جينه نمشي الكربله واحزانها البيها زينب ذبحوّا وليانها ** بيها | قصائد حسينية مكتوبه
جينه نمشي الكربله واحزانها
البيها زينب ذبحوّا وليانها
**
بيها زينب شبعت اهموم وتعب
بيها وجه الله عله الغبره انگلب
بيها شيب حسين بالدم انخضب
والخيام امسعّره بنيرانها
****
لا ولي ضل عدها لا ضلت خيم
وبالبراري ركضت اطفال وحرم
وصعدت اتله اخت راعي العلم
تحشم ومحد اجه من اخوانها
**
اخوانها كلهم صفو فوگ الترب
وعالنسه شمر الخنه اعلن حرب
المثل زينب چيف تمشي وي غرب
واخيال زينب مالمح جيرانها
****
هاي زينب وينها وين السبي
من اخوها تستحي شلون اجنبي
يحدي بضعون الهواشم ناصبي
شلون زينب تمشي وي عدوانها
*
تمشي مسبيه وعلى نوگ الهزل
وكل خوات ثنين مچتوفه بحبل
مروا اعله اخوتها فروها الابل
من عله النوگ وتودع احنانها
****
ودعتهم والدمع منها جره
الاحيود امطشرين اعله الثره
والكفل زينب چفوفه امبتره
عالشريعه هناك ضل نيشانها
***
هناك ضل نيشان صوب المشرعه
جود ساگيها وچفوف مگطعه
بالمدامع عالهزيله اتودعه
بالدموع اتودعه مو بلسانها
***
بالدموع تودع اخوتها ومشت
من كربله ولشام لحضه ماغفت
تنضرب بالصوط طفله لو بچت
واتضم رقيه زينب بأحضانها
**
وصلن الشام ومصيبتهن دوت
طبن السوگ وحجر كلها رمت
واشماته عيون وكحه وماعضت
وزينب اتغطي الوجه بردانها
*
دخلن القصر الظلاله بالسره
وكل مره تلوذ بعباية المره
ام عُمر سنتين هيه امخدره
وزينب العفه صبح عنوانها
**
الشام ياجرحه الفلا صحله دوه
الشام امضى من مصايب نينوى
الشام يخنگها تره حته الهوى
الشام هاشم بي سبوو نسوانها
جينه نمشي الكربله واحزانها
البيها زينب ذبحوّا وليانها
**
عمار حسن الدراجي
كتبت هذه القصيده في طريق المشايه
الناصريه گرمة بني سعيد ٦صفر١٤٤٥هـ
https://telegram.me/aabas78
قصائد لكل ايام محرم اشترك بالقناة