2021-11-30 19:34:07
مصلتيش ليه النوافل؟
=كسلت.
مقرأتيش ليه الأذكار؟
=كسلت.
مسمعتش ليه الدرس؟
=كسلت.
مش بعيد كمان تكسلي تكملي قراءة البوست دا...')
الكسل دا أكبر مشاكلنا في الحياة، وسبب في معاصي كتير، وممكن بسببه توصلي لإنتكاس..
الكسل خطوة من خطوات الشيطان بيستخدمها علشان يجرِّك بيها لمعاصي كتير..
مثلًا النوافل؛ يخليكِ تكسلي عن النوافل وتقولي ما كفاية إني بصلي الفروض، مع إن النوافل دي هي حصن للفروض وبتجبر تقصيرك في الفرض، ولو تركتيها بالتدريج هتلاقي نفسك تركتي الفروض كمان،
الشيخ محمد الغليظ قال -في كتاب هرم بلا قمة-: "فيظل يهدم حصون النوافل حتى يصل إلى قلعة الفروض"
يعني النوافل دي "الحصن" والفروض "القلعة"، فَـ لو الحصن دا اتهدم اعرفي إن الدور جاي على القلعة.
وهو دا الِـ الشيطان عاوزه، يخليكِ تتكاسلي و تتركي النوافل، بس هو مش هدفه النوافل، هو هدفه الفروض، عاوزك تاركة للصلاة..
د. خالد أبو شادي كان بيقول -في كتاب الحرب على الكسل-: "ليس الكسل فحسب هو مراد عدوك، بل ما وراء الكسل من استدراج إلى الزلل وسيء الأعمال"
هو دا بقا هدف الشيطان، هو مش عاوز الكسل هو عاوز الِـ بعد الكسل، عاوز يستدرجك لحد ما تتركي طاعاتك و يوصل لهدفه الأكبر الِـ أقسم لربنا بيه، وهو إنه يغوينا ويدخلنا النار معاه -والعياذ بالله- فَـ احنا مينفعش نساعده في إنه يوصل لهدفه دا بكل سهولة،
لازم يكون ليكِ هدف أكبر منه؛ أصل إنتِ لو ملكيش هدف واضح في الحياة بكدا تبقي بتسلمي نفسك للشيطان يتصرف فيكِ زي ما هو عاوز ويصنعلك هو أهداف توديكِ النار.
=طب أعمل إيه علشان أبطل كسل؟!
الشيخ يعقوب -ربنا يبارك في عمره- كان بيقول إن علاج النفس الكسولة= إجبارها على الطاعة.. نفسك مكسلة تقرأ وِرد القرآن؛ تقفي وتقوليلها لأ هتقرئيه بالعافية وتجبريها، مكسلة تقيم الليل؛ تجبريها على قيام الليل، متتهاونيش معاها وتنامي جنبها وخلاص أنا مكسلة أصلي النهاردة قيام مش مهم أبقا أصلي بكرا، بعده، بعده... وهكذا لحد ما تلاقي نفسك تركتي القيام خالص.. لأ، تفضلي تجاهدي معاها وتجاهدي وتجاهدي، وتشدي عليها.
احنا عايشين هنا في الدنيا دي وعارفين إنها مجرد اختبار ممكن الوقت يخلص في أي لحظة، بنجتهد ونبذل ونتعب ونسهر ونجاهد ونتحمل المشقة.. علشان النتيجة، علشان نوصل للهدف "الجنة".
جاهدي، اصبري على الطاعة، اصبري على الحجاب، اصبري على القرآن، اصبري على العلم، اصبري على البلاء.. لحد ما توصلي للهدف.
"من أراد المقام العالي؛ فلابد من البذل الغالي" واحنا عاوزين الفردوس فَـ هنبذل أقصى جهدنا علشان نوصلها.
كل ما تكسلي افتكري إن "الآخرة خيرٌ وأبقى" الآخرة هي الباقية، الدنيا دي فانية هنفارقها بكل زينتها ومتاعها، افتكري الجنة، تخيلي حوض النبي -صلى الله عليه وسلم- الِـ هو أشد بياضًا من اللبن وأحلى من العسل وأباريقه بعدد نجوم السماء الِـ عمرنا ما نقدر نحصيها، تخيلي يوم القيامة وإنتِ بتجري عليه علشان تشربي منه والنبي -صلى الله عليه وسلم- فرحان بيكِ وإنك كنتِ بتجاهدي علشان توصلي وأد إيه صبرتي علي الطاعات، تخيلي نعيم الجنة والِـ لازم تتعبي هنا في الدنيا عشان توصليله وتنسي كل تعب وصبر ومجاهدة في الدنيا.. ذكري نفسك ديمًا بالآخرة هتصبري على تعب مجاهدتك في الدنيا و تبذلي أقصى ما عندك لحد ما الامتحان يخلص، يقينك بلقاء الله وذكر الدار الآخرة أكتر حاجة هتخليكِ مُنطلقة في الطاعات وتتركي الكسل والسكون.
استعيني بالله، وادعي إن ربنا يعينك ويقويكِ على مجاهدة نفسك.
اقرئي كتاب "الحرب على الكسل" للدكتور خالد أبو شادي، الكتاب صغير وبسيط ومفيد جدًا، اقرئيه بتركيز مش مجرد قراءة عابرة واكتبي في نوت كل نقطة مهمة أثناء قراءتك؛ علشان تحققي الاستفادة منه بجد، والأهم من القراءة "التطبيق".
اعملي لنفسك خطة، الشيخ حازم شومان كان بيقول إن الِـ ملوش خطة فهو خطة للشيطان يسوقه لأي معصية، لأن طالما مفيش خطة هيبقى في فراغ، ولو في فراغ هتضيعي وقتك حسب ماشيطانك يسوقك، وأكيد مش هيسوقك غير لمعاصي، اعملي خطة وطبقي فكرة "التودو ليست" اتكلمت عنها في بوست في الألبوم دا (رابط البوست في التعليقات).
أعاننا الله وإياكم!
#كوني_عائشة
#ءاية_سعيد
156 views16:34