2022-04-25 23:14:32
مرة وحدة حكتلي " ما تستقوي حالك " يعني ما تعملي حالك جدعة وقادرة ع كلشي، أنا عارفة إنك قوية وعندك مسؤولية وبنت قد حالها .. بس اللي حواليكي لما بشوفوكي هيك بتعودوا وبعتبروا عطفك وتفهمك وتحملك وقدرتك ومساعدتك صار حق مكتسب! وبالآخر رح تضطري تشيلي كلشي لحالك ..
واللي بتقدميه من باب التطوع والعطاء رح يتحول لواجب ملزم فيكي ويحاسبوكي اذا قصرتي فيه!
بالحقيقة كنت بفكر إنو القوة والجدعنة وقدرة التحمل بتتقدّر أكثر من الضعف والإتكال ..
بس للأسف الحقيقة كانت مختلفة.
لما الناس تشوفك قادر تحمل العبىء كلو لحالك وقادر تحل أي مشكلة وتتأقلم مع أي ظرف وقادر تشيل فوق كتافك من الإبرة للصاروخ .. وبتعرف تسند وتطبطب وتعدي وتتعود وتيجي ع حالك رح يحكو "معلش ما هو بتحمل! "
معلش ماهو مش بحاجتنا ! معلش ماهو بقدر! معلش مر ب أصعب من هيك! معلش بعرف يدبر حالو ! معلش في شغلات أهم منو ! معلش أزمة وبتعدي ..
بس الشي المهم اللي راح عن بال الكل إنو في للقوة رصيد وهالرصيد اذا تم إستهلاكو زيادة عن اللزوم ممكن ينفذ!
واذا نفذ بدون إعادة شحن! رح تضطر توقف مكانك وترفع الراية البيضا، وهون الكارثة ..
عشان هيك ما تستقوي حالك، خلي جانب فيكي دايماً بحاجة لحدا يسندو، ما تعوديهم ع إنك الجبل الي ما بهزو ريح!
ما تعوديهم ع التضحية! ولا على قدرة التحمل اللامنتهية!
لإنك مخلوق وعندو طاقة وقدرة تحمل ومشاعر وأحاسيس وحياة وإهتمامات ورغبات وهوايات.
92 viewsprincess , 20:14
ل
