'كل ما أفعله هذهِ الأيام هو أنني أحرسُ قلبي من اليأس' ساندرا | خواطِر،إقتباسات وقِصص🌷📖
"كل ما أفعله هذهِ الأيام هو أنني أحرسُ قلبي من اليأس" ساندرا سراج
بجيني إحساس إني عايزة أختفي، إني not good enough بقيت فاشلة جدًّا في المواساة بس مستعدة أسمعك للصباح ولو ما لقينا حل نجي نبكي سوا ما مشكلة هو في حاجات معيّنة يمكن مخلياني الفترة دي مشوشة، ضايعة، ما عارفة أصيغ كيف حاسة إني بس عاوزة أبكي، أبكي كل الجواي دا..
رغم إني بحب العُزلة، بس ما بحب أكون منعزلة for ever بالعكس أنا شخص منفتح جدًّا وبحب الكلام الكتير والهظار والمشاركة ولما بحب زول بدخلّو في تفاصيلي غصب.. مؤخرًا بديت أحس إني أهدأ من زمان، بفكر قبل أعمل شي، هو صراحة أنا دايمًا باخد وقت في التفكير بس أوقات بكون متهورة شوية ومتسرعة، ابتديت أبعد عن كل شيء حتى الأشخاص المهمين عندي وممكن دي تكون حاجة تزعلهم مني، بس حابة آخد وقت مع نفسي، وشكله ح يطول الوقت دا..
جيت على نفسي كتير، أعتقد المفروض أقول كفاية وأرحم قلبي شوية حبيت أحاول أعبّر الكتابة بتساعدني جدًّا، لطالما تفعل يعني ")
دايمًا بقول لنفسي :
"لو حسيتي نفسك تقيلة، أمشي" دا أكتر شعور أمقته، إني أكون بضغط على إنسان أو يوصّل لي إني كدا فا أول شيء بحاول جاهدة أعمله إني أبعد البعد دا صعب شديد علي، لأني بقدّس العلاقات بكل أنواعها
اتعلّمت برضو إني ما أنتظر شي، إلا من ربّ العالمين بالنسبة لي دي فترة بتاعة نقاهة وفترة بتاعة اكتشاف للذات وبحث كتير شديد.. وفخورة بنفسي بكل مشاعري الما مفهومة وكل لخبطتي ودايمًا بسعى لأني أكون نسخة أفضل عن نفسي يوم بعد يوم
عمومًا بتمنّى ودعوتي الدايمة إني أكون خفيفة وما آذي إنسان ولو أذيتك قبل كدا، فا أكيد أنا ما قصدي.. العفو والعافية العمر لحظة، ما نفسي أمشي وفي زول شايل مني في قلبه
