بتحبي زول؟ وهو بحبك؟ صدقيني هو محظوظ انو بحبك لكن انتِ ما محظ | زول بشخبط
بتحبي زول؟ وهو بحبك؟ صدقيني هو محظوظ انو بحبك لكن انتِ ما محظوظة...! عارفة ليه؟.. لأنك بتكوني بتحبي زول واحد من اتنين يا اما ماجادي ومعتبرك مجرد جكسوية وحبيبه يقضي بيها وقتو وفراغو العاطفي والسلام وما خاتي في بالو انو يوم ح يجي يدق الباب ويطلب ايدك ... عارفة ليه؟ لانو ابدًا ما خاتيك لي قدام خاتيك للوقت الحالي... وللأسف انتِ ما ح تعرفي الكلام دا إلا بعد مايفوت الفوات ويدق الباب من ناس تانيين عايزنك جادين وبيتمنوك انك تبقي شريكة حياتهم وام اولادم وانتِ عشانوا تقفلي في وشهم الباب مرات ومرات...
ويا اما انك بتحبي زول جادي لكن ظروفوا صعبة شديد لا هو ح يرضي يتقدم ليك بنفس ظروفو الحالية دي ولا انتي ح تتنازلي عن الطريقة العايزة يكون بيها زواجك وفي النهاية العمر ماشي لا ظروف زولك اتصلحت (وهو شغل تلقي ما شغال !!!!!) ولا كمان اقتنعتو وكل زول انتظر قسمتو مع شخص تاني.
الحب مشاعر ما باليد ما ممكن الزول يتحكم فيها لكن ممكن يوجهها للطريق الصاح بدل الطريق الخطاء لمن تلقي قلبك حبّه والحباهو قلبك هو ذاتو حباك قولي ليهو تعال بالباب يا اما جاء وطلع جادي يا اما كبرا وطلع كذاب وبكدا بتكوني نجيتي نفسك من سكة العذاب الكنتي ح تمشيها...
وماضروري يكون عندك حبيب زي ما صاحبتك عندها لكن ممكن تتمني يكون عندك خطيب ليه قلت خطيب؟ عشان الخطيب بيجي بالباب وغالبا بكون جادي لانو جاء لي اهلك وخطبك رسمي على اساس انك تبقى زوجتو (لو لقيتو نفسكم انكم ح تقدرو تستمرو مع بعض) فحكاية تتعرفي بشاب ويتعرف بيك من غير اهلك دي غالبا فاشلة وبتعرفك بالشباب الغير جادين او الماعندهم رغبة في الاستقرار وبناء اسرة عشان كدة في الشرع في حاجة اسمها الرؤية الشرعية بيجي يشوفك عند اهلك وصدقيني واحد بتاع لف ودوران مابيجي يشوفك ...الجادي هو البعملة... ويا اما عجبتيهو وطلب يدك ويا اما ما عجبتيهو وقال ما فيها قسمة وانتهى الموضوع.
الخلاني اكتب في الموضوع دا شايف الزمن دا العلاقات العاطفية كترت لدرجة بتلقي انو البنت عندها اكتر من 4حبايب والولد اكثر من 6 ما تستغربوا دي حقيقة وكلها علاقات ما جادة والعرسان الجاهرين لمن يجو يختارو ليهم عروس بيلقو كل البنات مرتبطات ومغشوشات.
لا المرتبطات بيهم عرسوهن ولا هن وافقن على العرسان الجوهن ودقو الباب .
