاح في الدنيا والآخرة )

في كل يوم بتمر على مسامعنا نصائح ورسائل دعوية ، ولكن ما بنشتغل بيها وبنمررها عادي ، ما بنعمل بالكلام البنسمعوا ونقراهو عشان كده بنظل في نفس الحتة ( الموحلة بالمعاصي وضيق الحال ) ونستغرب بعد ده كلو ليه نحن كعبين وامورنا ما ماشه كويس !

الواحد يقول ليك أنا مهموم طول الوقت واموري جايطة وما عارف اسوي شنو !

في الغالب حيكون الخلل في حياتوا سببوا ( البُعد عن الله تعالى )

وده كلام ربنا في القرآن : { ومن أعرض عن ذكري فإن له معيشة ضنكا }

نحن محتاجين وقفة مع أنفسنا ومراجعة لحياتنا

محتاجين #حياة_جديدة مع ربنا جل وعلا ، حياة خالية من المعاصي والمنكرات ، حياة فيها عبادات وطاعات ، حياة فيها مساعدة الناس وعمل الخير

بإختصار : ( حياة بترضي ربنا )

نحن في دنيا زاائلة كلها كم يوم وحنموت ، واتذكر انو الشيء الوحيد الحيظل معاك في قبرك هو ( عملك )

فهل حيعجبك عملك اللي كلو أغاني ولعب وبنات وضحك ومحرمات ؟!

ولا حيعجبك عملك اللي كلو طاعات واعمال خير وبر وحسنات ؟

هي ( حياتك ) أنت لازم تحدد وتختار

مافي زول حيديك من حسناتوا بعدين حتى ( أمك وأبوك )

قال تعالى : { حتى إذا جاء أحدهم الموت قال رب أرجعون لعلي أعمل صالحاً فيما تركت }

الحاجه البيتمناها أي زول لحظة #الموت هي الرجوع للدنيا وعمل الصالحات ، ما بيقول عايز اسمع اغنيتي المفضلة ، ولا بقول عايز اشوف زوجتي وحبيبتي ، ولا بقول عايز قروشي ، فقط بيقول لعلي أعمل صالحاً

{ وعجلت إليك رب لترضى }

وكل أمرك كله لله واعزم على الرجوع لربنا

وربنا سبحانه وتعالى قال :

{ قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم }

{ إنَّ الحسنات يذهبنَّ السيئات }

اللهم منَّ علينا بالهداية والصلاح والتقوى

#منتصر_محمد
t.me/sdmuslim