2022-04-30 05:35:47
حركة تكليف كليات التمريض
ان شاء الله في البوست ده هنتكلم عن مميزات وعيوب كل جهة
احنا عندنا اربع جهات التكليف :
جامعة، صحة، أمانة، تأمين
أولاً:
مميزات وعيوب المستشفيات التابعة للصحه
#المميزات
_ العمل 36 ساعه ثلاث ايام اي حد عنده غير كده يبقي ده سيستم عندك احنا بنكلم في الطبيعي ومتاح في كتير من المستشفيات
_ المكان بيكون قريب ليك مش بتاخد موصلات كتير
_ في نظام يومي من 9 الصبح لـ 2 الظهر علي حسب الاتفاق والروستر والنبطشية والسهر كل مستشفي تختلف عن الاخري
_ المرتب 2500 ج مرتب الحكومه بيزيد بالسهر والنبطشية يوصل 3
_ الشغل بيكون خفيف
_ ميزه جميلة تعمل اجازة في اي وقت اهم شيئ حد يكون بدالك
_ ميزة السفر بـ توقف عادي حفظ وظيفه بدون مرتب وتسافر اي وقت بس بعد مدة معينة من التكليف عشان القانون الجديد السنادي
_ بيكون سهل تعدل تكليفك عادي بس بياخد وقت وامضاءات وواسطه
_ الحصول علي سنة تفرغ بمرتب بعد مرور سنتين التكليف لو حبيت تحضر ماجستير وهكذا
_ الحصول علي أجازات رعاية طفل بسهوله
#العيوب
_ هتتوزع اي مكان سواء حابه او مش حابه هو كده
_ هتشتغل في قسمك وفجاه تعال Help في قسم تاني
_ هتسهر اجباري عشان متقولش مش معنا انا ومش معنا هو
_ مش هتلاقي دورات كتير ولا كورسات فا انت اعتمد علي نفسك بالكورسات بالخارج
_ هتتعرض للعدوي بسهوله لان بعض الاماكن غير نظيفه او قلة المستلزمات فيها وان شاءالله تطور عن قريب
_ شغل خفيف شويتين بس الطوارئ والرعاية شغل ضغط والتزامات
_ فجأه تلاقي نفسك روحت انتداب أي مكان
_ عيوبها الريسه هيكون عليها ضغط كبير و اوقات لازم تيجي عليك في نبطشية او سهر او تنزل العيد
_ الإشراف بيكون ببطئ شوية عما يجي دورك ممكن تعد سنتين او اكثر
ثانياً:
مميزات وعيوب مستشفيات أمانة المراكز الطبية المتخصصة
#المميزات
_ العمل 36 ساعة يعني ما يعادل 3 أيام
_ المرتب كويس
_ مستشفيات نضيفة وجو نضيف و هتحب الشغل فيها لنظافة المكان و توفير كل المستلزمات الطبية ليك
_ ليك وجبات فطار و غداء نضيفه
#العيوب
_ عدم وجود مكافأه نهاية الخدمة
_ صعوبة نقل التكليف غير بموافقات وامضاءات وواسطه
_ صعوبة عمل أجازة غير بالاتفاق
_ التشديد شوية و صعوبة السفر للخارج غير بموافقات من الوزارة
_ ضغط الشغل
ثالثا:
مميزات وعيوب مستشفيات التأمين الصحي الشامل
#مميزاته
_ القبض عالي بيوصل من 7 الاف الي 8 الاف
_ المكان لسا جديد فتلاقي المكان نضيف جدا
_ هيطوروك بمعلومات ودورات وكورسات مستمرة
_ ليك تشتغل في الوحدات الصحية
_ هيوفرلك سكن خاص بيك وبورسعيد السكن بتاعهم جمب البحر في فندق
#العيوب
_ الغربة
_ مش هتعرف تشتغل برايفت في مكان تاني لأن العمل شبه يومي باضافة الاجازات العادية هتقعدها في السكن
_ صعب انك تنقل علطول تكليفك غير بواسطه كبيرة وليله بيضه كبيرة وأمضاءات نائب وزير الصحة وهكذا وعضو مجلس نواب
- الخصومات عاليه جدا في المكان ده اي غلطه اقل حاجه خصم الفين جنيه
- لو التأمين الصحي فتح في محافظتك صعب انك تنقل بعد كده
اخيراً:
مميزات وعيوب مستشفيات الجامعة
#المميزات
_ العمل هيكون 36 ساعة في الأسبوع يعني 3 ايام
_ هتوفرلك تشتغل في الأقسام اللي حببها وده بالاتفاق مع المشرفين
_ مرتبك الي حد ما كويس سيكون فوق 3 ألاف
_ بتمسك إشراف بسرعة
#العيوب
_ مش هيسبوك تسافر علطول أي دولة خارج مصر
_ مش هتعرف تعمل نقل تكليف غير بواسطه كبيرة وامضاء نواب مجلس شعب ومش هتعرف تعمل انتداب
_ مش بالساهل تعمل أجازة
_ أي حاجة وزارة الصحة هتقولها مش هتنطبق عليك لانك تابع لوزارة التعليم العالي
_ أي شكوي مش مسموح ليك تقدمها في وزارة الصحة مباشرة الشكوي توجه للعميد ومدير المستشفى ثم التعليم العالي
_ ضغط شغل لان المحافظة كلها هتلاقيها عندك في مستشفى الجامعة فا لازم السرعه في العمل وخاصة في الطوارئ
بالتوفيق للجميع
519 views02:35
م
