تالته ثانوي بجد من أجمل السنين اللى عدت عليا، واللى هتعدي عليك | انت تستطيع _ 𝒚𝒐𝒖 𝒄𝒂𝒏.
تالته ثانوي بجد من أجمل السنين اللى عدت عليا، واللى هتعدي عليكم ( وهتعرفوا بده بعدين) .... سواء وصلت لحلمك أو لأ هتكون فخور بنفسك إنك قدرت تكملها للآخر، ومستسلمتش.
بالنسبالي أي حد ف تالته بطل بجد ، لأنه بيواجهه كميه تعب نفسي غير عادي، بيبقى عنده خوف رهيب من حاجات كتير..خوف من انه يكون مقصر، أو مهمل، أو مبيحلش كتير زي باقي صحابه، خوف من انه بعد تعبه ميوصلش للى عايزه، ويخذل أهله واللى وثقوا فيه، خوف من حاجااااات كتير.
بتعدي عليه أيام مينمش ويبقى بينعس ع الكتاب حرفياً، أو من كتر التعب الجسدى والتراكم النفسي يعيط.... لأ بجد كميه مواقف وأحاسيس ومشاكل جامده
بس رغم كده بيواجهه ودايماً بيحاول ويعافر ويسيب حاجات بيحبها علشان يخلص المذاكره، وبيكون عنده قوه من جواه ربنا بيمن عليه بيها علشان يقدر يكمل، وبيبقي جواه روح التحدي وحاسس إنه إنسان مسؤول بجد.... وهو فعلاً كده
فـ انا جايه أوجهلك رساله... متقلقش ورب الكون لن يضيعك ما دُمت تسعى
عارف إذا وصلت لحلمك وده كان اختيار وقدر ربنا ليك، هتفرح جدا وكل أهلك هيفرحوا ويفتخروا بيك ( اعمل لليوم ده)
وإذا_ لا قدر الله_ موصلتش للى عايزه...ربنا هينزل عليك سكينه وطمأنينه من عنده وهيصبر أهلك ويخليهم مقدرين لمجهودك ( لا يكلف الله نفساً إلا وسعها) وهيفتحلك بدل الباب اللى اتقفل أبواب ممكن توصلك لنفس الحلم أو لإختيار ربنا اللى كتبه ليك واللى هو هتدرك بعدين ان والله انه الأفضل و الخير ليك
