ليش كل ما نام اجر كوه النفس يا علي البسمار بضلوعي انغرس وانه ع | الشاعر تحسين الخفاجي

ليش كل ما نام اجر كوه النفس
يا علي البسمار بضلوعي انغرس
وانه عنك من اروح انته تبقه بلايه روح يله ودع فاطمه
********
ما افكر بالجرالي علي تدري بيك افكر
انه كلبك وانه روحك ولو تركتك صعبه تصبر

اشما اغمض عيني الكاك اعله بالي
انه اخاف اعليك تذبل وانته غالي
ليش لازم ضهرك ودمعك يلالي
ادري مني البيت راح ايصير خالي

يا علي خلينه نتباره الذمم
ادري عندك فركتي مثل السهم
انه كتلتني الجروح وانته تبقه بلايه روح يله ودع فاطمه
*****
ليلي خلص بس مناحه وفوك خدي يجري دمعي
صعبه ينسه الجرحه ينزف ألماني اهواي دمعي

علي ما ضل شي بعد ويصير الوداع
والايام الحلوه جانت خلصت بساع
صارت جروحي سفينه ودمعتي اشراع
والعمر بين المصايب والحزن ضاع

الشافت العصره وضلع منها انكسر
صعبه نومتها تصير اعله الضهر
بحركه لفراكك انوح وانته تبقه بلايه روح
***
باجر امشي تدري عنك وانته تبقه بلا حبيبه
واليفارك اغله ناسه اهواي يكثر شفنه شيبه

انته من بعدي يحيدر صعبه ترتاح
نبقه انه وياك نتلاكه بالارواح
ليش دمعك عالوجن مثل الجمر طاح
علي ودع فاطمه حته الهوه صاح

العبره تخنكني امن اكول اشلونك
وانته ذبلانه عليه عيونك
اتهدمت بيه الصروح وانته تبقه بلايه روح يله ودع فاطمه
********
يا محمد صرت انادي جيتك اشكي امن الصحابه
يالوصيتك خالفوها انغصب حكي ابلا مهابه

ليش دار النبي ناديت احركوها
روعوني وعيني يابويه اسطروها
كلها صاحت فاطمه حيل اعصروها
هالجريمه اعليه كلهم خططوها

شاهدت محسن يموت اكبالي
ابني هيج ايروح ما حسبالي
بانت القصه بوضوح وانته تبقه بلايه روح يله ودع فاطمه
*******


صحت فضه سنديني والمدامع تجري ضلت
احترك داري وانه احاول والعباتي النار وصلت

الظالم ايكلهم وان اسمع بذاني
هجموا عله الباب واحد وره الثاني
اخلص امن السطره ذاك بصوطه اجاني
والكسر ضلعي سمعته شتماني

وانه بالنار اشكثر جفي انجوه
اعليه من كثر العصر ضاع الهوه
بضلعي ماريدن ابوح وانته تبقه بلايه روح يله ودع فاطمه
*****
تمت
تحسين الخفاجي