هواي مشتاگين ارحمو بحالنه بس صوركم بقت تتراوالنه بكل ذكره نشت | قناة مسلم المطيري
هواي مشتاگين ارحمو بحالنه
بس صوركم بقت تتراوالنه
بكل ذكره نشتاگ ..تعبنه الفراگ
ارحمو ابحالنه
---------------------------
هالسنه بهذا محرم .. فاگدين اشكد شباب
مشو ظلت بس صورهم .. تاكل ابگلبي عذاب
ويانه چانو بالمجالس .. نلطم ونحيي المصاب
السنه الراحت يمنه چانو .. وهالسنه جوه التراب
ليش عود الموت دوم ابابنه
دوم يلچمنه بأعز احبابنه
بگلبي البعد راگ .. تعبنه الفراگ
ارحمو ابحانه
---------------------------
أربعين حسين اجتنه .. اعليكم احنه امعلمين
هذا ينصب خيمه ذاكه .. بيده يطبخ للحسين
زاير اعليكم نشدنه .. وفاظت ادموع الحنين
بس صوركم بقت يمنه .. بالمگابر نايمين
اجان يتلكانه حافي ابمايه
معلكه بس صوره الهم هايه
منا اظوه انباگ .. تعبنه الفراك
ارحمو ابحالنه
---------------------------
لو مشه ابكل خطوه خدمه .. وياهم الممشه حله
واهس أو رفگتنه حلوه .. بيهم الهم انجله
راح اليلاگي اليزورك .. سِنّه يضحك بالهله
حسين يحضر لليخدمه .. نعلم ابهل مساله
مايعوف احسين ابد خدامه
بالكبر يحضر ترى گدامه
بس دمعي حراگ .. تعبني الفراگ
ارحمو ابحالنه
---------------------------
مسافرين اعزاز گلبي .. سكنو ابوادي السلام
ابد ماطول حلمهم .. هاجروا مثل الحمام
ورود چانو بالمجالس .. تذبل ابطاري الخيام
والجزع عدهم هويه .. لو ذكرت أنه السهام
ياسهام الموت مري اخذينه
للطفوف وخل نشوف اسكينه
بس نلزم الباگ .. تعبنه الفراك
ارحمو ابحالنه
----------------------------
اليوم من دون الليالي .. حيل گلبي ينعصر
گلبيت اصورنه واذكر .. حلوه لمتنه العصر
گلتو ميفرقنه موت .. وهسه ضماكم گبر
اشكي لله الفركه صعبه .. والله ينطيني الصبر
روحي مشتاگه وتحوم ابابكم
والله مو هين علينه اغيابكم
علينه الحزن لاگ .. تعبنه الفراگ
ارحمو ابحالنه
---------------------------
حسين الزيدي
