خليته خالي المهد يبني والمن الولي بعد يبني دللول دللول. عبد ال | الشاعر تحسين الخفاجي

خليته خالي المهد يبني
والمن الولي بعد يبني
دللول دللول. عبد الله يبني
*"""****
يسباح الكلب. دمع عيني يصب. تكتل فركتك. تكتل فركتك

غصن عمري ذبل. وصحت راح الأمل.
وانه بعازتك. . انه بعازتك

فكد الولد ما ينحمل. وانه الولد فاركته
جنت احلم بذاك الحلم. وعبد الله يكبر ردته

جا ليش اضيع الربه يبني
خدك منو التربه يبني
دللول دللول عبدالله يبني
**
يوليدي الرمح. ذابحتي ذبح. وزيد لوعتي. وزيد لوعتي

انه امك عبد. ساكت ما ترد. عاين حالتي. عاين حالتي

مليت من هم دنيتي. اهواي الزمن تعبني
ضليت اكمط بالرمح. حسبالي اكمط ببني

نايم كلت لا تفز. يبني
بجفي المهد كمت اهز. يبني
دللول دللول عبد الله يبني
****
شعز من البزر. نفذ حته الصبر
يوليدي اتعبت. يوليدي اتعبت

ذبح حلمي السهم. وثيابك كلها دم
من شفتك طحت. من شفتك طحت

وين الله يوليدي وتفز. ونضرلك اتناغيني
بجفك ردت يا سلوتي. تمسحلي دمعة عيني

بعيوني شح الضوه. يبني
وعليه ضاع الهوه يبني
دللول دللول عبد الله يبني
****
زغير اعله الذبح. خذك ليش الرمح
وعطشان اشكثر. وعطشان اشكثر

يبعد امك صحت. عليك اتعودت
الياحد انتظر. الياحد انتظر

يوليدي من تبجي جنت. اركض وصيح اسم الله
جا ليش ناديت السهم. يكطع نحر عبد الله

بهدومك اكعد وشم يبني
ونباك مني الحلم يبني
دللول دللول عبد الله يبني
****
رحت يرويحتي. وبكيت بحيرتي
وبكلبي الجرح. وبكلبي الجرح

غيابك مو سهل. صدك يكتل كتل
يا وجه الصبح. يا وجه الصبح

يالما وصل عمرك سنه. عكبك اشلون اتهنه
يوليدي ما جنك بشر جنك اطوير الجنه

ويه مهدك اتعاتبت. يبني
جا ليش مني رحت. يبني
دللول دللول عبد الله يبني
*******
بوداعك شيبت. والف مره متت
تانيتك ترد. تانيتك ترد

ابوك بحيرته. وينادي بغربته
مذبوح الورد. مذبوح الورد

من شمر دمك للسمه. ما منه طاحت كطره
يمه عبد دمك تره. اتلكته اهناك الزهره

لوحة طفوله رسم. يبني
الكون انكلب كله دم. يبني
دللول دللول عبد الله يبني
****
تمت
تحسين الخفاجي