نجي نجاوب على السؤال الكَوني هل أكو صداقة بين الولد والبنية؟ | فَكِّرْ
نجي نجاوب على السؤال الكَوني هل أكو صداقة بين الولد والبنية؟
حتى تجاوب على السؤال لازم تعرف شنو معنى الصداقة، اول نقطة:- الصداقة هيّ علاقة مابيها أي حدود بينك وبين صديقك، بحيث تكدر تحجيله أي شي، حتى الشغلات العيب، تكون بينكم حرية مطلقة، تتبادلون الأسرار وكل شي وهذا الموضوع غير مُمكن معَ البنت بتاتًا!
ثاني نقطة:- الصداقة علاقة مفتوحة وليسَت مُقيَّدة، الصداقة مابيها غيره، مابيها إهتمام يومي وبشكل متكرر، مابيها وين جنت، مابيها منو هاي الوياك، مابيها منو هذا الوياج، مابيها مكالمة بالساعات، الصداقة مابيها عِتاب وتحقيق، أي فعل من ذني الأفعال هيّ تقيّيد والتقيّيد ماله أي علاقة بالصداقة، أي شعور بي عاطفة قريبة للحُب فهو عبر مرحلة الصداقة.
ثالث نقطة والأهم:- الإنسان كائن بايولوجي الله خلقه وخله بي مشاعر غريزية تجاه الجنس الآخر، هاي المشاعر هيّ فطرة طبيعية وميّز الإنسان عن الحيوان أن الإنسان يكدر يتحكم بهاي المشاعر الغريزية الجنسية وما يظهرها بشكل مباشر وعلني، أما الحيوان فما عنده عقل حتى يتحكم بمشاعره لذلك نشوفه يظهر غريزته بكل مكان. إذن الإنسان يكدر يتحكم بغريزته الجنسية، (بس هذا مايعني انهُ يكدر يلغيها). مادام عنده غريزة جنسية فراح تدفعه الغريزه دائمًا اتجاه الجنس الآخر .. من بنيه لولد او ولد لبنيه. وغالبًا ما يكون الإندفاع من الولد بإتجاه البنيه
والصداقة ماهيّ إلا باب يُمكن من خلاله عبور المشاعر الغريزية الجنسية الى الطرف الآخر. لأن اليدوّر صداقة من البنية فهذا يدور حُب، واليدور حُب يعني يدور علاقة عاطفية، والعلاقة العاطفية أساسها هو الجنس. فالصداقة وذن المسميات هيّ وسائل غريزية فقط حتى يوصلون لنقطة وحدة وهيّ الجنس. وهذا الشي هو فطرتنا ومو عيب ولا حرام الدا احجيه، بالعكس لازم تعرف الحقيقة حتى تكدر تتحكم بيها وما تخليها تنگلب ضدك بيوم من الأيام، المختصر يا احبائي، ماكو شي اسمه صداقة بين الولد والبنية، ماكو شي اسمه بيست فريند ولد او بيست فريند بنية، واذا لساعك مُصر على الموضوع فأنتَ دا تغشم نفسك، اكو زميلة عمل نعم، اكو زميلة دراسة، اكو زميلة بالمواقع ترد على ستورياتك وترد عليها ، تدزلك اغنية تدزلها اغنية وذني الامور، اي مُمكن لكن صداقة (ناهي)
