اكتر سؤال بيجيلي من طلاب ثانوي الفترة دي انا لسه ما بدأتش مذ | ميديا تعليمي
اكتر سؤال بيجيلي من طلاب ثانوي الفترة دي انا لسه ما بدأتش مذاكرة.. هل لسه فيه وقت اذاكر و اجيب مجموع؟
قبل ما اجاوبك على سؤالك عندي سؤال اهم هل انت عايز تجيب مجموع؟ فيه هدف يعني يخليك تذاكر و تتعب عشان تحققه ولا انت بتسأل السؤال عشان اقولك اه لسه في وقت و بالتالي تريح ضميرك ف تيجي بعد شهرين تسألني نفس السؤال و انا اجاوبك نفس الاجابة !
طب مبدأياً كده الحاجه الوحيدة اللي هتخليك تبذل مجهود هي إن يكون عندك دافع قوي و الدافع ده هو هدفك اللي انت مستعد تضحي بأي حاجه عشان تحققه
فأنت تخلي هدفك ده دايماً امامك و كل ما تكسل فكّر نفسك بيه و فكّر في الاضرار المترتبة عن عدم تحقيق الهدف فكّر في اهلك اللي نفسهم يشوفوك احسن حد في الدنيا فكّر في الناس اللي بتراهن على فشلك فكّر في يوم النتيجة..
لازم تعرف ان المشكلة مش مشكلة وقت بالنسبالك اد ماهي مشكلة كسل و اهمال و عدم إدراك للأمر
نرجع للسؤال بتاعك بقا، هل لو بدأت هلحق اخلص و اجيب مجموع؟
اكيد طبعا هتلحق تخلص و تراجع و تجيب مجموع بس بشرط لازم تقوم تبدأ دلوقتي و تحاول تتخلص من اي حاجة ممكن تعطلك عن المذاكرة حتى لو كانوا اعز اصدقائك لو هيعطلوك حاول تتخلص منهم مؤقتاً لحد ما تحقق هدفك
حاول تشجع نفسك للمذاكرة بأي طريقة، حط لنفسك اهداف قصيرة المدى و لما تحقق الهدف كافئ نفسك و ارجع حط هدف تاني و كافئ نفسك و هكذا لحد ما توصل للهدف الاساسي و تاخد المكافأة الكبرى و هي نجاحك
