اعجبني فنقلته لكم تقول : اللي رتّبت بيتها وبخرته ولمعته و | مُتفائل ..⁦

اعجبني فنقلته لكم

تقول :

اللي رتّبت بيتها وبخرته ولمعته وصورته نزلته على مواقع التواصل ..

ما يخليك تفكري إنو بيتك وسخان وإنو هي برضو عندها أطفال وقادرة تكون منظمة ومرتبة ووقتها طويل .. لا!

هي اختارت الوقت المناسب لالتقاط الصورة دي، ودا مابيعكس حياتها..

اللي استحمت وغيرت ولبست احسن ما عندها ووقفت في احسن زاوية في البيت وشاركتها على صفحاتها...

مايخليك تفتكري إنها دايماً مرتبة وابداً ما بكون ماعندها طاقة الليلة تسرح شعرها أو تستشوره وتعمل ميكب .. لكن هي اختارت تنزل أكتر لحظة شايفاها مناسبة واختارت الوقت المناسب.

اللي كتبت إنو زوجها اعظم راجل، وحياتها حلوة وبيديها كل حاجة...

كتبتها في لحظة مشاعر حقيقية، حدث حبّت توثقه وذكرى حبت تحتفط بيها في اللحظة المعينة دي، ودا مابيعني إنه حياتهم كلها عسل وقشطة وعمره مازعلها وعمرها ما غلطت في حقو، بس هم اختارو اللحظة دي تحديدًا وقررو يشاركوها ، لانو مافي زول بحب يتذكر زعله ويجيه في الميموري مثلاً!

وهكذا الحياة..

ماتحكم على الشايفو من زاوية وحدة، ولا من مكانك الإنت فيه ..

ماتتمنى حياة غيرك اللي إنت ماعارف أي تفصيلة من تفاصيلها غير الهم اختارو بكل الدقة مشاركتها ليكم، ماتلوم نفسك عشان شايف مجرد صورة لواقع مليان تفاصيل عظيمة وكبيرة وكتيرة شديد!! كتيرة شديد حتصدمك لو عرفتها..

كلنا بنتعب ، بنخلي البيت جايط مرات كتيرة، شعرنا منكوش ووشنا شاحب وتعبانين
كلنا مرات كتيرة مابكون عندنا طاقة، ودا طبيعي جداً ..

لما تكون قادر أعمل والبس وافرح وأعمل كل اللي نفسك فيه وشايفو بيسعدك

ولما تكون تعبان ارتاح، نوم، استريح، انت مابطل خارق ولا لازم تكون بيرفكت 24 ساعة، خلي الدنيا جايطة ومقلوبة ..

واتغطى
ونوم
لأنو راحتك.. فوق كل شيء .

#Vibrant.